«Małankami prabić svabody darohu». Dzianis Ivašyn u niavoli sustrakaje 45 hadoŭ
Palitviazień Dzianis Ivašyn čaćviorty raz sustrakaje dzień narodzinaŭ za kratami.
6 červienia žurnalistu Dzianisu Ivašynu, jaki adbyvaje pakarańnie ŭ žodzinskaj turmie, spoŭniłasia 45 hadoŭ. Napiaredadni svajaki i siabry adpravili Dzianisu vinšavańni, ale ŭ ich niama ŭpeŭnienaści, što palitviazień atrymaŭ usie listy i paštoŭki svoječasova, bo ad jaho ŭžo dva tydni niama źviestak, piša Radyjo Svaboda.
«Nasamreč niama ničoha novaha ŭžo dva tydni. Viedajem, što častku vinšavańniaŭ jon atrymaŭ raniej, ale ciapier ad jaho — cišynia. Nie padobna heta na našaha vajara. Vielmi chvalujemsia», — paviedamiła žonka palitviaźnia Volha.
Volha Ivašyna raźmiaściła ŭ Facebook vierš svajho muža, jaki niadaŭna atrymała. Jon nazyvajecca «Maładaja navalnica». Vierš, pryśviečany pieršym navalnicam, zakančvajecca radkami pra svabodu.
…Końnica kryłataja hrozna hrymić,
Napaŭniaje dušu pieršarodnaju siłaju.
Prahaj da voli, imknieńniem žyć,
Uźnieścisia ŭ nieba svaimi kryłami.
Moc stychii ŭ sabie adčuć,
Małankami prabić svabody darohu.
Pieramožnyja vokličy narešcie pačuć
I stać bližej da Boha.
Žurnalist Dzianis Ivašyn asudžany na 13 hadoŭ i 1 miesiac nibyta za zdradu dziaržavie (artykuł 356 KK) i niezakonny zbor i raspaŭsiud źviestak ab pryvatnym žyćci (artykuł 179 KK).
Da aryštu ŭ sakaviku 2021 hoda Dzianis Ivašyn šmat daśledavaŭ upłyŭ «russkoho mira» na biełaruskich siłavikoŭ, pisaŭ pra abaronu Kurapataŭ i ŭładkavańnie ŭkrainskich bierkutaŭcaŭ u siłavyja struktury Biełarusi.
Paśla niekalkich miesiacaŭ, praviedzienych u mahiloŭskaj kałonii, u červieni 2023 hoda Dzianisa Ivašyna pieraviali na turemny režym u žodzinskuju turmu №8.
Apošnim časam Dzianisa Ivašyna trymali ŭ kamiery, raźličanaj na niekalki čałaviek. Svajakam žurnalista nieviadoma, kolki ŭ jaho sukamiernikaŭ. Pavodle svajakoŭ, Dzianis volny čas bavić za čytańniem knih.
«Čytaje knihi pa fiłasofii, štości z palitałohii, kłasiku i sučasnuju litaraturu. Nu i pieryjadyčnyja vydańni sabie vypisvaje, kaniešnie, kab być u kursie padziejaŭ», — paviedamiła Volha Ivašyna.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary