U samym sercy Minska pradajuć «askiepak savieckaj epochi» — dvuchpaviarchovuju «stalinku»
U samym centry stalicy, pablizu hałoŭnaha praśpiekta, žyvie svaim žyćciom i ścipła prychodzić u ništo kampaktnaja dvuchpaviarchovaja stalinka. Dom pustuje nie pieršy hod usiaho za dva kroki ad Biełdziaržfiłarmonii, pa adrasie vuł. Załataja Horka, 6A.
Nie tak daŭno jaho vystavili na prodaž za $250 tysiač, abo 807 tys. rubloŭ. Onliner.by raskazvaje, što tam unutry i čamu budynak dahetul nie źnieśli.
Stalinku z dvuch pavierchaŭ pabudavali ŭ 1952 hodzie z cehły, pierakryćci ŭ im składzienyja z žalezabietonu i belek. Cudam acaleły askiepak savieckaj epochi zajmaje płošču ŭ 228 kvadrataŭ. Na dvuch pavierchach raźmiaściłasia ŭsiaho čatyry kvatery, u niekatorych ź ich možna vyjavić ślady raniejšych haspadaroŭ. Asablivaść hetaj stalinki — zašklonyja draŭlanyja vuhłavyja łodžyi, jakija miescami pazirajuć na horad pustymi šybami. Unutry doma pavierchi złučaje mocnaja draŭlanaja leśvica.
U ahienctvie nieruchomaści raspaviali, što ŭ domie praviedzieny ŭsie kamunikacyi: vada, kanalizacyja, centralnaje aciapleńnie. Vyšynia stolaŭ na pieršym paviersie — 2,7 mietra, na druhim — usie 3.
— Hety ŭčastak ziamli nabyła ŭ svoj čas kampanija «MakraInžynirynh», — dzielicca padrabiaznaściami ryełtar. — Na miescy stalinki zabudoŭščyk płanavaŭ uźvieści hmach, ale nie zrasłosia. Ludziej raśsialili, dom adklučyli ad kamunikacyj. Što budzie z hetym učastkam ziamli, pakul niezrazumieła, na dadzieny momant jon znachodzicca ŭ zonie šmatkvaternaj zabudovy. Ciapier na rukach majecca dazvoł na rekanstrukcyju budynka. Sam dom u zdavalniajučym techničnym stanie, u budučych uładalnikaŭ jość mahčymaść nadbudavać mansardny pavierch.
Budynak abśledavany budaŭničaj arhanizacyjaj i moža być vykarystany jak dla pražyvańnia, tak i dla biznesu, havorycca ŭ abjavie.
U administracyi Savieckaha rajona hod tamu pralili śviatło na los učastka, dzie znachodzicca stalinka.
— Prajekt detalovaha płanavańnia terytoryi, na jakoj raźmieščany pakazany budynak, raspracavany, ale jašče nie adobrany rašeńniem Minharvykankama. U adpaviednaści z hienieralnym płanam Minska, zaćvierdžanym ukazam Łukašenki ad 23 krasavika 2004 h. №165, dom znachodzicca ŭ zonie šmatkvaternaj zabudovy. Pytańnie asvajeńnia hetaj płoščy budzie vyrašana paśla zaćviardžeńnia prajekta detalovaha płanavańnia, — patłumačyli ŭ administracyi.
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary