U jaje tysiačy padpisčykaŭ, na spatkańni jaje zaprašajuć sielebryci, jana dobra zarablaje i maje mocny charaktar. Ale heta dziaŭčyna — štučny intelekt

Ajtana Łopiez — pieršaja ŭ Ispanii štučnaja madel, stvoranaja ispanskim dyzajnierskim ahienctvam The Clueless. U intervju Euronews kiraŭnik ahienctva Rubien Kruz raspavioŭ, jak mienavita źjaviłasia ideja stvaryć Ajtanu.

«My pačali analizavać našu pracu i zrazumieli, što šmat prajektaŭ adkładvajecca albo admianiajecca praź niezaležnyja ad nas pryčyny.

U ciažki dla ahienctva pieryjad źjaviłasia ideja stvaryć svajho ŭłasnaha influjensiera. Tak i «naradziłasia» Ajtana, jakaja stała madellu dla brendaŭ, jakija źviartalisia ŭ The Clueless. Jana zarablaje ŭ siarednim 3 tysiačy jeŭra na miesiac, adnak byli i takija časy, kali zarobak Ajtany składaŭ zvyš 10 tysiač jeŭra», — raskazaŭ ahiencvu Euronews Rubien Kruz.

Kruz adznačyŭ, što virtualnaja dziaŭčyna była stvorana dla taho, kab zabiaśpiečyć niezaležnaść kampanij ad sapraŭdnych madelaŭ, «jakija chočuć zarabić hrošaj, prosta pazirujučy pierad kamieraj». 

Štučnaja Ajtana ŭžo stała tvaram kampanii Big, jakaja vyrablaje dabaŭki dla spartyŭnaha charčavańnia, zaviała akaŭnt na Fanvue (płatforma, padobnaja da OnlyFans). Na instahram Ajtany za niekalki miesiacaŭ padpisałasia 145 tysiač padpisčykaŭ, a joj u asabistyja pišuć navat niekatoryja sielebryci, sprabujučy zaprasić dziaŭčynu na spatkańnie.

«Adnojčy viadomy łacinaamierykanski akcior zaprasiŭ jaje na spatkańnie. Jon navat nie ŭśviedamlaŭ, što Ajtana — virtualnaja madel», — padzialiŭsia Kruz.

Pavialičyć

Žyćciom madeli kiruje cełaja kamanda śpiecyjalistaŭ. Kožny tydzień u ahienctvie The Clueless prachodzić narada pa temie, što mienavita budzie rabić Ajtana ŭ nastupnyja 7 dzion.

Supracoŭniki vyrašajuć, kudy jana pojdzie i što zapościć u sacsietkach. U The Clueless chutka zrazumieli, što ludzi ŭ internecie pierš za ŭsio sočać za žyćciom, a nie za vobrazami, piša Euronews.

Ajtana, jak śćviardžajuć stvaralniki, heta čystaja papiera dla dyzajnieraŭ. Jana maje jarkuju źniešnaść i mocnyja piersanalnyja jakaści. Dziaŭčynu prydumali jak metanakiravanuju asobu sa składanym charaktaram, nadzialiŭšy jaje ŭsim tym, što siońnia bolš za ŭsio padabajecca hramadstvu. Tamu madel maje ružovyja vałasy i lubić kampjutarnyja hulni.

Navat imia Ajtana było prydumana nie vypadkova — pieršyja dźvie litary imieni dziaŭčyny źjaŭlajucca abrevijaturaj štučnaha intelektu», — zajavili ŭ ahienctvie The Clueless.

Paśla stvareńnia Ajtany ŭ The Clueless stała pastupać značna bolš prapanoŭ ab supracoŭnictvie. Pavodle Robina Kruza, šmat kampanij nie chočuć pracavać z sapraŭdnymi madelami, bo bajacca prablem z aŭtarskimi pravami paśla ich raptoŭnaha sychodu. Da taho ž heta istotnaja ekanomija hrošaj, dadaŭ Kruz.

U dyzajnierskim ahienctvie ličać, što takija štučnyja madeli zmohuć dapamahčy raźvićciu małoha biznesu, jaki nie moža sabie dazvolić darahich madelaŭ-ambasadaraŭ.

Adnak znajšlisia i tyja, chto krytykuje hetu ideju. Ludzi zaniepakojeny, što vyhlad virtualnaj madeli moža paŭpłyvać na moładź, jakaja stanie apantanaj dasiahnieńniem takich ideałaŭ pryhažości. Krytykujuć i źniešni vyhlad Ajtany, nazyvajučy jaho «zanadta seksualnym», pieradaje Euronews.

• 7
• 0
• 8
• 12
• 7
• 4
• 1
• 0