Pad kaniec 2023 hoda dola kitajskich marak siarod novych lehkavych aŭtamabilaŭ, pradavanych u Biełarusi, pieravysiła 84%. Ale rost popytu na aŭto kitajskich brendaŭ nazirajecca va ŭsim śviecie, choć i nie takimi imklivymi tempami, jak u nas. «Naša Niva» raźbirałasia, što spryjaje kitajskaj aŭtamabilnaj ekspansii.
Suśvietnyja rekordy prodažaŭ
U 2023 hodzie Kitaj pradaŭ rekordnuju kolkaść aŭtamabilaŭ na ekspart, apiaredziŭšy pa hetym pakazčyku Japoniju. Za minuły hod ekspart aŭtamabilaŭ z Kitaja vyras na 62%, da kala 4 młn štuk. Paralelna z hetym, kraina źjaŭlajecca suśvietnym lidaram pa vytvorčaści elektramabilaŭ. Na dolu Kitaja prychodzicca ŭžo 65% suśvietnych prodažaŭ aŭtamabilaŭ na novych krynicach enierhii.
Ale niahledziačy na imklivy rost popytu na elektramabili i hibrydy, Kitaju ŭdajecca mieć dobryja pakazčyki pryrostu i ŭ siehmiencie aŭto z ruchavikami na tradycyjnym palivie.
Pryčym tut Rasija?
Asnoŭnymi rynkami zbytu mašyn z tradycyjnymi ruchavikami źjaŭlajucca takija krainy, jak Rasija i Mieksika. Pryčym dola RF amal u dva razy bolšaja. U struktury kitajskaha ekspartu aŭtamabilej u fizičnym vyražeńni RF zajmaje pieršaje miesca i składaje kala 25% ad ahulnaha abjomu.
Admietna, što jašče niekalki hadoŭ tamu cikavaść da aŭto kitajskich brendaŭ u rasijan była nievialikaj. Da pačatku poŭnamaštabnaha ŭvarvańnia va Ukrainu na dolu kitajskich aŭto na rasijskim rynku prychodziłasia tolki 9%. Da kancu 2022 hoda — 37%, a pa stanie na śniežań 2023 hoda — užo 61%. I heta biez uliku šeraha impartu fizičnymi asobami.
Adnym z asnoŭnych čyńnikaŭ, čamu tak adbyvajecca, možna nazvać sankcyi i sychod z RF aŭtavytvorcaŭ suśvietnych brendaŭ. U niejkim sensie jany zrabili ščodry padarunak svaim kitajskim kaleham-kankurentam, dobraachvotna pakinuŭšy im choć i nie samy bahaty, ale ŭsio ž vialiki rynak sa 140-miljonnym nasielnictvam.
A što z kitajskimi aŭto ŭ Biełarusi?
Sychod z Rasii suśvietnych aŭtavytvorcaŭ paŭpłyvaŭ na pryrost prodažaŭ aŭto Made in China ŭ Biełarusi i Kazachstanie.
Pa vynikach listapada 2023 hoda, dola kitajskich marak siarod novych lehkavych aŭtamabilaŭ, pradavanych u Biełarusi, pieravysiła 84% (da vajny kala 80% aŭto, jakija pradavali našy dylery, vyrablalisia ŭ Rasii). Pry hetym, kala 70% dylerskich prodažaŭ pryjšłosia na biełaruska-kitajskija Geely.
Kazachstan paŭtaraje za partniorami pa JEAES
Razam z Rasijaj i Biełaruśsiu prykmietny rost prodažaŭ aŭto kitajskich vytvorcaŭ nazirajecca ŭ Kazachstanie, jaki znachodzicca ŭ adzinaj z nami mytnaj prastory. Pryčyny, pa jakich tam pačali bolš kuplać aŭto kitajskich brendaŭ, tyja samyja, što ŭ Biełarusi. Da vajny značnaja častka novych mašyn, pradavanych u Kazachstanie, vyrablałasia na zavodach u Rasii.
Na kaniec 2023 hoda dola kitajskich aŭto ŭ ahulnaj struktury prodažaŭ Kazachstana składała kala 30-32%. Pry tym, što ŭ pieršyja miesiacy hoda ich dola vahałasia ŭ miežach 10-15%, a ŭ davajennym 2021 hodzie — 3,5%.
Aŭstralija
Rost prodažaŭ aŭto rodam z KNR letaś naziraŭsia nie tolki ŭ Rasii, Biełarusi i Kazachstanie. Vyhladaje, što tendencyja na kitaizacyju maje suśvietny maštab. Značny rost popytu, choć i nie taki, jak u niekatorych krainach JEAES, nazirajecca, naprykład, u Aŭstralii.
Kali ŭ 2022 hodzie na aŭstralijskim kantyniencie pradali 122 845 aŭto, zroblenych u Kitai, to letaś užo 193 433 štuk. Kitaj staŭ treciaj pa vieličyni krynicaj novych aŭtamabilaŭ u Aŭstralii. Pry hetym, jašče ŭ 2018-m siarod krain-imparcioraŭ novych aŭto Kitaj zajmaŭ 11 radok z 10,5 tysiačy aŭto.
Zachad dapamahaje Kitaju?
Kitajski aŭtapram apynuŭsia ŭ vyhadnym stanoviščy z šerahu pryčyn. Z adnaho boku, jość suśvietnyja aŭtavytvorcy, jakija addajuć im rynak RF u kamplekcie z Kazachstanam, Biełaruśsiu i inšymi krainami JEAES. Ź inšaha — raźvityja krainy stymulujuć pierachod na elektramabili, z vytvorčaściu jakich Kitaj maje vidavočnyja pośpiechi.
Z 2020 hoda ekspart kitajskich elektrakaraŭ vyras z nula da 50% u struktury mižnarodnych prodažaŭ.
Kitaj źjaŭlajecca absalutnym lidaram u vytvorčaści akumulataraŭ dla elektrakaraŭ. Akramia vytvorčaści samich batarej, jon kantraluje značnuju častku asnoŭnych resursaŭ dla vyrabu ich kampanientaŭ. Tak, na dolu krainy prypadaje 85% vytvorčych mahutnaściaŭ u anodach i 70% u katodach dla batarej. Kitaj apracoŭvaje bolš za 50% hrafitu, kobaltu i lityju, jakija vykarystoŭvajucca ŭ vytvorčaści, a taksama vałodaje 80% suśvietnych zapasaŭ hrafitu.
Čytajcie taksama:
Na zavodzie «BiełDžy» Łukašenku pakazali načynku Geely. Kolki biełaruskaha ŭ aŭto?
MUS raspradaje svaje staryja Geely. Pahladzicie, jak vyhladajuć 10-hadovyja aŭto biełaruska-kitajskaj vytvorčaści
Lancia viartajecca. Biez dyziela i ź vialikimi ambicyjami
«Ja nie vučyła dziaciej śpiavać himn i chadzić šychtom». Razmova z nastaŭnicaj Taćcianaj Krapinievič, jakaja źjechała z krainy praz danosy Bondaravaj2121
«Ja nie vučyła dziaciej śpiavać himn i chadzić šychtom». Razmova z nastaŭnicaj Taćcianaj Krapinievič, jakaja źjechała z krainy praz danosy Bondaravaj21
«Staršynia prosta biłasia hałavoj ab stoł. Paśla nam razdali kanvierty z hrašyma». Nastaŭnica była ŭ vybarčaj kamisii ŭ 2020-m — i voś što pabačyła1616
Kamientary