U Breście jašče piaciarych asudzili za ŭdzieł u akcyi pratestu 10 žniŭnia 2020-ha. A ŭsiaho pa spravie — užo 58 čałaviek
Heta adna z samych bujnych spraŭ za akcyi.
U sudzie Leninskaha rajona Bresta ahučyli čarhovy masavy prysud pavodle č. 1 art. 342 KK (aktyŭny ŭdzieł u dziejańniach, što hruba parušajuć hramadski paradak). Sudździa Alaksandr Siemiančuk za ŭdzieł u akcyi pratestu 10 žniŭnia 2020 hoda pryznačyŭ piaci bieraściejcam terminy ad dvuch hadoŭ «chatniaj chimii» da paŭtara hoda kałonii.
Jak piša «Bieraściejskaja Viasna», pa vynikach suda pryznačyli:
- Elviry Łamanos — dva hady «chimii»;
- Alaksandru Pratasiuku — adzin hod kałonii va ŭmovach ahulnaha režymu;
- Taćcianie Bandaruk — dva hady «chatniaj chimii»;
- Alaksieju Martynavu — adzin hod šeść miesiacaŭ kałonii va ŭmovach ahulnaha režymu;
- Viačasłavu Hrabinskamu — try hady «chatniaj chimii».
Sutnaść abvinavačvańnia suprać usich palahała ŭ tym, što jany 10 žniŭnia 2020 hoda «vykrykvali łozunhi, śvistali, plaskali ŭ dałoni, demanstravali pałotny bieł-čyrvona-biełaha koleru, vychodzili na prajeznuju častku». Hetym jany nibyta hruba parušali hramadski paradak.
Takim čynam, užo viadoma pra 58 čałaviek, jakija atrymali terminy pavodle art. 342 KK za pratesty 10 žniŭnia 2020 hoda ŭ Breście.
Kamientary