Kałaž «Našaj Nivy»

Kałaž «Našaj Nivy»

Viaskovy chłopiec z Koziełaŭ

Andreju Alaksandravu 33 hady. Naradziŭsia ŭ vioscy Mańkavičy Stolinskaha rajona ŭ siamji Koziełaŭ — proźvišča jon źmienić užo paśla skančeńnia ŭniviersiteta. Niekali tut byŭ pałac Radziviłaŭ, a ŭ 1885-m Maryja Radzivił zakłała piejzažny park. Heta adna z najbolšych viosak Bresckaj vobłaści, žycharoŭ tut bolej za dźvie tysiačy.

Baćki ŭ Andreja prostyja — maci rabočaja na małočnym zavodzie, baćka — kiroŭca tam ža. Žonki ŭ prapahandysta niama.

Małady Andrej Kozieł (Alaksandraŭ). Fota: Ukantakcie

Małady Andrej Kozieł (Alaksandraŭ). Fota: Ukantakcie

Chłopiec u 18 hadoŭ paśpieŭ papracavać na Bresckim elektramiechaničnym zavodzie. Paśla pastupiŭ na žurfak BDU, adkul vypuściŭsia ŭ 2015-m.

Adzin z adnakurśnikaŭ zhadvaje, što Alaksandraŭ (Kozieł na toj momant) byŭ vychavanym chłopcam. Nie vykazvaŭ svajho staŭleńni ni da apazicyi, ni da ŭłady.

«Cichi chłopiec, u kampanii šmat žartavaŭ. Zusim nie kryvavy prapahandyst», — zhadvajuć jaho ŭ studenctvie.

«Ale i metanakiravanaść u jaho była davoli vidavočnaja: jon žadaŭ pracavać na TB, praktyku tam prachodziŭ i, zdajecca, mahčymaść mieć miesca ŭładkavańnia pry režymie macniejšaja za ŭłasnuju hodnaść. Tamu dla mianie było dziŭna nazirać hetu transfarmacyju, bo Andrej nie byŭ durniem ci złaŭmysnym».

Fota: instahram Alaksandrava

Fota: instahram Alaksandrava

U bazach «Kibierpartyzanaŭ» jaho miescam pracy ŭ 2013-m paznačanaje sielskahaspadarčaje pradpryjemstva «Hniaździłava Ahra» — imavierna, heta była karotkaja padpracoŭka na leta.

Adno z zachapleńniaŭ Alaksandrava-Kozieła — jahony bajk. Prapahandyst zajmieŭ sabie siaredniebiudžetnuju madel, a mienavita Honda VTX 1800. Jahony košt ciapier ad šaści da dziesiaci tysiač dalaraŭ. Naviedvaje jon i bajkierskija źloty, ź jakich robić repartažy na ANT.

Andrej Alaksandraŭ i jahony matacykł. Fota ź instahrama Alaksandrava

Andrej Alaksandraŭ i jahony matacykł. Fota ź instahrama Alaksandrava

Da pracy na ANT, miarkujučy pa instahramie Alaksandrava, padklučyŭsia i jahony małodšy 25-hadovy brat Jaŭhien. Jon, mierkavana, pracuje apierataram.

Andriej Alaksandraŭ z bratam Jaŭhienam. Fota ź instahrama Alaksandrava

Andriej Alaksandraŭ z bratam Jaŭhienam. Fota ź instahrama Alaksandrava

ANT i zorny čas

Kozieł pryjšoŭ na ANT nie paźniej za śniežań 2015-ha. Jon pracavaŭ u navinach, byŭ asnoŭnym hołasam ahučki i ŭ kadry amal nie źjaŭlaŭsia. Pisaŭ pra ŭsio zapar, ale pa palityčnych temach nie pracavaŭ zusim.

Pieršyja repartažy Andreja Kozieła na ANT, jaki paśla staŭ Alaksandravym. U kadry jaho tady nie było. Skryn sajta ANT

Pieršyja repartažy Andreja Kozieła na ANT, jaki paśla staŭ Alaksandravym. U kadry jaho tady nie było. Skryn sajta ANT

Z 2016-ha jon aficyjna źmianiaje proźvišča na Alaksandraŭ. Čamu mienavita hetaje proźvišča — nieviadoma. U siabrach u sacsietkach prapahandysta jość ludzi z takim proźviščam, ale siarod blizkich svajakoŭ takich niama.

