Biełarus u Polščy dva hady sprabavaŭ atrymać dazvoł na žycharstva
Z napłyvam emihrantaŭ spraŭlajucca nie ŭsie vajavodstvy Polščy. U niekatorych razhlad spraŭ ab dazvole na žycharstva raściahvajecca na mnohija miesiacy.
Horš za ŭsio situacyja ŭ Nižniesilezskim vajavodstvie. Pa danych na 2022 hod, tut dazvołu na časovaje znachodžańnie (pobyt czasowy) čakali ŭ siarednim 544 dni, a na pastajannaje žycharstva (pobyt stały) — 267 dzion. Alaksandr čakaje časovaha DNŽ užo dva hady. Jak tak vyjšła, jon raskazaŭ Mostmedia.io.
Alaksandr pierajechaŭ u Polšču ŭ kancy sakavika 2021 hoda pa vizie PBH. Dla žyćcia mužčyna abraŭ Urocłaŭ. Tam ža 14 sakavika 2022 hoda jon padaŭ dakumienty na DNŽ. Biełarus viedaŭ, što Urocłaŭ słavicca praciahłymi terminami razhladu spraŭ, ale nie dumaŭ, što ŭ jaho vypadku praces nastolki zaciahniecca.
Małady čałaviek pryznaje, što padaŭ dakumienty ŭ składany momant: u sakaviku 2022 hoda ŭ Polšču pajšoŭ patok biežancaŭ z Ukrainy i ŭpraŭleńnie pa spravach zamiežnikaŭ było pierahružana.
Praz vosiem miesiacaŭ vyrašyŭ pamianiać metu
Pieršapačatkova Alaksandr padaŭ dakumienty na Blue Card — dazvoł na časovaje znachodžańnie dla pracy pa prafiesii, jakaja patrabuje vysokaj kvalifikacyi. Ale ŭ listapadzie 2022 hoda jon źmianiŭ pracu i adkryŭ IP. I tady ž pryjšoŭ u kancylaryju administracyi (užonda), kab unieści źmieny ŭ zajavu — paznačyć dziejnaść IP padstavaj dla atrymańnia DNŽ. A zaadno vyrašyŭ udakładnić, u jakija terminy razhledziać jaho spravu.
Supracoŭnik daŭ biełarusu dakumient dla zapaŭnieńnia i paviedamiŭ, što chutka ź im źviažacca inśpiektar, jaki viadzie spravu, i daść usiu nieabchodnuju infarmacyju. U kancy miesiaca Alaksandr adpraviŭ va ŭžond zapoŭnieny dakumient, ale inśpiektar tak i nie vyjšaŭ ź im na suviaź.
— Tolki ŭ kancy studzienia 2023 hoda mnie pryjšoŭ list ad 9 śniežnia 2022 hoda. Ź jaho ja daviedaŭsia, što dakumient, adpraŭleny jašče ŭ kancy listapada 2022 hoda, nie byŭ pryniaty, — raspaviadaje Alaksandr.
Jon znoŭ adpraviŭsia ŭ kancylaryju, i tam jamu vydali jašče adzin dakumient na źmienu mety DNŽ, ale ŭžo inšaha typu. Alaksandr zapoŭniŭ jaho i adpraviŭ u lutym 2023 hoda. A paralelna sprabavaŭ źviazacca sa svaim inśpiektaram, jaki nie vychodziŭ na suviaź.
— Ja atrymlivaŭ tolki aficyjnyja adkazy, maŭlaŭ, inśpiektar paviedamić mnie, kali niešta spatrebicca. Ale pry hetym ja ŭsio jašče ničoha nie viedaŭ pra status majoj zajavy i datu razhladu spravy.
«Užo hod čakaju, paŭtara čakaju — zusim chutka heta skončycca»
Alaksandr viedaŭ pra vypadki, kali emihranty źjazdžali z Urocłava ŭ inšyja harady, naprykład u Varšavu ci ŭ Biełastok, kab padać dakumienty na DNŽ tam. U hetych haradach zajavy razhladajuć chutčej. Jon taksama zadumvaŭsia ab pierajeździe, ale vyrašyŭ hetaha nie rabić. A fiktyŭnuju rehistracyju (meldunek) u inšym horadzie małady čałaviek paličyŭ nienadziejnaj zadumaj.
