«U Biełarusi maju muzyku rekłamavała KDB, a ŭ Polščy — palicyja». Bancar prakamientavaŭ svajo zatrymańnie ŭ Varšavie
Hrodzienskaha muzyku Ihara Bancara zatrymali ŭ Varšavie 16 lipienia. Pryčyna — mužčyna pryjšoŭ u Ministerstva siamji, pracy i sacyjalnaj palityki ŭ Varšavie sa zbrojaj. Na nastupny dzień — 17 lipienia — Bancara vypuścili z adździaleńnia. Hrodna.life spytaŭ u muzyki, što adbyłosia ŭ ministerstvie i što ź im budzie dalej.
Achova ničoha lepš nie prydumała, jak vyklikać palicyju
«Mianie zabrali ni za što», — skazaŭ Hrodna.life muzyka Ihar Bancar. «Ja pryjšoŭ u ministerstva pa techničnych pytańniach — zajmajusia vyrašeńniem siamiejnych prablem i nichto nie moža ŭ dziaržaŭnych instytucyjach dapamahčy. Tamu mianie nakiravali ŭ ministerstva, kab ja parazmaŭlaŭ ź ich pradstaŭnikom».
Na ŭvachodzie Ihar paviedamiŭ achovie, što maje pry siabie niebiaśpiečnyja pradmiety. «Mianie pravieryli, a rečy nie źmiaścilisia ŭ skrynki dla skaniera, tamu ich pakinuli ŭ kucie. Pakul ja 15 chvilin razmaŭlaŭ z pradstaŭnikom ministerstva, achova prydumlała, što z hetym rabić i ničoha lepš nie prydumała, jak vyklikać palicyju».
Pryjšoŭ z namieram pieraškodzić pracy ministerstva
U vyniku muzyku zatrymali za toje, što jon nibyta śpiecyjalna, z namieram, pryjšoŭ, kab pieraškodzić pracy ministerstva. Heta pahražała jamu kryminalnym artykułam. Z hetym abvinavačańniem muzyka nie zhadziŭsia i vyklikaŭ advakata.
U vyniku, muzyku abvinavacili pavodle administracyjnaha artykuła № 66 (vyklikańnie niepatrebnych dziejańniaŭ, iłžyvaj infarmacyi abo inšym sposabam uviadzieńnie ŭ zman dziaržaŭnaj ustanovy abo orhana achovy biaśpieki, hramadskaha paradku abo zdaroŭja).
Muzyka raźličvaje atrymać štraf
U sieradu 24 lipienia 2024 hoda ŭ rajonnym adździaleńni palicyi ŭ Varšava adbudziecca razhlad administracyjnaha pravaparušeńnia. Ihar raźličvaje atrymać štraf za toje, što pryjšoŭ u ministerstva ź niebiaśpiečnymi pradmietami.
Pavodle słoŭ Bancara, usie pradmiety — try hazy, teleskapičnaja pałka, pistalet — lehalnyja ŭ Polščy, jakija jon nabyŭ u militarnych kramach.
Pavodle słoŭ Bancara, paśla nočy ŭ adździaleńni palicyi jon adčuvaje siabie cudoŭna. «Ja zajechaŭ, narmalna pieranočyŭ u centralnym adździaleńni Varšavy. Pierada mnoj tut nočyŭ ministr Ramanoŭski, jakoha pazbavili imuniteta. Udziačny palicyi za toje, što mianie razrekłamavali. U Biełarusi hetym zajmałasia KDB, a tut palicyja. U vyniku ŭsie ŚMI biełaruskija napisali», — skazaŭ Bancar.
Ihar Bancar — muzykant hrodzienskaj stryt-pank-hurta Mister X. U Hrodnie zajmaŭsia kulturnaj i hramadskaj dziejnaściu. Adbyvaŭ paŭtara hoda «chimii» za nibyta chulihanstva, jakim paličyli taniec u strynhach. Prymaje antyfašysckija i antyrasisckija pohlady. Ciapier žyvie ŭ Varšavie.
Kamientary