U 2020-m karespandent, pa słovach byłych kaleh, niejki čas «stažyravaŭsia» ŭ praŭładnym telehram-kanale «Žoŭtyja ślivy».

Paśla Kozieł pracavaŭ na žanočych maršach, pad prykryćciom siłavikoŭ, dzie źjedliva dakopvaŭsia da ludziej. Paśla ŭ efiry ANT pačaŭ «vykryvać» prychilnikaŭ źmienaŭ u krainie. Uvohule, adčuvalnaja častka repartažaŭ prapahandysta z taho času maje palityčnuju afarboŭku, a niejtralnych usio mieniej.

Alaksandraŭ sprabuje apytać čałavieka pobač z žanočym maršam. Fota: ANT

Alaksandraŭ sprabuje apytać čałavieka pobač z žanočym maršam. Fota: ANT

U 2020-m u Alaksandrava adbyŭsia kurjoz: jon zajmieŭ administratyŭku pa artykule 23.34 («udzieł u niesankcyjanavanym masavym mierapryjemstvie»). Jaho zatrymali 16 kastryčnika 2020-ha i dastavili ŭ Saviecki RUUS Minska. U RUUS Alaksandraŭ skazaŭ, što jon biespracoŭny žychar Minska.

Praŭda, chodu spravie nie dali — vidać, razabralisia, što jon anijaki nie biespracoŭny.

U studzieni 2021-ha za addanuju pracu na prapahandu Alaksandraŭ atrymaŭ z ruk Łukašenki «prezidenckuju padziaku».

Andrej Alaksandraŭ atrymlivaje padziaku z ruk Łukašenki. Fota: pres-słužba Łukašenki

Andrej Alaksandraŭ atrymlivaje padziaku z ruk Łukašenki. Fota: pres-słužba Łukašenki

Što jon robić ciapier

Alaksandraŭ rychtavaŭ repartažy pra mihracyjny kryzis. Jon ulez u natoŭp mihrantaŭ, jakija atakavali polskich pamiežnikaŭ u listapadzie 2021-ha. Praz heta jaho razam z apierataram nakryła chvalaj piarcovaha hazu.

Alaksandraŭ u natoŭpie mihrantaŭ, jakija sprabujuć prarvacca praz polskuju miažu. Fota: ANT

Alaksandraŭ u natoŭpie mihrantaŭ, jakija sprabujuć prarvacca praz polskuju miažu. Fota: ANT

Ciapier Alaksandraŭ pužaje biełarusaŭ ZŠA i NATA, raspaviadaje pra žachi žyćcia va Ukrainie. I razam ź siłavikami jeździć na palityčnyja zatrymańni.

Adny z apošnich materyjałaŭ Alaksandrava. Skryn ANT

Adny z apošnich materyjałaŭ Alaksandrava. Skryn ANT

Naprykład, razam z SACHRam jon jeździŭ zatrymlivać abvinavačanych u atacy na bazu AMAP (u vieraśni 2021 hoda inicyjatyva «Busły laciać» atakavała jaje z drona).

Prapahandyst Andrej Alaksandraŭ dapytvaje zatrymanaha. Skryn videa ANT

Prapahandyst Andrej Alaksandraŭ dapytvaje zatrymanaha. Skryn videa ANT

Akramia siužetaŭ, Alaksandravu davieryli vieści pieradaču «Budzie dapoŭniena» (zvyčajna tam za viadučaha Ihar Tur).

Svajoj lubimaj knihaj jon nazyvaje «Fiermu» Orueła.

U adnym z intervju prapahandyst radavaŭsia: paśla 2020-ha nichto ź siabroŭ jaho nie asudziŭ.

«Nie było ŭ maim asiarodździ takoha čałavieka, jaki b ad mianie adviarnuŭsia i pačaŭ vydavać u moj adras niejkija hadaści».

Čytajcie taksama:

«Łukašenku lublu ŭsim svaim sercam». Chto takaja Vitalina Pietrusievič, jakaja stała tvaram prapahandysckich filmaŭ mahiloŭskaha telebačańnia

Prapahandystka Chudalej, jakaja pracavała na žanočych maršach, zvolniłasia z STB i šukaje pracu ŭ IT

Ad Zanzibara da Kyrhyzstana. Dzie adpačyvajuć praŭładnyja śpiavački i prapahandysty

Клас
14
Панылы сорам
26
Ха-ха
4
Ого
1
Сумна
4
Абуральна
65