19 krasavika spoŭniłasia dva hady, jak u Minsku pa «prafsajuznaj spravie» zatrymali aktyvistaŭ niezaležnaha prafsajuza radyjoelektronnaj pramysłovaści Hienadzia Fiadyniča, Vasila Bieraśniova i Vacłava Arešku, a paźniej asudzili na hihanckija terminy.
Radyjo Svaboda źviazałasia sa svajačkaj 69-hadovaha Vacłava Areški, jakaja ciapier žyvie za miažoj. Žančyna ŭspomniła padziei dvuchhadovaj daŭnaści i raskazała pra stan zdaroŭja Vacłava Areški.
«Była na pracy i tam u niejkim čacie pračytała, što lidary prafsajuznaha ruchu pierastali vychodzić na suviaź. Adrazu nabrała numar telefona — sapraŭdy ničoha. I źviestak nijakich, dumaj što chočaš. Raptam unačy zvanok z turmy KDB: Vacłaŭ prosić leki. A potym, jak va ŭsich. Hod na «Vaładarcy» da suda, marnaja sproba apelacyi i voś užo amal dva hady ŭ kałonii. Apošnija čatyry miesiacy jon u «Vaŭčynych norach» u Ivacevickim rajonie», — raskazała jana.
Pavodle jaje słoŭ, jahonaja asnoŭnaja prablema sa zdaroŭjem — drenny zrok na abodva voki.
«Bačyć usiaho na 5% ad narmalnaha, i zrok paharšajecca. Uvohule zdaroŭje ŭ paraŭnańni z tym, što było ŭ SIZA, usio horšaje. Dadalisia novyja chvaroby, ale ja nie chacieła b pra ich raskazvać, bo jon nia choča», — skazała surazmoŭca.
Pavodle jaje, rodnyja štomiesiac dasyłajuć Arešku kalažy z fatazdymkaŭ, čym padtrymlivajuć jaho maralna. Dva razy na hod Vacłavu dazvolena atrymać banderol, čym svajaki palitviaźnia taksama karystajucca.
«Adziny plus, što tam dobraje lasnoje pavietra. Tak i piša, što dychać moža narmalna. Na pracu jon nia chodzić, bo pensijaner. Bolšaść času znachodzicca ŭ atradzie. Na charčavańnie nie narakaje, na miedycynskuju dapamohu taksama. Miarkuju, u papiaredniaj kałonii traplaŭ u ŠIZA, tut, zdajecca, takoha niama. Suviaź ź im jość. Viedajem, što vielmi sumuje pa domie, pa svajakach, prosić słać bolej zdymkaŭ z našaha žyćcia», — raskazała svajačka Vacłava Areški.
Vacłavu Arešku 69 hadoŭ. Aktyvist asudžany na 8 hadoŭ źniavoleńnia, pravaabaroncy pryznali jaho palitviaźniem.
Ad roznych chvarob u źniavoleńni pakutujuć i inšyja lidary prafsajuzu REP. 66-hadovy Hienadź Fiadynič chvareje na cukrovy dyjabiet i maje prablemy z sercam.
Vasil Bieraśnioŭ, jakomu 73 hady, pakutuje ad bolaŭ u adzinaj nyrcy (druhuju jamu vydalili jašče da źniavoleńnia).
Hienadź Fiadynič i Vasil Bieraśnioŭ asudžanyja na 9 hadoŭ źniavoleńnia kožny.
Siłaviki ŭzialisia za karystalnikaŭ tvitara — dziasiatki akaŭntaŭ zvyčajnych biełarusaŭ stali «ekstremisckimi»5
Kamientary