Razhortvajecca zachaplalnaja i niebiaśpiečnaja hulnia raźviedak. CRU i kitajskija śpiecsłužby sprabujuć pierachitryć adny adnych.
U apošnija hady CRU ŭsio bolš kancentrujecca na Kitai, bačačy ŭ im hałoŭnaha stratehičnaha supiernika ZŠA. Tamu amierykanskija ahienty šukajuć lubyja mahčymaści praniknuć u viarchi kitajskaj ułady. Jany viarbujuć pradstaŭnikoŭ elit, zdabyvajuć sakretnyja źviestki.
Ale ŭ Kitai ich čakaje mocny adpor. Kitajskija śpiecsłužby pilna sočać za zamiežnymi ahientami i žorstka karajuć zdradnikaŭ. Tak, u 2010-2012 hadach jany vykryli i źniščyli maštabnuju sietku ahientaŭ CRU ŭ svajoj krainie: było pakarana śmierciu i kinuta ŭ turmu šmat vysokapastaŭlenych słužboŭcaŭ, piša The Wall Street Journal..
Heta byŭ ciažki ŭdar pa amierykanskaj raźviedcy, jakaja z tych časoŭ zmahajecca za adnaŭleńnie svaich raźviedvalnych mahčymaściaŭ u Kitai.
Ciapier umacavańnie špijonskaj sietki ŭ Kitai źjaŭlajecca adnoj z asnoŭnych metaŭ CRU i rodnasnych jamu špijonskich śpiecsłužbaŭ ZŠA. Heta adbyvajecca na fonie ahulnaj źmieny amierykanskaj palityki biaśpieki: adychodu ad baraćby z terarystami pa ŭsim śviecie i fakusavańni na padrychtoŭcy da mahčymaha kanfliktu «vialikaj dziaržavy» z Kitajem i Rasijaj.
Paśla dvuch dziesiacihodździaŭ palavańnia na terarystaŭ amierykanskaja raźviedvalnaja supolnaść, jakaja zarablaje 100 miljardaŭ dołaraŭ u hod, zaniałasia pierapadrychtoŭkaj piersanału, pieranakiravańniem šmatmiljardnych biudžetaŭ i pieraabstalavańniem svajoj špijonskaj mašyny, kab zasiarodzicca na hetych dvuch patencyjnych praciŭnikach.
Jašče ŭ pačatku 2000-ch analityki CRU pačali časta papiaredžvać, što Kitaj nie dremle i maje vialikija ambicyi na suśvietnaj arenie. Sakretnyja dakłady vyviedki pra Padniabiesnuju, jakija padavalisia ŭ Bieły dom, uradavyja insajdary nazyvali pamiž saboj nie inakš jak «strašyłki pra Kitaj». U ich havorka viałasia pra zapłanavanuju madernizacyju kitajskaj Narodna-vyzvalenčaj armii, budučaje pašyreńnie vajskova-marskoha fłotu Kitaja i mety Piekina pa raźmiaščeńni zamiežnych bazaŭ.
Mienavita tady CRU vyrašyli, što čas pryśpieŭ i, skarystaŭšysia karupcyjaj u viarchach Kamunistyčnaj partyi Kitaja i ŭradavych ministerstvach, ciškom zavierbavali dziasiatki čynoŭnikaŭ u jakaści płatnych ahientaŭ. Ale ŭ vyniku katastrafičnaj niaŭdačy hetaja špijonskaja sietka była źniščanaja, kali kitajskija ŭłady adnaho za adnym vyłavili zdradnikaŭ u svaim asiarodździ.
Dahetul nieviadoma, što pajšło nie tak i čamu niaŭdałyja špiehi atrymali kuli ŭ patylicu. Niekatoryja ličać, što CRU ŭsio-taki nie dastatkova dobra naładziła suviaź z kitajskimi ahientami.
Źniščeńnie špijonskaj sietki CRU ŭnutry Kitaja adbyłosia akurat tady, kali lidaram KPK u kancy 2012 hoda staŭ Si Czińpiń, jaki praź niekalki miesiacaŭ zrabiŭsia i staršynioj KNR. U tahačasnaj administracyi prezidenta ZŠA byli na jaho spadzievy jak na bolš libieralnaha lidara. Adnak, jak pakazaŭ čas, tavaryš Si akazaŭsia ščyrym aŭtakratam i prychilnikam daŭnich kamunistyčnych tradycyj.
Kitaj pad kiraŭnictvam Si Czińpina pavodziŭ siabie dosyć ahresiŭna, pasiahajučy na čužyja marskija terytoryi, vykradajučy asabistyja danyja čalcoŭ urada ZŠA i ładziačy vajskovyja vučeńni pad nosam u susiedniaha Tajvania.
Kitaj taksama ŭzmacniŭ špijanaž za ludźmi, časta vykarystoŭvajučy sacyjalnyja sietki, takija jak LinkedIn, kab źviazacca z byłymi supracoŭnikami raźviedki ZŠA i vierbavać ich. Jon zavierbavaŭ, siarod inšych, Kievina Patryka Mełary, byłoha aficera CRU, jaki mocna zalez u daŭhi i pradavaŭ tajamnicy za najaŭnyja hrošy, u tym liku asoby aficeraŭ raźviedki ZŠA, jakija pavinny byli jechać u Kitaj. Mełary byŭ asudžany ŭ 2018 hodzie. Adnym słovam, pavodziny na dvoječku.
Apošnija padziei, takija jak uvarvańnie Rasii va Ukrainu i kanflikt pamiž Izrailem i CHAMASam, časova adciahnuli ŭvahu CRU ad Kitaja.
Ale navat niahledziačy na hetyja prablemy, administracyja Bajdena vyznačyła Kitaj samaj vialikaj pahrozaj amierykanskaj biaśpiecy. Ciapier heta niehałosny vorah numar adzin.
Adpaviedna, CRU pavialičyła biudžet i resursy, vydzielenyja amierykanskaj misii ŭ Kitai za apošnija try hady. Byŭ stvorany Centr kitajskaj misii — a heta adziny centr takoha kštałtu, stvorany pad ehidaj CRU, što tolki padkreślivaje surjoznaść namieraŭ Štataŭ.
Ale ž, viadoma, i Kitaj nie łykam šyty: za apošnija dziesiać hod jon zrabiŭ vializny technałahičny i ekanamičny skačok napierad.
U dziaržavie Si Czińpina dziejničajuć ledź nie oruełaŭskija sistemy sačeńnia, jakija značna ŭskładniajuć žyćcio Štatam i robiać špijonskija apieracyi ŭnutry krainy amal niemahčymymi.
Tym nie mienš, adnaŭleńnie špijonskaha patencyjału i atrymańnie infarmacyi pra płany kiraŭnictva Kitaja zastajucca najvažniejšymi metami dla CRU.
Pačynajučy ad 2020 hoda, CRU dy inšyja špijonskija ahienctvy ZŠA skaracili vydatki na baraćbu z teraryzmam i inšyja mety, u tym liku na Blizkim Uschodzie, kab prafinansavać prahramy pa praniknieńni va ŭrad Kitaja.
Dakładnyja ličby zasakrečanyja, ale čynoŭniki apisvajuć biudžetnyja źmieny jak značnyja.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary