Spytali ŭ ekśpierta, čaho čakać z cenami i zarobkami i nakolki možna budzie raźličvać na padtrymku Rasii.
Staršy navukovy supracoŭnik BEROC Dźmitryj Kruk vyłučaje try asnoŭnyja trendy, jakija čakajuć ekanomiku ciaham 2024 hoda.
Źniešni handal moža prasieści
Pa-pieršaje, na dumku ekśpierta, Biełaruś čakaje paharšeńnie stanu źniešniaha handlu. Adbyvacca heta budzie prynamsi praz toje, što buduć paharšacca ŭmovy dla ekspartu ŭ Rasiju.
«Cenavaja kankurentazdolnaść, stupień intensiŭnaści kankurencyi buduć paharšacca. Akramia taho, praciahnuć paharšacca suadnosiny cenaŭ usiaho ekspartu i ŭsiaho impartu. Z trochi mienšaj imaviernaściu da hetaha jašče moža dadacca źmianšeńnie ci navat abrynańnie stratehičnych ekspartnych pazicyj — kalijnych uhnajeńniaŭ i naftapraduktaŭ, kali raptam Rasija nie zachoča ich łahistyčna padtrymlivać abo palityčnaja vola na takoha kštałtu padtrymku ŭ Rasii pamienšycca. Taksama heta moža adbycca ŭ vyniku ŭpłyvu sankcyj na samu Rasiju», — miarkuje ekśpiert.
Paskorycca inflacyja
Druhim trendam nastupnaha hoda ekanamist nazyvaje paskareńnie inflacyi. Jakim budzie jaje ŭzrovień i jak chutka jana budzie paskaracca, zaležyć ad niekalkich faktaraŭ — stanu rasijskaj ekanomiki, inflacyi ŭ RF, palityki Nacbanka, stupieni žorstkaści realizacyi 713-j pastanovy.
Pa słovach Kruka, u adnosna aptymistyčnym scenary inflacyja ŭ 2024 hodzie pastupova piarojdzie ŭ dyjapazon 7-10%, a ŭ najhoršym — stanie niepradkazalnaj.
Realnyja dachody mohuć pierastać raści
Trecim trendam Dźmitryj Kruk nazyvaje paharšeńnie finansavaha stanu realnaha siektaru ekanomiki.
«Hety praces pastupova ŭžo adbyvajecca, ale ŭ 2024-m hetaja prablema stanie bolš žorstkaj. «Finansavy tłušč» bolšaść pradpryjemstvaŭ i firmaŭ užo prajeli, a vydatki praciahvajuć raści. Praz niedachop pracoŭnaj siły davodzicca pavyšać zarobki.
Ale rabić heta takimi ž tempami, jak u 2023, budzie ŭsie bolš prablematyčna. Biznes budzie vymušany šukać bałans pamiž svaim finansavym stanoviščam i nieabchodnaściu zachavać rabotnikaŭ. U vyniku rost realnych zarobkaŭ u 2024 hodzie jak minimum zapavolicca. A ŭ horšym vypadku realnyja zarobki naohuł mohuć «raźviarnucca» i pačać źnižacca», — kaža Dźmitryj Kruk.
Siarod inšych niehatyŭnych faktaraŭ, jakija buduć upłyvać na finansavy stan realnaha siektara, ekanamist nazyvaje rost cen na kamplektujučyja z Rasii, bo tam intensifikavałasia inflacyja.
«Pry hetym ceny ŭnutry krainy adekvatna padniać nielha praz 713-ju pastanovu, a za miažoj popyt i kanjunktura paharšajucca», — adznačaje Kruk.
Čytajcie taksama:
«Prapanujem 2000-2500 rubloŭ na ruki — zakryć vakansii niama kim». Biznes nie moža znajści rabotnikaŭ
Kitajskija mašyny zamiest jeŭrapiejskich, čerhi pa Geely, luksavyja aŭto dla rasijan. Jak za hod źmianiŭsia aŭtamabilny rynak
Kamientary