U Kruhłym pradajuć fantan. Ale za hetym staić trahičnaja historyja

Fantan, jak i inšaja nieruchomaść budaŭničaha pradpryjemstva PMK-266, byŭ aryštavany za daŭhi. 

Jaho pasprabujuć pradać 23 studzienia. Ale jość niuans — heta kapitalnaje zbudavańnie, uźviedzienaje PMK na arandavanaj dzialancy ziamli. Kab karystacca im, pakupnik musić zaklučyć damovu ab arendzie z rajvykankamam albo razabrać fantan pa cahlincy i vyvieźci.

Vyhlad fantana daloki ad idealnaha, miescami paadvalvałasia plitka. Košt — 1600 rubloŭ.

Trahičny los kiraŭnika PMK

Prodaž majomaści PMK nahadvaje trahičnuju historyju jaho šmathadovaha kiraŭnika Mikałaja Patrončyka, zasłužanaha budaŭnika Biełarusi, jaki pamior u 64 hady ŭ źniavoleńni.

Čatyry miesiacy pažyłoha chvoraha mužčynu ŭtrymlivali ŭ SIZA pa abvinavačvańni ŭ kradziažy ŭ asabliva bujnym pamiery šlacham złoŭžyvańnia słužbovymi paŭnamoctvami.

Razam z baćkam u kancy 2017 hoda zabrali i małodšaha syna Dźmitryja. Pra śmierć Patrončyka stała viadoma ŭ krasaviku 2018-ha. Na jaho pachavańnie vyjšaŭ uvieś rajcentr.

Pavialičyć

Patrončyk znaŭsia z Łukašenkam, jaki ŭ 2012 hodzie prapanoŭvaŭ jamu ministerskuju pasadu i ŭznaharodziŭ ordenam Ajčyny III stupieni. Patrončyk byŭ deputatam rajsavieta.

Uznačalenaje im z 1995 hoda pradpryjemstva ŭzvodziła žyllo i vytvorčyja pamiaškańni pa ŭsioj Biełarusi. Pabudavała rezidencyju Łukašenki na jaho małoj radzimie ŭ vioscy Aleksandryja, Škłoŭskim rajonie i Ladovy pałac u samim Škłovie.

Kožny šosty žychar Kruhłaha pracavaŭ na PMK. Pradpryjemstva było najbujniejšym ułaśnikam nieruchomaści ŭ Kruhlanskim rajonie. 

Sa śmierciu Patrončyka źviazvajecca zaniapad pradpryjemstva. 

«Byłaja raskoša» Kruhłaha

U 2022 hodzie PMK prasiła pryznać jaho bankrutam (ale sud nie znajšoŭ dla hetaha padstaŭ), tady jano było vinavataje kredytoram amal 8 miljonaŭ rubloŭ.

Krychu bolš za hod tamu pradali handlova-haściničny kompleks «Izumrud», jaki PMK pabudavała ŭ 2009 hodzie. Jon pajšoŭ z aŭkcyjona za 551 tysiaču rubloŭ. Kompleks byŭ pabudavany, kali ŭ Rasii ŭviali abmiežavańni na raspaŭsiudžvańnie hulniavoha biznesu. Nievialikaje Kruhłaje, jakoje ŭ toj čas navat nie mieła haradskoha statusu, skarystałasia situacyjaj. 

Pavialičyć

Na kartežy z «novymi ruskimi», jakija pryjazdžali ŭ kazino, dzivilisia miascovyja žychary, jakija na taki šyk nie mieli hrošy. Niekatoryja, adnak, na haściach zarablali. Rasijanie nie raźbiralisia ŭ biełaruskich «miljonach» i pakidali absłuzie niebłahija čajavyja.

Paśla 2013 hoda ažyjataž ścich, bo Rasija akunułasia ŭ ekanamičny kryzis.

Ale «Izumrud» jašče kolki hod pracavaŭ. U im akramia haścinicy, byli cyrulnia, stamatałahičny kabiniet, łaźnia.

Hladzicie taksama:

Kruhlanskamu pradprymalniku dali 6 hadoŭ i 6 miesiacaŭ pazbaŭleńnia voli za pratesty i «niavypłatu padatkaŭ»

«Taho, što ja zafiksavaŭ, užo niemahčyma znajści. Było i nie stała». Kruhlanski nastaŭnik bolš za 40 hadoŭ źbiraje asablivaści miascovaj havorki

Dziaŭčynu z Kruhłaha zatrymali adrazu paśla vypusknoha. Paśla načej na hołych doškach da jaje pryjazdžała chutkaja

• 1
• 0
• 0
• 5
• 5
• 9
• 3
• 0