Štohadovy aŭtarejtynh Consumer Reports: Japoncy znoŭ najlepšyja
U šaści ź dziesiaci naminacyj panavali aŭtamabili japonskich marak, a najlepšym byŭ pryznany Lexus LS 460.
Amierykanskaje vydańnie Consumer Reports apublikavała štohadovy spažyviecki rejtynh aŭtamabilaŭ. U šaści ź dziesiaci naminacyj panavali aŭtamabili japonskich marak, a najlepšym byŭ pryznany Lexus LS 460.
Časopis sajuzu spažyŭcoŭ ZŠA Consumer Reports (CR) apublikavaŭ štohadovy rejtynh aŭtamabilaŭ, pradstaŭlenych na amierykanskim rynku. Upieršyniu za šeść hadoŭ u śpisie apynułasia adrazu dva aŭtamabili amierykanskich marak, a ŭ šaści ź dziesiaci katehoryj pieramahli japonskija mašyny.
Ekśpierty Consumer Reports praviali vyprabavańni amal trochsot aŭtamabilaŭ, kožny ź jakich prajšoŭ da 50 roznych testaŭ. Taksama pry składańni rejtynhu ŭličvalisia vyniki kraš-testaŭ, praviedzienych niezaležnymi dziaržaŭnymi i strachavymi arhanizacyjami i vyniki apytańnia bolš za 5 młn. čałaviek. Usie vyprabavanyja mašyny abstalavanyja sistemaj stabilizacyi i bakavymi paduškami biaśpieki.
Niahledziačy na skandał, što razhareŭsia vakoł vodhukaŭ na aŭtamabili Toyota, pradukcyja japonskaha kancerna zasłužyła vysokija acenki ekśpiertaŭ. «Najlepšym pa ŭsich paramietrach» u 2010 hodzie pryznany Lexus LS 460, a siarod ekałahičnych aŭtamabilaŭ pieramohu atrymaŭ hibryd Toyota Prius treciaha pakaleńnia.
«Pavodle dadzienych našaha apytańnia, Toyota dahetul robić samyja nadziejnyja transpartnyja srodki. Na druhim miescy Honda», – pryvodzić Detroit Free Press słovy dyrektara testavaha centru SR Devida Čempijana.
Adnak Toyota RAV4, nazvanaja letaś najlepšym kampaktnym krasovieram, i pazadarožnik Toyota Highlander byli vyklučanyja z rejtynhu amierykanskaha sajuzu spažyŭcoŭ pierad jaho publikacyjaj. «Toyota Highlander i RAV4 byli vyklučanyja, tamu što kampanija prypyniła ich prodaž. Časopis pierahledzić svajo rašeńnie, kali prodaž adnovicca», – padkreślivaje Čempijan.
Lexus LS 460 prademanstravaŭ vydatnyja vyniki ŭ darožnych testach, taksama ekśpierty acanili spałučeńnie kamfortnaj jazdy z dobrymi ŭmovami dla kiroŭcy – prastornym i dobra pradumanym sałonam. Pry hetym, adznačaje CR, aŭtamabil, abstalavany ruchavikom V8 mahutnaściu 380 ł.s. i vaśmistupiennaj aŭtamatyčnaj tranśmisijaj, pa ekanamičnaści znachodzicca na adnym uzroŭni z Honda Accord z matoram V6 mienšaha litražu.
Zvańnie najlepšaha siarod kampaktnych siedanaŭ paćvierdziŭ Hyundai Elantra SE. Aŭtamabil pieramahaje ŭ hetaj naminacyi treci hod zapar dziakujučy bałansu spažyvieckich jakaściaŭ – jon paraŭnalna prastorny, cichi, vyhodny i ekanamičny. Na vybar amierykanskich ekśpiertaŭ paŭpłyvała taksama najaŭnaść «u bazie» sistemy stabilizacyi.
U katehoryi siamiejnych siedanaŭ pieramoh Nissan Altima, jaki vałodaje najlepšaj u hetym kłasie paliŭnaj ekanamičnaściu – 9 litraŭ na 100 km z čatyrochcylindravym ruchavikom i 9,8 ł na «sotniu» z matoram V6.
Siarod kampaktnych krasovieraŭ, sportsiedanaŭ, minivenaŭ i ekałahičnych aŭtamabilaŭ taksama pieramahli aŭtamabili japonskich marak.
Subaru Forester zasłužyŭ pryznańnie ekśpiertaŭ za najlepšyja ŭ kłasie chadavyja jakaści, prastornaje zadniaje siadzieńnie i vydatny ahlad.Siedan Infiniti G37, pradstaŭleny ŭ rejtynhu čaćvierty hod, atrymaŭ 95 bałaŭ sa 100 mahčymych. Siarod adznačanych vartaściaŭ – imklivaść i manieŭranaść u spałučeńni z vysokaj jakaściu i raskošnym interjeram. Mazda 5 atrymała vysoki rejtynh dziakujučy spałučeńniu kampaktnaści i jomistaści, a Toyota Prius pa-raniejšamu niama roŭnych siarod hibrydaŭ pa paliŭnaj ekanamičnaści. Na 100 km šlachu aŭtamabil tracić usiaho 5,3 ł bienzinu. Taksama ekśpierty acanili jaho univiersalnaść i vydatnyja vyniki ŭ kraš-testach.
U naminacyi Sporty Car pieramohu atrymaŭ jeŭrapiejski «haračy chetčbek» Volkswagen Golf GTI, jaki spałučaje spartyŭnaść i praktyčnaść, pradumany interjer i «vostry» rul.
Marka Chevrolet nie mieła roŭnych siarod pikapaŭ i poŭnapamiernych krasovieraŭ. U hetych katehoryjach pieramahli Chevrolet Silverado i Chevrolet Traverse.Adnak na dumku Consumer Reports, u ahulnym nadziejnaść pradukcyi GM pakul adstaje ad kankurentaŭ.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana10
Kamientary