Pratesty suprać reformaŭ prezidenta Arhienciny Mileja pieraraśli ŭ sutyknieńni
U pres-słužbie Mileja zajavili, što pratestoŭcy sprabavali ździejśnić pieravarot i parušyć pracu Kanhresa.
Palicyja ŭ Buenas-Ajresie ŭžyła ślozaciečny haz i vadamioty dla razhonu akcyi pratestu suprać reformaŭ prezidenta Arhienciny Chaŭjera Mileja la budynka Nacyjanalnaha kanhresa, dzie abmiarkoŭvalisia źmieny ŭ zakanadaŭstva, piša Bi-bi-si.
Demanstranty, jakija śćviardžajuć, što ad reformaŭ pacierpiać miljony arhiencincaŭ, kidali ŭ palicejskich butelki z zapalnaj sumieśsiu i kamiani, a taksama padpalili dva aŭtamabili. Niekalki ŭdzielnikaŭ akcyi atrymali ranieńni.
Paciarpieli taksama prynamsi dzieviać palicejskich, paviedamili ŭ Ministerstvie biaśpieki Arhienciny. 10 čałaviek byli aryštavanyja.
Pakiet reformaŭ, prapanavany Chaŭjeram Milejem dla ažyŭleńnia arhiencinskaj ekanomiki, uklučaje abviaščeńnie nadzvyčajnaha ekanamičnaha stanovišča, skaračeńnie piensij i ŭščamleńnie pracoŭnych pravoŭ.
Suprać hetych mier vystupajuć levyja partyi, prafsajuzy i hramadskija arhanizacyi, jakija arhanizavali demanstracyju.
U pres-słužbie Mileja zajavili, što pratestoŭcy sprabavali ździejśnić pieravarot i parušyć pracu Kanhresa, a siły biaśpieki raspačali «dziejańni dla padaŭleńnia terarystyčnych hrup».
Pieršapačatkovy pakiet reformaŭ, jaki składajecca z 600 ź lišnim artykułaŭ, byŭ nakiravany ŭ parłamient u kancy minułaha hoda. Pad ciskam apazicyi jon byŭ adklikany i ŭniesieny paŭtorna ź istotnymi źmienami (u im zastałosia 238 artykułaŭ).
Pałata deputataŭ Kanhresu ŭchvaliła novy prajekt u krasaviku. U sieradu jaho abmiarkoŭvaŭ Sienat.
Vystupajučy ŭ vierchniaj pałacie, apazicyjnyja zakanadaŭcy zajavili, što pryniaćcie pakieta reformaŭ adkinie krainu na dziesiacihodździ nazad.
«My nie možam pavieryć, što ŭ Arhiencinie abmiarkoŭvajecca zakon, jaki adkinie nas na 100 hadoŭ tamu», — skazaŭ 55-hadovy advakat Fabia Nuńjes, adzin z udzielnikaŭ akcyi pratestu.
U vyniku poźnim viečaram Sienat u cełym uchvaliŭ prajekt reformaŭ, u čaćvier abmierkavańni praciahnucca.
Paśla adabreńnia Sienatam dakumient pavinien viarnucca ŭ nižniuju pałatu dla finalnaha zaćviardžeńnia.
Chto pavinien być prezidentam Biełarusi ŭ pierachodny pieryjad? Razvažajuć viadomyja biełarusy9
Kamientary
Lepiej jaje nia ŭžyvać, bo rozyja ludzi pad adnymi i tymi nazvami razumiejuć roznaje.
Spadar Milej - klasyčny liberał. Supraćstajać jamu sacyjalisty.