«Lidarami pa admovach zastajucca Hrecyja i Polšča». Dzie ciapier biełarusam praściej za ŭsio atrymać šenhienskuju vizu?

Jakija krainy ciapier nie vydajuć šenhienskija vizy biełarusam?

Litva, Čechija, Estonija i Łatvija prypynili vydaču turystyčnych viz dla biełarusaŭ jašče ŭ 2022 hodzie. Hetyja krainy prymajuć zajaŭki tolki ŭ vyklučnych vypadkach. Łatvija razhladaje haściavyja vizy.

A voś jakija vydajuć «šenhien»

Atrymać turystyčny «šenhien» možna ŭ Ispanii, Vienhryi, Italii, Francyi, Hrecyi, Hiermanii, Bałharyi, Charvatyi, Rumynii, Polščy, Niderłandaŭ, Bielhii (praz konsulstva Hiermanii) i Šviejcaryi (praz konsulstva Vienhryi).

Samyja papularnyja krainy pa vydačy viz — Italija, Hiermanija i Francyja

Jak i raniej, najlepšymi krainami pa statystycy vydačy bolš praciahłych viz zastajucca Italija, Hiermanija i Francyja. Na ich prypadaje bolš za 80% zapytaŭ na «šenhien».

Praŭda, zapisacca tudy nie tak prosta. U Italiju, naprykład, možna zapisacca pa žyvoj čarzie — u toj samy sšytak na ŭvachodzie ŭ vizavy centr. Tam užo zapisałasia bolš za 10 000 čałaviek, a čas čakańnia na padaču składaje kala 4 miesiacaŭ. Zapis praz sšytak zastajecca papularnym, bo inšych varyjantaŭ niama.

Padavać dakumienty ŭ Italiju rekamienduju tym, u kaho dobraja vizavaja historyja: jość šaniec atrymać bolš praciahły «šenhien». Vialikaj pieravahaj pry zapycie vizy na hod i bolš budzie dokaz, što raniej vy ŭžo byvali ŭ Italii. Viedaju, što niekatoryja navat fatahrafii z padarožžaŭ prymacoŭvajuć da dakumientaŭ.

Dobraja vizavaja historyja — heta najaŭnaść niekalkich turystyčnych i inšych šenhienskich viz, atrymanych raniej. Siudy ž možna adnieści i ŭjezdy ŭ krainu padačy. U jakaści dokazu, što vy tam užo byli, možna prykłaści čeki, broni, avijabilety.

Francyja čaściej za ŭsio stavić vizy na try ci šeść miesiacaŭ. Pry dobraj vizavaj historyi možna raźličvać i na bolšy termin.

Hiermanija pryznačaje datu padačy praz vosiem miesiacaŭ paśla adpraŭki zajaŭki na aficyjnym sajcie konsulstva. A sama padača moža być praz hod-paŭtara. Ciapier jość vypadki, kali pryznačajuć datu i za dva miesiacy, ale heta chutčej vyklučeńnie, čym praviła.

Vienhryja i Ispanija mohuć vydać «šenhien» jak na doŭhi termin, tak i pad pajezdku

Ispanija taksama praciahvaje vydavać «šenhien» biełarusam. Słoty vystaŭlajuć na sajcie vizavaha centra niekalki razoŭ na miesiac. Dakumienty razhladajucca 45 dzion, tamu padavacca treba zahadzia. Vizy vydajuć u asnoŭnym pad pajezdku abo na paru miesiacaŭ.

Vienhryja prymaje zajaŭki jak ad indyvidualnych turystaŭ, tak i pad tur. Statystyka terminaŭ zusim randomnaja. Navat z dobraj vizavaj historyjaj možna atrymać vizu jak na doŭhi termin, tak i pad pajezdku. Bolš za toje, Vienhryja patrabuje padavać paćviardžeńnie apłaty hatela, admianiajučy jakuju, vy niesiacie ryzyki: kali paśla vydačy vizy konsulstva pravieryć i daviedajecca pra admienu, vizu mohuć anulavać.

Pa našaj statystycy, admovy ŭ Vienhryi składajuć usiaho 2-3%. Pryčyny dla «nie» davoli standartnyja: nie abhruntavanaja meta znachodžańnia albo niedastatkova hrošaj, kab znachodzicca ŭ krainie.

Lidarami pa admovach pakul zastajucca Hrecyja i Polšča

Pa-za siezonam statystyka admoŭ u Hrecyi vysokaja. Pryčym admovu možna atrymać, navat kali na rukach jość kvitki i broń hatela. Ciapier, u letni siezon, pa našych nazirańniach, statystyka vydačy trochi palepšyłasia. Važna dać dobruju vypisku z rachunku i pakazać stabilny dachod.

Važna: kali niejkaja inšaja kraina ŭ vizie vam užo admoviła, paśla hetaha ŭ Hrecyju lepš nie padavacca — chutčej za ŭsio, jana taksama admović.

«Dobraja vypiska z rachunku» dla kožnaj krainy svaja. Ja zaŭsiody rekamienduju nie mienš za 2000-3000 jeŭra na čałavieka (možna ŭ luboj valucie ŭ ekvivalencie). Ciapier šmatlikija krainy stroha staviacca da finansavych harantyj, tamu čym bolš pakažacie, tym lepš.

A kab pakazać stabilny dachod, treba padać daviedku ab zarobku za apošnija 3-6 miesiacaŭ (u zaležnaści ad patrabavańniaŭ krainy padačy). Naprykład, Hrecyja niedalublivaje biespracoŭnych, a daviedki z zarobkam mienš za 1500 rub. jaje biantežać.

Kali vy pracujecie na jurydyčnuju asobu ŭ Biełarusi, to kantrakt abo pracoŭnuju damovu dadatkova prykładać nie treba. Kali ž aformlenyja jak IP, to da dakumientaŭ treba dadać kopiju paśviedčańnia ab rehistracyi, vypisku z padatkovaj i vypisku z banka ab relevantnym astatku na rachunku.

Polšča taksama prymaje dakumienty na turystyčnyja vizy. Praŭda, praciahły «šenhien» tut redkaść. Čaściej za ŭsio vydajuć vizu stroha pad pajezdku. Bolš za toje, Polšča patrabuje padać paćviardžeńnie apłačanaj broni hatela i maršrutny list (heta značyć płan pajezdki, dzie mienavita vy źbirajeciesia pabyvać).

Bałharyja, Charvatyja i Rumynija — novyja krainy dla padačy

Ź niadaŭnich časoŭ Bałharyja, Charvatyja i Rumynija taksama pačali prymać dakumienty na turystyčnyja šenhienskija vizy. Pa Charvatyi ŭ nas užo skłałasia bolš-mienš vyraznaja karcina pa statystycy vydačy: čaściej za ŭsio heta vizy pad pajezdku abo na miesiac.

Za Bałharyjaj i Rumynijaj pakul nazirajem. Pieršyja vydačy havorać pra toje, što čakać vizaŭ na doŭhi termin ad hetych krain nie varta. Ale situacyja moža źmianicca ŭ lepšy bok.

• 5
• 0
• 3
• 2
• 4
• 13
• 12
• 0