Miljanier Baskin pajšoŭ asprečvać sankcyi. Mahčyma, u jaho atrymajecca
U biznes-kołach kažuć, što heta ŭžo druhaja sproba Jaŭhiena Baskina pajści ŭ sud.
Na minułym tydni biełaruski resurs Banki24 sa spasyłkaj na nienazvanyja rasijskija miedyja paviedamiŭ pra toje, što biznesmien Jaŭhien Baskin padaŭ u sud Antarya isk suprać ministra zamiežnych spravaŭ Kanady. Kančatkovaj metaj źjaŭlajecca admiena sankcyj Kanady suprać Baskina, pad jakija jon trapiŭ u 2022-m.
Banki24 paviedamlali, što sprava zarehistravana pad numaram №T-1181-24 — Yauheni Rafailovich Baskin v. Minister of Foreign Affairs et al.
Nam nie ŭdałosia znajści pieršakrynicu hetaj infarmacyi, na jakuju spasyłalisia Banki24. Tym nie mienš, hetaja infarmacyja «chutčej za ŭsio praŭdzivaja», kažuć «Našaj Nivie» pradstaŭniki minskich dziełavych kołaŭ.
Našy surazmoŭcy kažuć, što, pa ich infarmacyi, jurysty Baskina sapraŭdy prynamsi niejki čas tamu rychtavali pazoŭ u sud.
Minskija kamiersanty dadajuć, što nibyta heta ŭžo druhaja sproba Baskina pajści ŭ sud, a papiaredniaja nie atrymałasia, tamu što pieršapačatkova naniatyja kanadskija advakaty bolš za hod «daili» biełaruskaha biznesmiena, faktyčna navat nie danosiačy dakumienty da suda.
Jaŭhien Baskin — bujny mahiloŭski biznesmien, čyju historyju «Naša Niva» padrabiazna apisvała ŭ 2022 hodzie, kali jon trapiŭ u kanadski sankcyjny śpis.
Čytajcie: «Nie svołač». Jak multymiljanier Baskin niečakana trapiŭ u sankcyjnyja śpisy. Daśje
U historyi Biełarusi ŭžo byli vypadki, kali nakładzienyja zachodnimi krainami sankcyi potym zdymalisia abo prypyniali dziejańnie. Naprykład, sankcyi ź siabie ŭdałosia źniać biznesoŭcam Juryju Čyžu i Uładzimiru Piefcijevu. Baskin vymušany budzie dziejničać u bolš składany čas.
«Naša Niva» paprasiła acanić šansy kamiersanta viadučych biełaruskich ekanamistaŭ Lva Lvoŭskaha i Dźmitryja Kruka.
«Sam precedent absalutna narmalny. Sankcyi — heta mižnarodny palityčny instrumient, jaki ŭvodzicca nie dla taho, kab prosta być, a kab zaachvočvać abjekt da źmieny pavodzinaŭ: spynić parušeńni pravoŭ čałavieka, dapamohu režymu i vajennaj mašynie. Vynikam sankcyj pavinna być źmiena pavodzinaŭ, adpaviedna, pavinien być i miechanizm adkručvańnia sankcyj.
U vypadku Biełarusi, asabliva paśla pačatku vajny, mnohija ekanamičnyja sankcyi ŭvodzilisia paskoranym paradkam, biez prazrystaha i pierakanaŭčaha tłumačeńnia, što kankretna ich abjekt parušyŭ i što ad jaho patrabujecca.
Tamu heta narmalna, što ŭ čałavieka ci kampanii pavinna być prava asprečyć takoje rašeńnie pa sabie, kali jany da taho ž zmohuć dakazać, što abmiežavańni byli ŭviedzieny vypadkova ci biez naležnaj arhumientacyi. Abo prynamsi daviedacca ŭ sudzie, što treba rabić dla ich admieny», — skazaŭ akademičny dyrektar BEROC Leŭ Lvoŭski.
Dekan ekanamičnaha fakulteta EHU, ekanamist BEROC Dźmitryj Kruk ličyć, što kiejs Baskina vychodzić dalej za intaresy adnaho čałavieka i maje patencyjnaje značeńnie dla ŭsiaho pryvatnaha biznesu, jaki isnuje ŭ Biełarusi.
«Uciamnaha publičnaha abhruntavańnia ŭklučeńnia Baskina ŭ sankcyjny śpis Kanady nie było, i žadańnie iści ŭ sud uskosna ŭkazvaje na toje, što biznesmien nie bačyć kampramietujučych faktaŭ, jakija b upłyvali na jaho reputacyju, uspłyvi jany ŭ hetym sudzie. Kali ž jany jość, to sud u Kanadzie — najlepšaje miesca, kab jany trapili ŭ publičnuju prastoru i stali ahulnaviadomymi», — ličyć Dźmitryj Kruk.
«Tut važna kazać i pra šyrejšyja rečy — hety praces uzdymie nie tolki pytańnie, važnaje dla asobnaha biznesu i jaho ŭładalnika, ale i prablemy pryvatnaha biznesu ŭsioj krainy.
