Ajcišnik za hod nie znajšoŭ pracy ŭ Polščy i jedzie nazad u Biełaruś
Historyja rełakiejtu «tudy i nazad».
Uładzisłaŭ skončyŭ BNTU pa śpiecyjalnaści «inžynier-miechanik». U IT trapiŭ 12 hadoŭ tamu. Ciapier jon .NET-raspracoŭščyk, piša Devby.io.
Ad vosieni 2022 žyvie ŭ Polščy. Miesiac+ tamu jaho zvolnili z kampanii, u jakoj jon prapracavaŭ bolš za hod. Što praŭda, praca jamu nie padabałasia, tamu jon ceły hod šukaŭ novuju. Razasłaŭ pad sotniu reziume, schadziŭ na sumoŭi i navat paśpieŭ trochi papracavać «na baku». Ale nie skłałasia.
«Usie kanały vielmi drenna pracujuć»
— U Polšču ja pierajechaŭ u listapadzie 2022 hoda, uładkavaŭsia ŭ polski ofis bujnoj aŭtsorsinhavaj kampanii ź biełaruskimi karaniami, u jakoj na toj momant pracavaŭ. Ale nieŭzabavie daviałosia zvolnicca, bo naš prajekt zakryŭsia.
Novuju pracu znajšoŭ chutka — uładkavaŭsia ŭ ofis jašče adnoj bujnoj kampanii ź biełaruskimi karaniami, pryčym na vyšejšy akład.
Usio było niadrenna da krasavika 2023 hoda, kali mianie i inšych kaleh skaracili. Ja adrazu ž znajšoŭ jašče adnuju pracu — Software Engineer (addalena). Što praŭda, hety varyjant byŭ tak sabie — z tajm-trekinham i skrynšotami ekrana padčas pracy.
Mianie ŭziali paśla nieskładanaha sumoŭja, tamu što nie tak šmat pretendentaŭ byli zhodnyja pracavać z trekieram. A mnie vielmi patrebnaja była praca.
Viadoma, uražańni ad pracy nie vielmi. Naprykład, kali pierastaješ drukavać i ruchać myššu na praciahu 20 chvilin, trekinh adklučajecca i treba ŭručnuju tłumačyć, čamu nie pracavaŭ.
Skrynšoty ekrana kožnyja 5 chvilin vyhružajucca na siervier, kab mieniedžar moh pahladzieć, čym ty zajmaŭsia.
Tłumačyłasia heta nieabchodnaściu spravazdačnaści pierad zakazčykam, ale pa fakcie vylivałasia ŭ prydzirki, čamu voś tut 20 chvilin nie byŭ dastupny za dzień. Nikomu takoha nie paraju. Tamu adrazu staŭ šukać sabie štości inšaje.
U mianie byli zvyčajnyja patrabavańni da pracadaŭcaŭ: płacić hrošy, nie prymušać pracavać u vychodnyja i, u pryncypie, usio. Ja nie patrabavaŭ niejkich asablivych technałohij, niejkich nierealnych bieniefitaŭ. Hałoŭnaje, rabić svaju pracu i atrymlivać za heta hrošy.
Šukaŭ vakansii na sajtach pracy ŭ Polščy, u linkiedzinie, pisaŭ prosta HR. Razasłaŭ sumarna kala 100 reziume — ale ŭsie kanały, jak vyjaviłasia, vielmi drenna pracujuć.
Mahčymaść schadzić na sumoŭje ja atrymaŭ dziakujučy refierałkam. Mianie parekamiendavali eks-kalehi, jakija stali znajomymi i siabrami.
U adnoj kampanii paśla sumoŭja navat paśpieŭ trochi papracavać. Ale ŭ pracesie raptam vyjaviłasia, što pry apisańni vakansii mianie padmanuli.
Prapanavali miesca cimlida va ŭžo pracujučym prajekcie. Ale kali ja tudy pryjšoŭ, vyśvietliłasia, što prajekta niama, a kamanda piłuje demku. Płana nijakaha niama, tolki chaos i mieniedžar, jaki biehaje i ravie i jaki na pieršym ža sazvonie ŭsumniŭsia ŭ maim prafiesijanaliźmie i skazaŭ, što «ŭ nas tut niama work/life balance i treba vašavać 24/7». Karaciej, my ź im nie spracavalisia.
Pa druhoj refierałcy ja prajšoŭ 3 etapy sumoŭja ŭ zamiežnuju kampaniju na pazicyju .NET-raspracoŭščyka. Vielmi chacieŭ atrymać hetuju pracu. Ale ŭ vyniku pravaliŭsia na soft-skiłach.
Nie viedaju, što mahło nie zadavolić «psichołaha» z HR adździeła. Moža, ja byŭ zanadta aktyŭny i šmat žartavaŭ. Takoje narmalna ŭsprymajecca ŭ zachodnich kampanijach, ale tut mieniedžaru, vidać, štości nie spadabałasia. U vyniku mnie admovili z farmuloŭkaj «vašyja kaštoŭnaści nie supadajuć z pryniatymi ŭ našym kalektyvie».
