Niadaŭna Saŭmin skaraciŭ pieralik vidaŭ dziejnaści, jakimi možna zajmacca ŭ jakaści IP. Za apošnija hady heta ŭžo nie pieršaje ŭskładnieńnie dla IP. «Naša Niva» vyrašyła paraŭnać umovy pracy pradprymalnikaŭ u Biełarusi i Litvie.
Pavodle danych Doing Business, Litva pa vynikach 2020 hoda zajmała 11 miesca ŭ śviecie pa lohkaści viadzieńnia biznesu, Biełaruś u hetym rejtynhu na 49 miescy. Inšyja susiednija krainy zaniali nastupnyja pazicyi: Łatvija — 19, Rasija — 28, Polšča — 40, Ukraina — 64.
Anałaham biełaruskaha IP u Litvie ličycca indyvidualnaja dziejnaść pa siertyfikacie (lit. individuali veikla pagal pažymą).
Jak stać IP?
Pačać dziejnaść u jakaści indyvidualnaha pradprymalnika davoli prosta ŭ abiedźviuch krainach.
U Biełarusi za niekatorymi vyklučeńniami za adkryćcio IP daviadziecca zapłacić dziaržaŭnuju pošlinu pamieram 0,5 bazavaj (20 rubloŭ). U Litvie siertyfikat ab indyvidualnaj dziejnaści biaspłatny.
Rachunak u banku
Pačaŭšy kamiercyjnuju dziejnaść, u abiedźviuch krainach spatrebicca mieć dla jaje bankaŭski rachunak.
U Biełarusi pradprymalnik musić zaklučyć damovu z bankam na raźlikova-kasavaje absłuhoŭvańnie mienavita jak IP.
U Litvie dastatkova prosta adkryć dadatkovy rachunak ad svajho imia, jaki budzie vykarystoŭvacca dla indyvidualnaj dziejnaści. Nijakich dadatkovych damoŭ i vizitaŭ u bank dla hetaha nie spatrebicca. Dastatkova zajści ŭ mabilny dadatak i ŭ niekalki klikaŭ adkryć dadatkovy rachunak.
Padatki i inšyja abaviazkovyja adličeńni
Biełaruski indyvidualny pradprymalnik płacić padatki zhodna z ahulnaj sistemaj padatkaabkładańnia abo apłačvaje adziny padatak, kali abrany vid dziejnaści dazvalaje heta zrabić.
Standartnaja staŭka padachodnaha padatku dla IP u Biełarusi — 20%.
Kali pradprymalnik nie viadzie ŭlik vydatkaŭ, to jon moža aŭtamatyčna śpisvać na vydatki 20% ad sumy. Inšymi słovami, padatkam abkładajecca tolki 80% ad zarobku.
Aproč padatkaŭ IP musić rabić adličeńni ŭ FSAN u pamiery 35% ad minimalnaj zarabotnaj płaty, to-bok 220 rubloŭ u miesiac.
U Litvie pamier padachodnaha padatku dla IP maje prahresiŭnuju škału i ŭ zaležnaści ad zarobku vahajecca ad 5 da 15%. Jak i ŭ Biełarusi, litoŭski pradprymalnik musić rabić adličeńni ŭ SODRA (anałah našaha FSAN). Minimalnaja suma 64,5 jeŭra (kala 220 rubleŭ) u miesiac, kali indyvidualnaja dziejnaść źjaŭlajecca adzinaj krynicaj dachodu.
Sačycie za ličbami
Kab paraŭnać vynikovuju padatkovuju nahruzku, voźmiem dla prykładu ŭmoŭnaha IP, jakija akazvaje pasłuhi i kožny miesiac atrymlivaje brudnymi pa 1500 jeŭra (5150 rubloŭ). Za hod nabiahaje 18 tysiač jeŭra, abo kala 62 tysiač rubloŭ pa biahučym kursie.
Z ulikam usich abaviazkovych vydatkaŭ, biełaruski pradprymalnik addaść u kaznu z 18 tysiač jeŭra 3650 jeŭra, a jaho litoŭski kaleha — 2840 jeŭra.
Takija ličby atrymlivajucca, kali abodva nie buduć vieści ŭlik vydatkaŭ, a buduć pa zmoŭčvańni śpisvać 20% na vydatki ŭ Biełarusi i 30% na vydatki ŭ Litvie.
Niuansy pa pracy z PDV
Biełaruskija indyvidualnyja pradprymalniki z 1 studzienia 2024 hoda stracili mahčymaść pracavać z PDV, što značna skaraciła mahčymaści dla viadzieńnia biznesu.
Litoŭskija IP mohuć pracavać jak z PDV, tak i biez. Drobnyja pradprymalniki, čyje abaroty za prodaž tavaraŭ i pasłuh ciaham hoda nie pieravyšajuć 45 tysiač jeŭra (3750 jeŭra ŭ miesiac), mohuć samastojna vybirać, chočuć jany pracavać z PDV abo nie.
Kali suma pieravyšaje adznaku ŭ 45 tysiač, abo suma tavaraŭ nabytych u inšych krainach ES pieravyšaje 14 tysiač jeŭra «nieta» (biez uliku PDV apłačanaha ŭ inšaj krainie), litoŭski pradprymalnik u abaviazkovym paradku musić stać płacielščykam PDV.
Kolkaść supracoŭnikaŭ i inšyja abmiežavańni
Biełaruski ipešnik moža mieć najomnych supracoŭnikaŭ, ale nie bolš za try čałavieki.
Litoŭski IP nie maje abmiežavańniaŭ pa kolkaści pracaŭładkavanych asob.
Aproč hetaha, pačynajučy z hetaha hoda biełaruskim IP skaracili kolkaść vidaŭ dziejnaści, jakimi jany mohuć zajmacca.
Novy pieralik vidaŭ dziejnaści dla pradprymalnikaŭ nabudzie moc z 1 kastryčnika 2024 hoda. Pa vidach dziejnaści, što nie ŭvajšli ŭ hety pieralik, spyniać rehistracyju novych IP.
Što da dziejnych IP, jakija nie trapili ŭ śpis, to im dazvolać pracavać da 31 śniežnia 2025-ha. Za hety čas im treba budzie transfarmavacca ŭ jurydyčnuju asobu abo spynić dziejnaść.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana12
Kamientary