Kanada abhruntoŭvała svoj pakiet sankcyj (2022) tym, što biełaruski režym staŭ pahrozaj miru i biaśpiecy, i tamu sankcyi pašyrajucca i na asacyjavanych z režymam asobaŭ. Bolšaść z uklučanych u śpis takuju asacyjacyju (farmalnuju ci niefarmalnuju) mieli, i tamu ich proźviščy nie vyklikali ździŭleńnia.
U toj ža čas jak Baskina, vierahodna, asacyjavali z režymam pieršy raz, i jahonaje ŭklučeńnie stała vialikaj niespadziavankaj dla ekanamistaŭ i biełaruskich ludziej kamiercyi.
Heta nie supadała z acenkaj hetaj fihury ŭnutry Biełarusi i siarod zamiežnych partnioraŭ: u našych biznes-kołach jon zaŭždy ličyŭsia adnym z samych jaskravych prykładaŭ self-made man, jaki stvaryŭ i raźviŭ svoj biznes da vialikich pamieraŭ sam, nie prymajučy ŭdziełu ŭ palitycy asabista ci na ŭzroŭni kampanij. Aktyŭna, u toj ža čas, supracoŭničaŭ ź jeŭrapiejskimi kampanijami i bankami.
Jak mnie viadoma, u biznes-kołach skłałasia dumka, što ŭklučeńnie Baskina było ci prosta pamyłkaj (jak varyjant — praz suhučnaść z proźviščam Dźmitryja Baskava — «NN»), ci vyrašalnym faktaram staŭ jahony ŭdzieł u Radzie pa raźvićci pradprymalnictva.
Na moj pohlad, pasada ŭ Radzie nie źjaŭlajecca kryteryjem, pa jakim možna było b kazać ab asablivych adnosinach z režymam ci roli ŭ im.
Tut uvohule ŭspłyvajuć vielmi tonkija materyi: što ličyć asablivaj rollu biznesu ŭ sučasnaj Biełarusi? Jakija kryteryi takoj asablivaj roli?
Faktyčna, isnujučy ŭ Biełarusi, luby pryvatny biznes nie moža paźbiehnuć niejkich formaŭ adnosin z uładami, ale heta aŭtamatyčna nie kaža pra ich asablivyja stasunki z režymam.
Ličyć tak — heta vielmi niebiaśpiečnaja pazicyja. Kali jaje prytrymlivacca, to značnuju častku ŭsiaho biełaruskaha pryvatnaha biznesu prosta pa fakcie pamieru ŭ kantekście biahučaha histaryčnaha času treba pierastać ličyć pryvatnym biznesam — što pahłyblaje taksičnaść usich biełaruskich kampanij.
Z adnaho boku, sankcyi zachodnich krainaŭ nakiravanyja na režym, ale pabočnyja efiekty ad ich zakranajuć i pryvatny biznes, jaki stanovicca zakładnikam situacyi i niasie na sabie adčuvalnuju častku ciažaru ad sankcyj.
U toj ža momant małyja, siarednija, vialikija kampanii va ŭmovach naroščvańnia ŭpłyvu dziaržavy praciahvajuć hienieravać vielmi važnyja efiekty dla hramadstva: praz svaju dziejnaść i sučasnuju karparatyŭnuju kulturu jany robiać ludziej (jakija ŭ ich pracujuć, majuć ź imi inšyja stasunki) bolš niezaležnymi, samastojnymi i aryjentavanymi na raźvićcio. Hetyja jakaści lažać u padmurku źmienaŭ u biełaruskim hramadstvie za apošnija hady.
Tamu, viartajučysia da kiejsa Baskina, jon nasamreč šyrejšy za prablemu adnaho biznesmiena. Vielmi važna było b vyrašyć takoha kštałtu supiarečnaści i vypracavać prazrystyja, publičnyja kryteryi, jakija vyznačajuć, jakija biznesy i biznesmieny i pa jakoj pryčynie mohuć traplać pad sankcyi.
Heta było b vielmi karysna i dla biełaruskaha biznesu ŭ krainie, i dla zachodnich krainaŭ i biznesaŭ, jakija supracoŭničajuć ź Biełaruśsiu», — skazaŭ Dźmitryj Kruk.
Na jakuju datu pryznačany sud, pakul nieviadoma.
Jaŭhienu Baskinu 57 hod, jon rodam z Mahilova, maje asnoŭnyja aktyvy ŭ śfiery vyroščvańnia žyvioły i pierapracoŭki miasa. Najbolš viadomy brend — «Piatrucha», hałoŭnaja kampanija nazyvajecca «Siervaluks». U «Siervaluksie» pracuje kala 11 tysiač čałaviek.
«Siervaluksu» naležać brojlernyja fabryki ŭ Mahilovie i Smalavičach, fiermy i cechi ŭ Mahiloŭskaj i Minskaj abłaściach.
Taksama Baskin vioŭ biznes va Ukrainie — tam u jaho śvinafierma, sumiesnaje pradpryjemstva z hałandcami ŭ Vińnickaj vobłaści. Los hetaha aktyvu nieviadomy.
Jakimi buduć vybary 2025 hoda? Razvažajuć Viačorka, Łatuška i Šrajbman20
Kamientary