Pavodle słoŭ Uładzisłava, jon baluča ŭspryniaŭ admovu. Akramia taho, u mai hetaha hoda jaho zvolniła i «kampanija z trekieram». «Tak jak u kampanii ja pracavaŭ pa B2B, za 2 tydni papiaredzili, što razryvajuć adnosiny i da pabačeńnia».
Što praŭda, praz paru tydniaŭ kampanija, ź jakoj Uładzisłava zvolnili, prapanavała jamu prajści hrupavoje sumoŭje — «kali šmat intervjujeraŭ i kandydataŭ, chto lepš adkaža, taho i kantrakt».
Uładzisłaŭ spačatku pahadziŭsia, ale potym admoviŭsia. «Tolki hrupavych sumoŭjaŭ mnie nie chapała».
«Indyjskija chłopcy źbirajuć danyja i źnikajuć»
U pracesie pošuku pracy Uładzisłaŭ paśpieŭ atrymać dośvied kamunikacyi z polskimi, ukrainskimi i indyjskimi HR. Pavodle jaho słoŭ, hetyja pieramovy «možna vyłučyć jak asobny vid mastactva».
— Palaki pierastajuć z taboj razmaŭlać paśla taho, jak daviedvajucca, što ŭ ciabie nie Blue Card. Paniaćcia nie maju, čamu tak, ale ŭ mianie nie było mahčymaści pracavać z Blue Card. Pieršapačatkova, kali ja pierajechaŭ u Polšču, kampanija skazała mnie aformicca pa B2B. Paźniej ja padaŭsia na DNŽ pa B2B (jak IP, na padstavie viadzieńnia haspadarčaj dziejnaści ŭ Polščy. — Zaŭv.).
Druhaja pryčyna niežadańnia palakaŭ kamunikavać z patencyjnym kandydatam — uzrovień polskaj. Ja nie znaju polskaj na razmoŭnym uzroŭni, vučyć nie było nieabchodnaści, a dla kamunikacyi maich ciapierašnich viedaŭ chapaje.
Z ukraincami taksama nie skłałasia. Adnaja ŭkrainskaja kampanija prapanavała prajści test na 40 chvilin z pytańniami nakštałt «znajdzicie 10 adroźnieńniaŭ na malunkach» — dla pravierki matematyčnaha składu rozumu abo čahości ŭ takim duchu. Jašče adnaja ŭkrainskaja kampanija prapanavała zrabić testavaje. Paśla taho, jak ja jaho zrabiŭ, mnie skazali, što raz u mianie niama DNŽ, to prabačcie, ale vy nam nie pasujecie.
Indyjskija chłopcy telefanujuć z Łondana, źbirajuć pra ciabie danyja i źnikajuć, tancujučy ŭ promniach zachodziačaha sonca, kab nikoli tabie bolš nie napisać.
Go to Belarus
Ciapier Uładzisłaŭ razam ź siamjoj rychtujecca da viartańnia ŭ Biełaruś, va ŭłasnuju kvateru ŭ Minsku. U raspracoŭščyka ŭžo jość adzin varyjant dla praciahu karjery — u rasijskaj kampanii.
— Ja prajšoŭ sumoŭje. Jašče ŭ pracesie było vidać, što tam nie ładziać adsieŭ, a hladziać na adekvatnaść i zdolnaść pracavać. Pa ŭmovach ja mahu pracavać addalena, ale tolki ź Minska.
Paprasiŭ u kampanii adterminoŭku da žniŭnia, kab zakryć usie spravy ŭ Polščy. Nie viedaju, ci dačakajucca mianie. Ale ŭsio roŭna šukać pracu ŭ Biełarusi vyhladaje bolš pierśpiektyŭna, jak mnie zdajecca.
Ja stamiŭsia rassyłać bieskarysnyja reziume. Kali rasijskaja kampanija mianie nie dačakajecca, to praciahnu šukać pracu ź Minska, a nie z Hdyni, apłačvajučy arendu kvatery (bolš za $1100) i ZUS.
Uładzisłaŭ nie zmoh sprahnazavać dalejšyja žyćciovyja i prafiesijnyja pierśpiektyvy ŭ Biełarusi, jak i ŭpłyŭ dośviedu raboty ŭ rasijskaj kampanii na jaho CV i karjerny trek, asabliva jaho zachodniuju halinu (kali raptam jana znoŭ stanie aktualnaj).
— Kali ščyra, to mnie biez roźnicy. Budzie heta jakści ŭpłyvać, chaj upłyvaje.
Jon sumniavajecca, što ŭ najbližejšaj budučyni jašče raz raspačnie sprobu rełakiejtu.
— Kali rełakiejt i adbudziecca, to heta budzie niejki ekstraardynarny ofier. Ale tak jak ja ćviaroza aceńvaju svoj uzrovień, to, chutčej za ŭsio, rełakiejtu nie budzie.
U IT ja pierajšoŭ u 25 hadoŭ, biez profilnaj adukacyi dajšoŭ da ŭzroŭniu sieńjora. Ja razumieju, što z prahramistami-ałharytmistami ciahacca mnie składana. A kampanijam pieravozić zvyčajnaha sieńjora, jak ja ŭžo zrazumieŭ, niavyhadna — ich na tym ža polskim rynku i tak chapaje.
Bort Łukašenki z-za techničnych prablem viarnuŭsia ŭ Minsk bieź jaho7
Kamientary