Rasijskaje hramadstva choča vajny, pakazvajuć apytańni

Niadaŭni dakład Atlantic Council sprabuje adkazać na pytańnie, čamu nastroi rasijskaha hramadstva takija. Aŭtarka dakłada, ekśpiertka pa Rasii i Jeŭrazii Maryja Śniehavaja, adznačaje, što apytańni, praviedzienyja roznymi rasijskimi daśledčymi arhanizacyjami, pakazvajuć, što kala 70—75 pracentaŭ rasijan padtrymlivajuć tak zvanuju «śpiecyjalnuju vajennuju apieracyju», u toj čas jak usiaho kala 20 pracentaŭ vystupajuć suprać.

Internet-apytańni dajuć padobnyja vyniki, choć mohuć być nievialikija adroźnieńni ŭ zaležnaści ad farmuloŭki pytańniaŭ. Adnak asnoŭnaja karcina zastajecca stabilnaj: pieravažnaja bolšaść padtrymlivaje vajnu.

U dakładzie vyłučajucca try asnoŭnyja hrupy rasijanaŭ pavodle ich staŭleńnia da vajny:

1. Łajalnyja i nieŭpeŭnienyja prychilniki (kala 36—49% i 11—14%).

   Hetaja hrupa padtrymlivaje vajnu pieravažna pa zvyčcy abo tamu, što ličyć heta pravilnym. Jany schilnyja vieryć aficyjnaj pazicyi ŭrada, choć časta vystupajuć za chutkaje zaviaršeńnie vajny.

2. Jastraby (13—27%).

   Pradstaŭniki hetaj hrupy, pieravažna mužčyny ŭ hadach, starejšyja za 45 hadoŭ, aktyŭna padtrymlivajuć vajnu i admaŭlajuć mahčymaść kampramisaŭ. Ich pazicyja nacyjanalistyčnaja i rašučaja.

3. Praciŭniki vajny (20—30%).

   Hetaja hrupa vystupaje suprać vajny, jany zvyčajna maładziejšyja, žyvuć u haradach i vykarystoŭvajuć niedziaržaŭnyja ŚMI jak asnoŭnuju krynicu infarmacyi. Ich dola zastajecca stabilnaj z pačatku 2022 hoda.

Pavialičyć

Alternatyŭnaj infarmacyi dastatkova

Isnuje mierkavańnie, što rasijanie padtrymlivajuć vajnu praź niedachop alternatyŭnaj infarmacyi. Adnak, jak adznačaje ekśpiertka, bolšaść rasijan maje dostup da internetu i moža lohka znajści niezaležnyja krynicy infarmacyi.

Niahledziačy na cenzuru, dziaržava nie zdoleła całkam pierakryć dostup da takich płatformaŭ, jak YouTube, Telegram ci VPN. Tym nie mienš, značnaja častka nasielnictva praciahvaje prytrymlivacca dziaržaŭnych naratyvaŭ.

Jak rasijanie prystasoŭvajucca 

Poŭnamaštabnaja vajna va Ukrainie maje značna bolšy maštab i košt, čym papiarednija kanflikty, ale hramadskaja padtrymka jaje zastajecca vysokaj. Bolšaść rasijan prymaje situacyju, pakul jana nie zakranaje ich asabista. 

Navat kali niešta vyklikaje tryvohu, nastroi chutka viartajucca da normy. Voś, dziela prykładu, niekalki situacyj, jakija patencyjna mahli paŭpłyvać na nastroi:

• Sankcyi: pieršapačatkova sankcyi vyklikali niaŭpeŭnienaść i strach. Ale mnohija rasijanie chutka adaptavalisia i nie adčuvajuć mocnaha asabistaha ekanamičnaha bolu.
• Častkovaja mabilizacyja (vierasień 2022 hoda): spačatku heta vyklikała tryvohu i strach. Adbylisia nievialikija akcyi pratestu. Ale praź niekalki miesiacaŭ panika źnikła.
• Miaciež «Vahniera» (červień 2023 hoda): hramadskaja tryvoha znoŭ nienadoŭha ŭzrasła, ale nieŭzabavie narmalizavałasia.
• Ukrainskaje ŭvarvańnie ŭ Kursk (žnivień 2024 hoda): tryvoha vyrasła, ale adabreńnie Pucina źniziłasia zusim niaznačna. Padtrymka dla zamireńnia​ ŭzrasła, ale taksama nieistotna.

