Biełaruski miljanier Juryj Mielničak prahnazuje kryzis u IT i dehłabalizacyju suśvietnaj ekanomiki
Adzin z samych paśpiachovych biełaruskich IT-biznesmienaŭ miljanier Juryj Mielničak u novym vypusku prahramy «Noč z Čałym» vykazaŭ svajo staŭleńnie da PVT, acaniŭ stanovišča ŭ IT-industryi i sprahnazavaŭ dalejšaje raźvićcio suśvietnaj ekanomiki.
PVT — heta dobra
Juryj Mielničak ličyć, što pieršapačatkova Park vysokich technałohij byŭ aryjentavany na vialikija aŭtsortynhavyja kampanii, u jakich stabilnyja biznes-madeli. Biznesmien zhadvaje, što z prychodam u Park Usievałada Jančeŭskaha było praviedziena apytańnie vialikaj kolkaści ludziej ź IT-industryi, i PVT «adčyniŭ svaje dźviery dla startapaŭ».
Biźniesmien zhadvaje, što akramia padatkovych ilhot, u PVT byli i inšyja asablivaści viadzieńnia biznesu. Naprykład, možna było składać damovy na anhlijskaj movie.
Mielničak adznačaje, što PVT pieršapačatkova byŭ aryjentavany na kampanii, jakija pracujuć na ekspart. Adnosna zaŭvah pra toje, što Park nie akazaŭ upłyvu na raźvićcio tradycyjnych halin ajčynnaj pramysłovaści, jak heta praduhledžvaŭ ukaz ab jaho stvareńni, biznesmien zaŭvažaje, što «heta pytańnie znachodzicca niedzie pamiž Administracyjaj prezidenta i PVT».
«Ja libiertaryjaniec. Liču, što [kali] VUP idzie, padatki płaciacca, ludzi atrymlivajuć zarobki, raście ŭnutranaje spažyvańnie, to heta dobra», — adznačaje Mielničak i nahadvaje, što sam Čały źviazvaŭ rost kolkaści baraŭ z kraftavym pivam i barbieršopaŭ z raźvićciom IT-industryi.
Što rabić biełarusam?
Na pytańnie, jak biełarusam vieści biznes u isnujučych abstavinach izalacyi ad usiaho śvietu, Mielničak adkazvaje, što ŭ ich jość tolki dźvie mahčymaści — «ci źjazdžać, ci ciarpieć».
Jaki stan suśvietnaha IT
Na pohlad biznesmiena, u hłabalnym IT — kryzis. Ab najaŭnaści kryzisnych źjavaŭ śviedčać zvalnieńni ŭ takich technałahičnych hihantach, jak Google i Facebook.
«Maje siabry z Google havorać, što prosta ciapier pradukcyjnaść ich pracy vyrasła ŭdvaja. Čakajecca, što na praciahu nastupnych 10 hadoŭ rost budzie ŭ 10 razoŭ. Pytańnie ŭ tym, ci budzie ełastyčny popyt, ci patrebna nam budzie ŭ 10 razoŭ bolš prahramnych praduktaŭ. Dla taho, kab byŭ ekanamičny efiekt, nieabchodna, kab taksama vyrasła spažyvańnie».
Ale heta niemahčyma. Jak tłumačyć Mielničak, «jakija b krutyja filmy nie byli, hladzieć ich u 10 razoŭ bolš nie atrymajecca tamu što treba jašče spać. Čas spažyvańnia moža maksimalna pavialičycca ŭ dva razy».
U vyniku, pa prahnozach biznesmiena, nie treba budzie takaja značnaja kolkaść prahramistaŭ.
Na situacyju ŭ halinie mocna ŭpłyvaje štučny intelekt, jaki pavialičvaje pradukcyjnaść pracy i pryvodzić da rostu kankurencyi ŭ śfiery IT.
Na pohlad Mielničaka, u vyjhryšy mohuć być «ludzi, jakija razumiejuć, nie jak zrabić prahramny pradukt, a jaki mienavita prahramny pradukt».
Tamu tym, chto choča atrymać «viertykalny lift», raić biznesmien, «nieabchodna šukać niejkija svaje nišy». Tym bolš, što dla hetaha stała bolš instrumientaryja.
«Kali niechta chacieŭ zrabić prahramny pradukt i nie viedaŭ, jak najmać prahramistaŭ, to ciapier toj čas, kali ŭžo prahramistaŭ možna nie najmać», — adznačaje Mielničak.
Što budzie z suśvietnaj ekanomikaj?
Mielničak padzialiŭsia svaimi nazirańniami ab pieršych prykmietach razryvu ekanamičnych suviaziej nie tolki ŭ adnosinach da Rasii i Kitaja, ale i pamiž ZŠA i Jeŭropaj.
Chodziać pahałoski, što ZŠA paśla prezidenckich vybaraŭ mohuć uvieści handlovyja taryfy suprać Jeŭropy, što Suśvietnaja handlovaja arhanizacyja «nakryvajecca». Akramia hetaha siarod amierykanskich palitykaŭ rastuć sumnievy nakont taho, ci varta ZŠA zajmacca arhanizacyjaj biaśpieki suśvietnych marskich šlachoŭ.
Na rost ryzyki razryvu ekanamičnych suviaziej, jak adznačaje biznesmien, užo adreahavaŭ vienčurny kapitał, jaki «pačynaje bolš hladzieć na svoj rehijon, bo dumaje na doŭhi pieryjad».
Vynikam dehłabalizacyi dla prostych žycharoŭ, zaŭvažaje Mielničak, stanie paharšeńnie jakaści tavaraŭ i rost ich koštu.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ2
Kamientary