Vierniki prosiać biskupa, kab jon adnaviŭ Zavalniuka na pasadzie probašča Čyrvonaha kaścioła
Katalickija vierniki prosiać adnavić ksiandza Uładzisłava Zavalniuka na pasadzie probašča staličnaj parafii sv. Symona i Aleny (Čyrvony kaścioł). Pra heta havorycca ŭ adkrytym liście na parafijalnym sajcie, adrasavanym da mitrapalita Minska-Mahiloŭskaha arcybiskupa Juzafa Stanieŭskaha.
![](http://d3kcf2pe5t7rrb.cloudfront.net/img/w840d4webp1/photos/z_2024_07/1045161870_0-0-1000-702_1440x900_80_0_1_47e4bf5419953b752c4bbffe0e6788e8-ckd42.jpg.webp)
Vierniki adznačajuć, što my ciapier «žyviom u časy hanieńniaŭ Katalickaha kaścioła», tamu ŭsim niaprosta, u tym liku i arcybiskupu Stanieŭskamu. Ale Zavalniuk, pavodle aŭtaraŭ lista, 50 hadoŭ «niastomna i ščyra słužyŭ Hospadu i ludziam u roznyja časy», prytym ź ich bolš za 40 hadoŭ — u Biełarusi. Nie zaŭsiody heta adbyvałasia ŭ dobrych umovach, ale ajciec Uładzisłaŭ nikoli nie skardziŭsia.
«Tamu nam vielmi ciažka pavieryć, što probašč prasiŭ ab zvalnieńni, i tamu my vielmi zaniepakojenyja dalejšym losam sapraŭdy vialikaha śviatara, — havorycca ŭ liście. — Raniej my nikoli nie čuli, kab na našych terytoryjach śviataroŭ, jakija majuć paŭnatu sił, zvalniali na piensiju, ale kožny śviatar słužyŭ, pakul mieŭ fizičnyja siły. Niaŭžo zaraz ŭ našaj archidyjacezii tak mnoha ci dastatkova śviataroŭ, što prymajucca takija rašeńni».
Parafijanie vykazali spadzieŭ na toje, što Stanieŭski paspryjaje viartańniu viernikam Čyrvonaha kaścioła i ksiandza Zavalniuka.
Akramia taho, vierniki z parafii śviatoha Symona i Aleny ŭ asobnym liście prosiać apublikavać prašeńnie Zavalniuka ab adstaŭcy.
«Kali jon jaho napisaŭ, tady nadzieja ŭ nas zastajecca tolki na vas, Vaša Eksielencyja, — adznačana ŭ dakumiencie. — My žadajem prasić vas i vierym, što vy zmožacie pierakanać ks. prełata Uładzisłava Zavalniuka zabrać svajo prašeńnie ab adstaŭcy i zastacca sa svajoj pastvaj, heta značyć z nami. Upeŭnienyja, što vy taksama da hłybini dušy zasmučanyja hetaj akaličnaściu i taksama prasili jaho nie sychodzić».
Kali ž Zavalniuka ŭsio ž «nie atrymajecca pierakanać», to vierniki prosiać, kab śviatar prynamsi sam publična zajaviŭ pra svajo pakidańnie pasady.
26 lipienia Minska-Mahiloŭskaja archidyjacezija abviaściła, što arcybiskup Stanieŭski zadavoliŭ prašeńnie Zavalniuka ab zvalnieńni ŭ suviazi z dasiahnieńniem 75-hodździa. Na miesca śviatara, jaki słužyŭ u hetym kaściole bolš za 30 hadoŭ, pryznačyli ksiandza Franca Rudzia.
Kamientary
A tak ja nat daśviedčaniejšy za vašaha probažča, mnie 81 hadoŭ. Mahu ź pieršaha studzienia padmianić