Pašynian zaklikaŭ admovicca ad «histaryčnaj Armienii» na karyść realnaj Armienii
«Urad i ja asabista pryjšli da vysnovy, što histaryčnaja Armienija i realnaja Armienija nie tolki niesumiaščalnyja, ale čaściakom supiarečać adna adnoj i navat stvarajuć surjoznyja pahrozy adzin dla adnaho», — pra heta ŭ parłamiencie zajaviŭ premjer-ministr Nikoł Pašynian, piša news.am.
Kiraŭnik Kabinieta ministraŭ rastłumačyŭ, što jon i ŭrad, doŭhi čas źjaŭlajučysia nośbitami psichałohii i tradycyj histaryčnaj Armienii, tolki ŭ 2022 hodzie zafiksavali, što klučavy faktar biaśpieki Armienii — mižnarodna pryznanyja miežy, mižnarodna pryznanaja terytoryja Armienii — ihnarujecca.
«Choć debaty, jakija prachodziać u hetaj zale z 2021 hoda, mohuć zdacca hramadskaści apalityčnymi i biessensoŭnymi, na samaj spravie jany majuć surjozny źmiest i stratehičnuju hłybiniu, bo ŭ hetych debatach sutykajucca dva punkty hledžańnia», — adznačyŭ premjer-ministr.
Adzin z hetych punktaŭ hledžańnia Pašynian padvioŭ pad formuły histaryčnaj Armienii, druhi — realnaj Armienii. Hetyja debaty pačalisia paśla vajny 2020 hoda.
«Da 44-dzionnaj vajny ŭ Armienii isnavaŭ hramadska-palityčny kansensus u dačynieńni da taho, što histaryčnaja i realnaja Armienija mohuć navat uzmacniać adna adnu. Hety punkt hledžańnia byŭ prymalny i dla kiroŭnaj bolšaści, i dla mianie asabista», — dadaŭ jon.
Nikoł Pašynian rastłumačyŭ, što tolki paśla vieraśnioŭskich vajennych dziejańniaŭ 2023 hoda kančatkova pierakanaŭsia, što fiksacyja mižnarodna pryznanaj terytoryi Armienii moža stać vyrašalnym u harantavańni biaśpieki krainy.
Z hetaha momantu pačaŭsia aktualny palityka-psichałahičny praces, jaki kiraŭnik urada nazvaŭ pracesam delimitacyi pamiž sapraŭdnaj Armienijaj i histaryčnaj Armienijaj. «Hety praces nie lahčej, čym praces delimitacyi miažy pamiž Armienijaj i Azierbajdžanam», — padkreśliŭ jon.
Premjer-ministr pryjšoŭ da vysnovy, što histaryčnaja Armienija nie pryznaje terytaryjalnuju cełasnaść realnaj Armienii, pakolki terytaryjalnaja cełasnaść realnaj Armienii źjaŭlajecca abmiežavalnym faktaram dla histaryčnaj Armienii.
«U hetym sensie histaryčnaja Armienija volaj-niavolaj pieraklikajecca z šeraham krain, jakija pretendujuć na realny suvierenitet i terytoryi Armienii, bo terytaryjalnaja cełasnaść realnaj Armienii, mižnarodna pryznanaja miaža źjaŭlajucca takim ža abmiežavalnym faktaram dla apietytaŭ hetych krain», — skazaŭ na zakančeńnie Nikoł Pašynian.
Nahadajem, što ŭ vieraśni 2023 hoda ŭ chodzie małankavaj vajny kapitulavaŭ Nahorny Karabach, a armianskaje nasielnictva evakujavałasia ŭ Armieniju, a prezident Azierbajdžana Ilcham Alijeŭ uračysta potym uźniaŭ ściah Azierbajdžana ŭ Chankiendzi (Ściepanakiercie).
Siońnia Pašynian zajaviŭ, što va ŭładaŭ Nahornaha Karabachu była mahčymaść ustupić u dyjałoh z Azierbajdžanam, adnak jany nie pajšli na heta.
«Mahčymaść pačać razmovu z Azierbajdžanam była jašče na jeŭrapiejskich placoŭkach, adnak Nahorny Karabach nie pajšoŭ na heta, bo zabaranili. I heta nie ja zabaraniŭ. Ja b nie zmoh i nie zachacieŭ», — skazaŭ Pašynian.
Jon tak i nie patłumačyŭ, chto mienavita zabaraniŭ Ściepanakiertu vieści dyjałoh z Baku. Jon taksama ličyć, što niekatoryja koły ŭ Nahornym Karabachu nie zmahli adekvatna reahavać na situacyju, jakaja skłałasia.
Rasijskich pamiežnikaŭ z 1 žniŭnia nie budzie ŭ jerevanskim aeraporcie «Zvartnoc»
Armienija sastupić niekalki viosak Azierbajdžanu, kab praduchilić novuju vajnu
Armienija razhladaje ideju ŭstupleńnia ŭ Jeŭrasajuz
Łaŭroŭ pryhraziŭ Pašynianu: Zajavy Jerevana prymušajuć Rasiju zadumacca pra svaje praktyčnyja kroki
Vizitu Zialenskaha ŭ Armieniju i Azierbajdžan nie budzie z-za rašeńnia Baku
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary