Vystava Alesia Puškina adkryjecca ŭ Muziei Volnaj Biełarusi ŭ Varšavie ŭ dzień narodzinaŭ mastaka
U dzień narodzinaŭ Alesia Puškina — 6 žniŭnia — u Varšavie, u Muziei Volnaj Biełarusi, adkryjecca vystava «Ales Pushkin. AFTERLIFE». Hetaja data abrana dla adkryćcia prajekta nievypadkova — nasupierak hvałtoŭnaj śmierci biełaruskaha mastaka, jakaja adbyłasia hod nazad u haradzienskaj turmie, piša Reform.news.
Dla vystavy abrana niekalki klučavych tem, jakija raskryvajuć raznabakovaje mastactva aŭtara i zastajucca aktualnymi ŭ siońniašni histaryčny momant: Dzień Voli, Padarunak Prezidentu, Śviaty i Śviaty, Biełaruski Rezistans, Supraciŭ Vajnie.
Asnoŭnaja kancepcyja ekspazicyi hruntujecca na akcyjach i pierformansach Alesia Puškina, jakija jon pravodziŭ u adkrytaj prastory z 1989 hoda. Hetyja akcyi pakazvajuć jaho jak radykalnaha mastaka-akcyjanista, jaki pracavaŭ z kulturnym, sacyjalnym i palityčnym kantekstami.
Ekspazicyja vykarystoŭvaje instalacyjny mietad samoha aŭtara i praciahvaje jaho vychad u prastoru.
Bolšaść ekspanataŭ stvorana na asnovie miedyjnych artefaktaŭ, dakumientaŭ i aryhinalnych videaprac z archiva mastaka, siabroŭ i kaleh. U vystavu taksama intehravany aryhinalnyja pracy mastakoŭ, fatohrafaŭ i videadakumientalistaŭ, jakija supracoŭničali z Alesiem i čyja tvorčaść kanceptualna źviazana ź jaho idejami. Heta dadaje bolš ujaŭleńnia ab atmaśfiery času i praciahvaje jaho mastackuju spadčynu.
Aleś Puškin — mastak, pierformier, aktyvist, kuratar, haleryst. Naradziŭsia ŭ 1965 hodzie i žyŭ u miastečku Bobr, pamiž puščaŭ-bałot na ŭschodzie Biełarusi. Zajmaŭsia restaŭracyjaj, manumientalnym carkoŭnym žyvapisam i teatralnym mastactvam. Adna z najvažniejšych akcyj «Padarunak prezidentu «Za piacihadovuju plonnuju pracu!» adbyłasia ŭ 1999 hodzie i ličycca pierałomnaj dla biełaruskaha art-aktyvizmu. Za svaje pierformansy i palityčnyja pohlady na praciahu ŭsiaho tvorčaha žyćcia nieadnarazova adbyvaŭ sudovyja i turemnyja pakarańni. 11 lipienia 2023 hoda Aleś pamior u hrodzienskaj turmie №1.
U vystavie možna budzie ŭbačyć tvory: Alesia Puškina, Rufiny Bazłovaj (Stitchit), Alaksandra Vasiukoviča, Andreja Durejki, Ijałanty Kilijan, Janaka Koŭziela, Maksima Tymińko, Antosia Cialežnikava, Jany Šostak, Ramana Šeła.
Asablivym momantam padčas adkryćcia prajekta stanie vystup «Volnaha chora».
Kuratar vystavy — Andrej Durejka.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ4
Kamientary