— Ja ŭvieś čas dumaŭ: užo hod čakaju, paŭtara čakaju — voś zusim chutka heta dakładna skončycca. Ciapier ja, viadoma, razumieju, što, chutčej za ŭsio, pryniaŭ niapravilnaje rašeńnie. Zatoje atrymaŭ dobry dośvied, — kaža Alaksandr.
Da kastryčnika 2023 hoda zruchaŭ u spravie ab DNŽ pa-raniejšamu nie było — i Alaksandr staŭ pisać skarhi ŭ MUS, Upraŭleńnie pa spravach zamiežnikaŭ, kantrolnuju pałatu Polščy i ŭ ofis ambudsmiena pa hramadzianskich pravach. Mienavita zvarot da ambudsmiena Alaksandr ličyć efiektyŭnym — paśla hetaha sprava zrušyłasia ź miortvaha punktu, choć pierš prychodzili «standartnyja adpiski».
— Mabyć, bo jaho (ambudsmena) abaviazvaje ŭtrymlivać Jeŭraźviaz, ci ž spracavaŭ nazapašvalny efiekt, — razvažaje Alaksandr. — Čuŭ, što šmat u čym heta moža zaležać ad inśpiektara: siarod ich jość i kryŭdlivyja ludzi. Tym nie mienš ja raju nie bajacca, nie čakać i adrazu padavać u sud — jon abaviazvaje razhledzieć spravu ciaham dvuch-troch miesiacaŭ. Ale padača pazovu i čakańnie zojmie niamała času. Nakolki mnie viadoma, moža dachodzić i da paŭhoda.
«Štomiesiac płaču tysiaču dalaraŭ padatkaŭ»
21 lutaha 2024 hoda Alaksandr narešcie atrymaŭ stanoŭčaje rašeńnie i ciapier čakaje płastykavuju kartu DNŽ. Svoj šlach biełarus nazyvaje «chałodnym dušam», paśla jakoha ŭ jaho źnikła žadańnie zastavacca žyć va Urocłavie.
— Pry pierajeździe ŭ Polšču ja ŭvažaŭ siabie za najlepšaha emihranta dla hetaj krainy — maładoha, zakonapasłuchmianaha, maju zapatrabavanuju prafiesiju, ź jakoj štomiesiac płaču tysiaču dalaraŭ padatkaŭ, hatovy vučyć movu i intehravacca. Adzinaje, čaho ja chacieŭ, — heta atrymać VNŽ, hruba kažučy, sam dazvoł na intehracyju.
U polskaj pravavoj sistemie Alaksandr rasčaravaŭsia. Ale niahledziačy na składany i praciahły šlach, ličyć, što jamu adnosna pašancavała. Małady čałaviek sustrakaŭ ludziej, jakim daviałosia čakać dakumienty va Urocłavie try hady.
U inšych haradach čas čakańnia byŭ mienšy. Usie krakaŭskija kalehi Alaksandra atrymlivali VNŽ na padstavie IP za 2-4 miesiacy.
«Padčas pošuku pracy davodziłasia pierabolšvać situacyju»
Pakul Alaksandr čakaŭ DNŽ, jaho znachodžańnie ŭ Polščy było lehalnym, a voś pakidać krainu małady čałaviek nie moh. Byli i inšyja minusy:
— Pry žadańni ŭziać kredyt mianie čakała admova abo horšy pracent. A padčas pošuku pracy davodziłasia pierabolšvać svaju situacyju riekrucioram. Usie pytalisia pra najaŭnaść DNŽ, i farmuloŭka «čakaju dva hady» ich, viadoma, pałochała. Tamu davodziłasia kazać, što jon u mianie jość. Zvyčajna jaho nichto nie praviaraje. Akramia taho, abmiežavańni mianie čakali i na anłajn-servisach, naprykład u Revolut — tam patrabavałasia paćviardžeńnie majho lehalnaha znachodžańnia ŭ krainie.
Jak tolki Alaksandr atrymaje kartu, płanuje šmat padarožničać i navat pažyć u roznych krainach.
— Urocłaŭ sam pa sabie pryhožy, kampaktny, zručny i ciopły horad, ale ŭ im ja nie płanuju zastavacca žyć, — pryznajecca Alaksandr.
Kamientary