Biełarusam stanie składaniej jechać na zarobki ŭ Litvu. Padrabiaznaści
Paśla taho, jak Litva z 1 lipienia źmianiła paradak pryjomu na pracu inšaziemcaŭ, biełarusam, jakija tolki źbirajucca jechać pracavać u hetuju krainu, zrabić heta budzie značna składaniej. Voś čamu.
Što źmianiłasia
Pačynajučy z 1 lipienia, za niekatorymi vyklučeńniami, inšaziemcy zmohuć pracaŭładkavacca ŭ Litvie tolki paśla atrymańnia časovaha DNŽ.
Dahetul zamiežniki z trecich krain mahli pačać pracavać bieź litoŭskaha DNŽ. Hałoŭnaje było lehalna nachodzicca na terytoryi krainy. Dla hetaha dastatkova było mieć vizu abo DNŽ inšaj krainy ES. Prystupiŭšy adrazu da pracy, zamiežnik paralelna padavaŭsia na atrymańnie DNŽ na padstavie pracy.
Zamiežniki, jakija pačali pracavać u Litvie da ŭstupleńnia ŭ siłu papravak da zakona, zmohuć pracavać da zakančeńnia terminu lehalnaha znachodžańnia abo da taho času, pakul jany nie nabuduć prava na pracu na inšych zakonnych padstavach.
To-bok biełarusam, jakija da 1 lipienia pryjechali i pracaŭładkavalisia ŭ Litvie, naprykład, majučy polskuju nacyjanalnuju vizu, možna budzie praciahvać pracavać dalej, pakul dazvalaje termin dziejańnia vizy. Departamient mihracyi Litvy raić padavać zajavu na atrymańnie DNŽ minimum za 4 miesiacy dy skančeńnia terminu dziejnych dakumientaŭ.
Za hety čas hramadzianinu Biełarusi treba paśpieć padacca i atrymać DNŽ, kab mieć mahčymaść praciahvać pracavać u Litvie dalej.
Tym ža, chto tolki źbirajecca jechać na zarobki ŭ Litvu, prystupić da pracy adrazu, jak heta było raniej, nie atrymajecca.
Ale heta nie aznačaje, što ciapier šlach u Litvu dla pracoŭnych mihrantaŭ zakryty. Prosta jon stanovicca bolš praciahły pa časie. Biełarusy mohuć znajści ŭ Litvie pracu i pryjechać tudy, naprykład, pa polskaj vizie, padać dakumienty na DNŽ i tolki paśla jaho atrymańnia pačynać pracavać.
Što pa terminach?
Standartny termin vydačy pieršaha DNŽ na padstavie pracy — 3 miesiacy. Košt 160 jeŭra. Kali rabić paskorana, to litoŭski DNŽ možna atrymać praz 1,5 miesiaca. Ale za paskareńnie daviadziecca płacić u dva razy bolš, to-bok 320 jeŭra.
Pry hetym, daloka nie ŭsim zamiežnikam daviadziecca prachodzić taki samy šlach, jak biełarusam.
Reč u tym, što z 2023 hoda Litva vydaje časovyja DNŽ praź vizavyja centry VFS Global u bolš, čym 30 krainach śvietu. Siarod takich krain jość Armienija, Tadžykistan, Małdova, Uźbiekistan, ale niama Biełarusi i Rasii.
Biełarusy pakul u lidarach
Vierahodna, što praz novyja składanaści papularnaść litoŭskaha kirunku dla pracy siarod biełarusaŭ spadzie. Pa vynikach pieršaha kvartała 2024 hoda, biełarusy zajmali pieršaje miesca ŭ Litvie siarod novych pracoŭnych mihrantaŭ — 28% ad ahulnaj kolkaści. Pa vynikach 2023 hoda biełarusy składali 58%. Na druhim miescy siarod pracoŭnych mihrantaŭ, zhodna sa śviežymi danymi, iduć hramadzianie Uźbiekistana — 24%. Na trecim Kyrhyzstana — 12%.
Usiaho, pavodle źviestak na 1 červienia 2024 hoda, u Litvie pracavali 137 400 hramadzian trecich krain: 48 600 biełarusaŭ, 44 800 ukraincaŭ, 7400 uźbiekaŭ, 5800 kyrhyzaŭ i 5200 tadžykaŭ.
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu1
Kamientary