«Niekatoryja bajacca zapeckać svaje biełyja palčatki». Kłaskoŭski pakrytykavaŭ padychod demsiłaŭ
Palitołah Alaksandr Kłaskoŭski ŭ efiry «Biełsatu» parazvažaŭ, što rabić demsiłam.
Alaksandr Kłaskoŭski zaŭvažaje, što Ryhor Astapienia zaklikaŭ demakratyčnyja siły padumać, jakim čynam udzielničać u vybarčaj kampanii 2025 hoda.
«Jakimi nie demakratyčnymi hetyja vybary nie byli b, heta nie tolki vyklik dla Łukašenki (Zachad, chutčej za ŭsio, ich vyniki nie pryznaje), ale i dla lehitymnaści Śviatłany Cichanoŭskaj. Jana nie viečnaja. Pakrysie hety resurs skančajecca. I ŭvieś čas apielavać da 2020 hoda, što voś my vychodzili i amal pieramahli. Hety arhumient budzie pracavać na zachodnich partnioraŭ usio słabiej i słabiej», — kamientuje analityk.
Pa słovach Kłaskoŭskaha, Łatuška ŭ svajoj palemicy ŭsio heta abyšoŭ i źvioŭ da Ukrainy. I ŭ hetym vypadku, adznačaje analityk, «paralel troški kulhaje».
«Treba havaryć pra toje, jak dziejničać biełaruskim demakratyčnym siłam. Pytańnie zastajecca. I tak ci inačaj na vyklik 2025 hoda biełaruskim demakratyčnym siłam daviadziecca adkazvać.
Jak dziejničać biełaruskim demakratyčnym siłam?
Sam ža Kłaskoŭski ličyć, što treba havaryć nie tolki pra vybarčuju kampaniju 2025 hoda, a pra stratehičny kryzis biełaruskaj apazicyi.
«Lidaram i štabam demakratyčnych siłaŭ treba pieraasensavać realii i bolš ćviaroza pahladzieć na svoj siońniašni status. Tamu što dziažurnaja revalucyjnaja rytoryka ŭžo nie zakranaje nadta tych, chto ŭsioj dušoj za pieramieny», — miarkuje analityk.
Kłaskoŭski źviartaje ŭvahu na toje, što ciapier vialikaja prablema z tak zvanaj «paralelnaj dziaržavaj», jakaja ŭtvaryłasia ŭ palityčnaj emihracyi:
«Jość ofis Cichanoŭskaj, Abjadnany pierachodny kabiniet, Narodnaje antykryzisnaje ŭpraŭleńnie Łatuški, Kaardynacyjnaja rada (jakaja, darečy, zavaliła alternatyŭnyja vybary). Ci nie zašmat hetych struktur? Čym hetyja ŭsie «ministry», ich štaty buduć zajmacca praz hod-dva-try? Dzie znajści resursy na heta ŭsio, kali Zachad budzie ich vydzialać usio mienš achvotna?»
Na pohlad Kłaskoŭskaha, sproba pabudavać za miažoj paralelnuju dziaržavu była raźličana na pierachod da demakratyi. Ale ciapier u Biełarusi nazirajecca pierachod da tatalitaryzmu. «Usie hetyja struktury pravisajuć u pavietry. Nie zrazumieła, čym im zajmacca praź niejki čas. Tamu treba heta ŭsio niejak pieraasensavać, pierafarmatavać, skaracić, kab ambicyi nie vyhladali zališnimi ŭ siońniašniaj situacyi».
Analityk vykazaŭsia i adnosna mietadaŭ, jakija daminujuć u rytorycy demakratyčnych siłaŭ:
«Sankcyi, sankcyi. Ale my bačym, što jany nie nadta pracujuć. I ich uzvysić da termajadziernaha ŭzroŭniu Zachad nie ŭ stanie. Heta ŭvohule abmiežavalnyja miery Zachadu. Jon ich uvodzić ci zdymaje zychodziačy ź niejkich svaich mierkavańniaŭ. I rabić vyhlad, što tut viadzie rej apazicyja — nie zusim surjozna».
Ci adpuścić Łukašenka palitviaźniaŭ pierad vybarami
Na pytańnie, ci rašycca Łukašenka vypuścić palitviaźniaŭ napiaredadni prezidenckich vybaraŭ 2025-ha, Kłaskoŭski adznačyŭ, što «cudaŭ nie budzie» i patłumačyŭ:
«U Łukašenki stratehija prostaja, brutalnaja. Ale jana na siońnia pracuje. Łamać usich praz kalena. Jak tank pierci da svajoj mety — praciahu paŭnamoctvaŭ. Siońnia heta dziejničaje. A voś z alternatyŭnaj stratehijaj vialikija pytańni».
Na pohlad analityka, padčas vybaraŭ 2024 hoda Łukašenka pravioŭ repietycyju svajho vybrańnia ŭ 2025-m.
«Prezidenckaja kampanija budzie jašče bolš žorstkaja, biez alternatyvy, biez umoŭ dla apazicyjnych kandydataŭ, u atmaśfiery zastrašvańnia. Tamu rabić niejkija šyrokija žesty ŭmoŭna libieralnaha kštałtu Łukašenka nie budzie», — ličyć Kłaskoŭski.
Razam z hetym analityk nie vyklučaje taho, što ŭ adnosinach prablemy palitviaźniaŭ patrebien maksimalna hnutki padychod. Zhadvaje asobnyja kiejsy, jakija byli z udziełam zamiežnych aktaraŭ, jakija ŭmiešvalisia ŭ historyi asobnych palitviaźniaŭ i vyciahvali ich.
«Mnie zdajecca trochi niedarečnaj poza niekatorych apazicyjnych dziejačaŭ, jakija, skažam tak, bajacca zapeckać svaje biełyja palčatki, kažuć: «My ŭ takim razie adyjdziem ad svaich pryncypaŭ». Prabačcie, ale Izrail z CHAMASam damaŭlajecca, kab vyciahnuć svaich ludziej. Tamu tut nie treba hetaha falšyvaha čystaplujstva».
Čytajcie jašče:
«Nie złavać dzieda». Ryhor Astapienia prapanavaŭ novuju stratehiju demakratyčnym siłam
«My pavinny zdacca Łukašenku?» Łatuška adkazaŭ Astapieniu
Biełarusy nie chočuć ni Biełaruś Cichanoŭskaj, ni Biełaruś Łukašenki — daśledavańnie Astapieni
Kamientary