«Nie źviartać uvahi na mierkavańni marali na karyść kreatyŭnaści». Uzłamana pierapiska supracoŭnikaŭ rasijskaj raźviedki

Žurnalisty vydańnia The Insider zmahli atrymać dostup da pierapiski supracoŭnikaŭ Słužby vajennaj raźviedki Rasii (SVR), jakija adkazvajuć za «infarmacyjnuju vajnu» z Zachadam.

Hrupa supracoŭnikaŭ SVR, pierapiska jakich patrapiła ŭ ruki žurnalistaŭ, dziejničaje pad prykryćciom Mižnarodnaha centra biaśpieki «Miratvorac», stvoranaha ŭ śniežni 2020 hoda.

Klučavuju rolu ŭ arhanizacyi adyhryvaje 45-hadovy Michaił Kolesaŭ. Mužčyna słužyć u vajskovaj častcy 33949 (upraŭleńnie S) SVR, jakaja zajmajecca absłuhoŭvańniem špijonaŭ-nielehałaŭ. Adnačasova Kolesaŭ źjaŭlajecca aficeram FSB.

Pavialičyć

Akramia Kolesava, žurnalisty nazyvajuć imia Michaiła Kulomina, jaki źjaŭlajecca synam hienierała Alaksandra Kulomina z 12-ha hałoŭnaha ŭpraŭleńnia Ministerstva abarony Rasii, jakoje kuryruje jadziernaje ŭzbrajeńnie.

Kolesaŭ razam z Kulominym rychtavali analityčnyja daviedki ab infarmacyjnaj vajnie, jakija nakiroŭvali ŭ roznyja siłavyja i palityčnyja viedamstvy. Siarod ich — navukova-techničnaja słužba FSB, jakaja kuryruje hałoŭnaja chakierskaje padraździaleńnie i Instytut kryminalistyki.

Mietadyčka infarmacyjnaj vajny

Žurnalisty The Insider znajomiać sa źmiestam spravazdačy, jakuju Kolesaŭ i Kulomin pradstavili na kruhłym stale ŭ Saviecie Fiederacyi ŭ mai 2022 hoda.

Aŭtary prapanujuć dziejničać na froncie infarmacyjnaj vajny rašuča i ahresiŭna z metaj pahłybleńnia ŭnutranych supiarečnaściej pamiž praviačymi elitami krain Zachadu, eskałacyi antyŭradavych vystupaŭ i «razhojdvańnia» amorfnaj častki elektaratu.

Dla paśpiachovaści apieracyj prapanujecca padzialić aŭdytoryju na dźvie častki — racyjanalnuju i emacyjnuju. Dla kožnaj ź ich rychtavać i ŭkidvać u infarmacyjnuju prastory z rehularnaściu dva razy na tydzień asobnyja siužety. Pry hetym jany zaklikali bolš apielavać da emocyj (i pierš za ŭsio da strachu).

Dla raspaŭsiudžańnia roznaha rodu niehatyŭnych idej aficery prapanavali vykarystańnie novych internet-płatformaŭ zamiest sastarełych RT i Sputnik.

U jakaści takoj płatformy jany bačyli vydumanuju (ci śpiecyjalna stvoranuju ŭ virtualnaj prastory) niedziaržaŭnuju praŭkrainskuju arhanizacyju radykalnaha tołku, što dazvoliła b vyklučyć lubuju pryviazku da Rasii.

Pa mierkavańni SBŠnikaŭ, takaja płatforma «dazvolić tranślavać praktyčna lubyja tezisy, prapahandavać samyja lavackija idei i vysoŭvać patrabavańni palityčnaha i ekanamičnaha charaktaru až da samych absurdnych». Meta — dyskredytacyja «kijeŭskaha režymu» ŭ vačach «kalektyŭnaha Zachadu».

Aŭtary asobna padkreślivajuć, što dla vyrašeńnia pastaŭlenych zadač pry składańni kantentu «nieabchodna nie źviartać uvahi na mierkavańni marali na karyść kreatyŭnaści».

U dadatku da dakumienta Kolesaŭ pradstaviŭ kankretny płan vykanańnia pastaŭlenych zadač z rascenkami. U im zhadvajecca stvareńnie śpiecyjalnaha sajta pad vyhladam «infarmacyjnaha ahienctva» (jak varyjant — «ahienctva niezaležnych daśledavańniaŭ»), videarolikaŭ i na ich asnovie šortsaŭ, jakija publikujucca 1-2 razy na dzień, kampanija ŭ sacyjalnych sietkach i rassyłka ŭ miesiendžarach u adpaviednaści z «płanam hieałakacyi recypijentaŭ».

Taksama ŭ płanie arhanizacyja vuličnych akcyj u Jeŭropie z kolkaściu manifiestantaŭ da 100 čałaviek i rascenkaj pa 100 jeŭra na ŭdzielnika.

Realizacyja na praktycy

Žurnalisty źviartajuć uvahu, što źmiest «mietadyčki» całkam układvajecca ŭ łohiku nastupnych kampanij Kramla ŭ Jeŭropie i ZŠA. U jakaści prykładu jany pryvodziać sietku botaŭ Doppelganger, jakuju źviazvajuć z HRU, što zmahła pavialičyć svoj achop u Ch (Twitter) da 1,5 miljona čałaviek.

Praź jaje pieryjadyčna raspaŭsiudžvajucca roznyja fejkavyja paviedamleńni. Naprykład, fejkavyja antyŭkrainskija cytaty zachodnich znakamitaściaŭ ci dypfiejk, na jakim padroblenym hołasam Toma Kruza pužali teraktami na budučaj Alimpijadzie ŭ Paryžy.

Siarod pierapiski Kolesava i Kulomina žurnalisty znajšli kankretny prajekt pad nazvaj «Lesarub», nakiravany na dyskredytacyju rasijskaha emihranta ŭ ZŠA, jaki spansiravaŭ Fond baraćby z karupcyjaj, zasnavany Alaksiejem Navalnym.

Jaho prapanoŭvali pradstavić jak «hamaniec Kadyrava», jaki źbieh z čačenskimi hrašyma ŭ Bostan.

Jak vynikaje ź pierapiski, SBRaŭcy ličyli hety prajekt paśpiachova realizavanym. Sam ža bankir sa ździŭleńniem raskazaŭ The Insider, što hetaj kampanii pa svajoj dyskredytacyi navat nie zaŭvažyŭ.

• 5
• 2
• 3
• 0
• 1
• 0
• 3
• 0