Prykładna pałova padtrymlivaje mirnyja pieramovy, ale zvyčajna tolki ŭ tym vypadku, kali Rasija zachavaje zachoplenyja terytoryi. Inšymi słovami, jany nie hatovyja pryznać svaju parazu.

Čamu čakańni razyšlisia z realnaściu? 

U minułym mnohija ekśpierty dumali, što Rasija stanovicca bolš adkrytaj i z časam admovicca ad aŭtarytaryzmu, — adznačaje Śniehavaja.

Hetyja ekśpierty taksama pieraacanili, kolki rasijan padtrymlivajuć libieralnyja, prazachodnija pohlady. 

U rečaisnaści «libieralnyja» rasijanie składajuć niaznačnuju mienšaść (kala 7—10 pracentaŭ). Bolšaść rasijan nie nazavieš prademakratyčnymi, i Zachadu jany nie simpatyzujuć.

Namahańni libierałaŭ źmianić hramadstva abo vykryvać pucinskija represii nie mieli vialikaha vodhuku.

Minułyja prykłady, naprykład, savieckaja vajna ŭ Afhanistanie, śviedčać pra toje, što vialikija straty mohuć nastroić hramadstva suprać urada. Ale tut hetaha nie adbyvajecca. Rasijskaja prapahandysckaja mašyna stvaraje «pieramožnuju» historyju, jakoj mnohija rasijanie dahetul daviarajuć.

Ci možna daviarać sacyjałahičnym apytańniam?

Niekatoryja krytyki sumniavajucca ŭ vierahodnaści rasijskich apytańniaŭ, śćviardžajučy, što strach i represii prymušajuć ludziej chavać svaje sapraŭdnyja mierkavańni. 

Ale — tłumačyć ekśpiertka — daśledavańni pakazvajuć, što hety efiekt nievialiki. Jak anłajn, tak i asabistyja apytańni z roznych krynic pakazvajuć padobnyja vyniki. Kali b šmat rasijan chłusiła, vypadała b čakać bolšych razychodžańniaŭ.

Rasijskija sacyjołahi praciahvajuć apytvać pradstaŭnikoŭ roznych słajoŭ hramadstva. Pakazčyki adkazaŭ zastajucca stabilnymi i nie pakazvajuć vialikich źmien z pačatku vajny, śćviardžaje jana. 

Daśledavańni z vykarystańniem uskosnych mietadaŭ vymiareńnia praŭdzivych mierkavańniaŭ vyjaŭlajuć, što, mahčyma, 6—10 pracentaŭ respandentaŭ chavajuć svaje sapraŭdnyja pohlady, čaho niedastatkova, kab źmianić ahulnuju karcinu.

Apošnija davajennyja apytańni taksama pakazali, što mnohija rasijanie byli hatovyja padtrymać vajennyja dziejańni ŭ susiednich krainach. Takim čynam, pravajennyja nastroi byli padrychtavanyja dziaržaŭnaj prapahandaj nie ŭ lutym 2022 hoda, a značna raniej. A kramloŭskaja prapahanda tolki ŭzmacniła najaŭnyja mientalnyja ŭstanoŭki ŭ hramadstvie.

Što cikava: suprać vajny vystupajuć bolš biednyja, a bolš bahatyja rasijanie chutčej za, što stavić pad sumnieŭ raspaŭsiudžanyja teoryi, što, maŭlaŭ, pa miery rostu dabrabytu rasijskaje i kitajskaje hramadstvy majuć rabicca mienš praimpieryjalistyčnymi, antyzachodnimi i prademakratyčnymi.

Takim čynam, bolšaść rasijan pa-raniejšamu padtrymlivaje vajnu va Ukrainie ci, prynamsi, adkryta nie vystupaje suprać jaje. 

Šok vajny, sankcyj i navat karotkich unutranych chvalavańniaŭ nie pierakreślili «pucinskaha kansensusu». Choć niekatoryja rasijanie spadziajucca na mir, jany chočuć jaho na ŭmovach Rasii. 

Ekanamičnaja vykliki i śmiarotnyja achviary nie vyklikali masavaha hramadskaha niepryniaćcia vajny. Pakul što kramloŭskaja viersija padziej vyrazna daminuje ŭ rasijskaj hramadskaj prastory.

• 2
• 0
• 1
• 13
• 0
• 0
• 11
• 0