Rašeńnie ab anulavańni DNŽ u Litvie bolš nie prypyniajecca pry abskardžańni ŭ sudzie. Čałaviek musić vyjechać z krainy
U Litvie z 1 lipienia pastanovy Departamienta mihracyi ab anulavańni dazvołu na žycharstva bolš nie prypyniajucca ŭ vypadku abskardžańnia ŭ sudzie. Pra heta havorycca ŭ kamientary, raźmieščanym na sajcie Departamienta.
Novy paradak ustanoŭleny papraŭkami da zakona «Ab pravavym stanoviščy zamiežnikaŭ», jakija ŭstupili ŭ siłu ŭ pačatku miesiaca, piša Reform.news.
«Z 1 lipienia 2024 hoda rašeńnie Departamienta mihracyi ab anulavańni dazvołu na žycharstva, vydadzienaha zamiežniku, bolš nie budzie aŭtamatyčna prypyniacca ŭ vypadku jaho abskardžańnia.
Heta aznačaje, što dazvoł na žycharstva zamiežnika budzie pryznany niesapraŭdnym niezaležna ad taho, abskardzić ci inšaziemiec rašeńnie Departamienta mihracyi ab anulavańni svajho dazvołu na žycharstva na praciahu 14 dzion ci nie.
Kali zamiežnik nie pakinie Litvu na praciahu 14 dzion paśla anulavańnia vidu na žycharstva, budzie vyniesiena rašeńnie ab jaho viartańni [na radzimu].
Kali rašeńnie ab viartańni nie budzie vykanana, inšaziemiec budzie departavany i jamu budzie zabaronieny ŭjezd u Litoŭskuju Respubliku», — paviedamili ŭ litoŭskim viedamstvie.
Da hetaha ŭ vypadku abskardžańnia rašeńnia Departamienta ŭ sudzie ŭ zamiežnikaŭ zachoŭvaŭsia časovy abo pastajanny dazvoł na žycharstva.
Raniej paviedamlałasia, što z 1 lipienia ŭ Litvie taksama zrabili bolš strohimi ŭmovy pracy zamiežnikaŭ. Ciapier nielha pracavać tym, chto pryjechaŭ pa biaźvizavym režymie, nacyjanalnych, šenhienskich vizach, a taksama dazvołach na žycharstva, vydadzienych inšymi krainami. Kab mieć prava na pracu, treba atrymać časovy dazvoł na žycharstva.
Kamientary
Cichanoŭskaja pavinna być nieadkładna adchilenaja ad jakoj-kolečy mahčymaści choć niešta navat kamientavać pa biełaruskim pytańni. Kožna raz jana štości havoryć - stanovicca tolki horš, jaje nichto nie pavažaje i vykarystoŭvajuć tolki ŭ svaich intaresach. Heta prynižeńnie biełaruskaha naroda.
Lepš nijakaha pradstaŭnictva, čym hetkaja hańba!