«Daviałosia ŭ Biełaruś jechać aŭtobusam». U Polščy ašukancy kraduć numarnyja znaki ź biełaruskich aŭto
Biełarusy, jakija žyvuć u Polščy, usio čaściej robiacca achviarami aŭtamabilnych machlaroŭ: z mašyn źnikajuć biełaruskija numarnyja znaki, a potym ich macujuć na aŭtamabili, na jakich ździajśniajuć złačynstvy. Most sabraŭ historyi biełarusaŭ i daviedaŭsia, jak rekamiendujuć dziejničać u padobnaj situacyi.
Na majskija vychadnyja Maksim (imia źmieniena ŭ metach biaśpieki) vyjaviŭ, što z aŭtamabila jahonaj maci źniali dva numarnyja znaki. Małady čałaviek raskazaŭ Most, što incydent adbyŭsia ŭ varšaŭskim rajonie Praha-Poŭdzień. Zapiski z prapanovaj vykupić numary złačyncy nie pakinuli.
Mašyna była pryparkavanaja na vulicy, pablizu nie było kamier vonkavaha nazirańnia. Mama Maksima źviarnułasia ŭ palicyju. Tam pryniali zajavu, vydali adpaviednuju daviedku i rekamiendavali ź joj źviarnucca ŭ biełaruskaje konsulstva.
«Miarkujučy z taho, što pišuć u čatach, u konsulstvie nijak nie dapamahajuć», — skieptyčna nastrojeny małady čałaviek, ale ŭsio ž taki maje namier tudy źviarnucca.
Zvyčajna biełarusam, jakija traplajuć u takija situacyi, davodzicca z daviedkaj z palicyi viartacca ŭ Biełaruś, kab zamianić numary.
«Skazali rychtavacca da dopytu, jak u nas tak atrymałasia»
U emihranckich čatach i supołkach Most atrymałasia znajści niamała padobnych historyj.
Udzielnik abmierkavańnia pad nikam Misha trapiŭ u niepryjemnuju situacyju «pasiarod dnia». U maładoha čałavieka nie tolki skrali numary, ale i papsavali jamu aŭtamabil.
«Parezali čatyry koły, padrapali bok i skrali numary», — napisaŭ biełarus.
Jon padazraje, što pryčynaj incydentu mahła stać BČB-nalepka na aŭto.
Kryścina taksama apynułasia ŭ padobnaj situacyi. Jana źviarnułasia ŭ konsulstva, ale prablemu daviałosia vyrašać samastojna.
«U konsulstvie prosta adkazali, što heta nie ŭ ich kampietencyi. Pryjšłosia ŭ Biełaruś jechać aŭtobusam i tam užo atrymlivać novyja numary», — napisała ŭ čacie biełaruska.
Nie dapamahli ŭ konsulstvie i karystalnicy pad nikam Ola.
«Nam adkazali, što ničym dapamahčy nie mohuć. Skazali hnać mašynu z daviedkaj z palicyi ŭ Biełaruś pa tym pamiežnym pierachodzie, pa jakim vyjazdžali, i rychtavacca da dopytu, jak u nas tak atrymałasia», — padzialiłasia jana.
Navošta polskim ašukancam biełaruskija numary
Čaściakom ašukancy kraduć numarnyja znaki dla taho, kab potym pastavić ich na svoj aŭtamabil i ździejśnić na im kradziež. Naprykład, zapravicca na AZS palivam, nie apłacić jaho i schavacca. U takim vypadku palicyi składana znajści złodzieja.
Akramia taho, u telehram-čacie biełarusaŭ u Polščy niekatoryja ŭdzielniki papiaredžvajuć: pastaviŭšy skradzienyja numary na svaje aŭto, ašukancy mohuć pakidać mašyny na płatnych parkoŭkach. U takim vypadku ŭładalnikam pryjdziecca płacić vialikija sumy za stajanku.
U niekatorych vypadkach ašukancy dziejničajuć bolš vytančana. Ananimny ŭdzielnik telehram-čata «Biełarusy Varšavy» sutyknuŭsia z šantažom.
«Skrali biełaruskija numary ŭ Varšavie, vymahajuć hrošy. Napisali zajavu ŭ palicyju — skazali iści ŭ ambasadu dalej raźbiracca».
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary