Pavieł Duraŭ paśla emihracyi ŭ 2014 hodzie byvaŭ u Rasii nie mienš za 50 razoŭ

Zasnavalnik Telegram Pavieł Duraŭ byvaŭ u Rasii bolš za 50 razoŭ u 2015-2021 hadach. Pra heta stała viadoma z bazy pamiežnaj słužby FSB «Kardon», uciečka jakoj adbyłasia ŭ sieciva.

U krasaviku 2014 hoda Pavieł Duraŭ pakinuŭ Rasiju, pradaŭšy svaju dolu ŭ stvoranym im Vkontaktie. Duraŭ vyrašyŭ vyjechać z krainy paśla taho, jak rasijskija śpiecsłužby patrabavali ad jaho raskryć asabistyja danyja supolnaściaŭ, u jakich ukraincy arhanizoŭvali pratesty padčas Jeŭramajdanu. Paźniej jon taksama raskazaŭ pra pieratrusy i patrabavańnie vydalić supołki rasijskich apazicyjanieraŭ.

«Niama šlachu nazad. Asabliva paśla taho, jak ja publična admoviŭsia supracoŭničać z uładami», — zajaviŭ Duraŭ u 2014-m. Jon taksama apublikavaŭ ese «Siem pryčyn nie viartacca ŭ Rasiju», u jakim raskrytykavaŭ rasijskija sudy, zakanadaŭstva i padatkovuju palityku.

U niadaŭnim intervju Takieru Karłsanu Duraŭ havaryŭ, što nie naviedvaje «bujnyja hieapalityčnyja dziaržavy» — takija, jak Rasija, Kitaj abo ZŠA.

Adnak žurnalistam stała viadoma, što Duraŭ pryjazdžaŭ u Rasiju pa šmat razoŭ na hod u 2015-2017 i ŭ 2020-2021 hadach. Vyklučeńniem staŭ tolki pieryjad, kali Kreml abviaściŭ vajnu Telegram i biespaśpiachova sprabavaŭ jaho błakavać.

Pieršy vizit miljardera ŭ Pieciarburh paśla «vyhnańnia» adbyŭsia nie raniej za maj 2015 hoda. Dakładnaja data ŭjezdu ŭ RF nie adlustravanaja va ŭciečkach pamiežnaj słužby FSB. Mahčyma, Duraŭ zajazdžaŭ u Rasiju praź Biełaruś — pieramiaščeńnia praź biełaruska-rasijskuju miažu ŭ bazie mohuć nie fiksavacca.

Z hetaha momantu i da kanca 2017 hoda biznesmien pryjazdžaŭ u Maskvu i Sankt-Pieciarburh jak minimum 41 raz. U Rasiju ź Finlandyi zajazdžaŭ i jahony brat Mikałaj — prahramist, jaki faktyčna i stvaryŭ papularny miesiendžar.

U 2017 hodzie rasijskija ŭłady abviaścili vajnu Telegram. Jany patrabavali klučy rasšyfroŭki čataŭ fihurantaŭ spravy ab terakcie ŭ Sankt-Pieciarburhu, a paśla admovy łondanskaha ofisa Telegram sprabavali zabłakavać miesiendžar. 

Duraŭ tady pahražaŭ parvać z krainaj usie asabistyja i dziełavyja suviazi. Tym nie mienš, amal uvieś 2017 hod jon najezdami pravioŭ u Rasii. Viartaŭsia pradprymalnik u krainu navat paśla suda pa pazovie FSB — tady Telegram aštrafavali. 

Pad Novy hod Duraŭ usio ž vyjechaŭ ź Pieciarburha i nie viartaŭsia ŭ Rasiju dva z pałovaj hady, pakul u jaho nie ŭźnikli prablemy ź jahonym błokčejn-prajektam TON i kryptavalutaj Gram, pad jakija jon pryciahnuŭ 1,7 młrd dalaraŭ inviestycyj.

Zapusk TON zatarmazili ŭłady ZŠA. Kamisija pa kaštoŭnych papierach i biržach zapadozryła, što Telegram pad vyhladam kryptavaluty choča pradać niezarehistravanyja kaštoŭnyja papiery. Sud u Ńju-Jorku ŭ sakaviku 2020-ha zabłakavaŭ vypusk Gram, praces pa apielacyi Durava zaciahnuŭsia. Uźnikła niebiaśpieka zastacca ŭ daŭhach i navat stracić dolu ŭ Telegram.

U červieni 2020-ha Duraŭ u svaim aficyjnym akaŭncie vitaŭ prapanovu deputataŭ Dziarždumy razbłakavać Telegram u Rasii. Jon daŭ spravazdaču, što za minułyja hady jahonaja kamanda stała bolš efiektyŭna vydalać «ekstremisckuju prapahandu», i paabiacaŭ padtrymlivać deputataŭ, kali tyja zachočuć zmahacca z teraryzmam, nie parušajučy prava na tajamnicu pierapiski.

Tady ž Duraŭ upieršyniu za dva z pałovaj hady viarnuŭsia ŭ Rasiju. Adnačasova Raskamnahlad raptam razbłakavaŭ Telegram u krainie pa ŭzhadnieńni z Hienprakuraturaj, «pazityŭna acaniŭšy vykazanuju zasnavalnikam Telegram hatoŭnaść supraćdziejničać teraryzmu i ekstremizmu».

I tady ž Duraŭ urehulavaŭ spravy z uładami ZŠA, pahadziŭšysia viarnuć bolš za miljard dalaraŭ inviestaram i zapłacić vialikija štrafy.

Z červienia 2020-ha pa kastryčnik 2021-ha Duraŭ žyŭ pamiž Rasijaj, Jeŭropaj i AAE. Na hety pieryjad prypadajuć błakavańni telehram-bota «Razumnaha hałasavańnia» kamandy Navalnaha i inšych apazicyjnych botaŭ pierad vybarami ŭ Dziarždumu 2021 hoda. 

21 kastryčnika 2021 hoda Duraŭ palacieŭ z Rasii na Ibicu i bolš u krainu nie viartaŭsia, adnak tudy nadalej jeździŭ jahony asistent. Toj samy, jaki supravadžaŭ biznesmiena ŭ pajezdcy ŭ Azierbajdžan pierad zatrymańniem u Francyi.

Ci sustrakaŭsia Duraŭ z uładami Rasii padčas šmatlikich vizitaŭ u Maskvu i Pieciarburh, nieviadoma.

• 2
• 2
• 31
• 1
• 2
• 0
• 3
• 2