Miehazorki buduć usiudy i adrazu. Jak štučny intelekt źmienić śviet muzyki i kino

Kampjutary ciaham dziesiacihodździaŭ pastupova źmianiali zvykłyja pracoŭnyja miescy i rynak pracy ŭvohule. A siońnia štučny intelekt užo prychodzić u samyja niečakanyja śfiery. Nie stała vyklučeńniem i mastactva. Halivud niekalki miesiacaŭ nie moh pracavać napoŭnuju, pakul studyi nie pahadzilisia prapanavać jarkim zorkam abaronu ad ŠI-kankurentaŭ; a Džon Lenan, «uvaskrešany» štučnym intelektam, apiaredziŭ usich žyvych artystaŭ u muzyčnych chit-paradach mnohich krain. Vyhladaje, što šou-biźnies pieražyvaje sapraŭdy histaryčnyja časy.

«Heta ž užo było»

Heta nie pieršy vypadak, kali technałohii źmianiajuć praviły hulni ŭ ciažkaj spravie zavajavańnia słavy, napaminaje The Economist. Pra «zorak» pačali havaryć u XVIII stahodździ — paśla taho, jak pašyreńnie čytańnia dazvoliła stać pa-sapraŭdnamu znakamitym jašče pry žyćci. Kino i radyjo spačatku zdavalisia pahrozaj dla tahačasnych zorak: jany pieražyvali, što ich žyvyja vystupy buduć abiascenienyja. Adnak novyja technałohii adkryli eru «supierzorak» — termin, jaki pryžyŭsia ŭ 1920-ch hadach. 

Padobnaja zornaja panika nazirałasia i paśla vynachodnictva telebačańnia (heta, darečy, pryviało da vialikaj halivudskaj zabastoŭki ŭ 1960 h.). Ale i ŭ hety raz novaja technałohija zrabiła znakamitaściaŭ jašče bolš znakamitymi, pieranosiačy ich u kožnuju haścinuju ŭ kožnaj chacie. Da 1960-ch hadoŭ ludzi ŭžo havaryli pra «miehazorak».

Ci jość ciapier pryčyny dla zornaj paniki

Adnym z paradoksaŭ epochi internetu źjaŭlajecca toje, što, niahledziačy na ​​vializnyja abjomy samaha raznastajnaha kantentu na luby hust, u vyniku samyja viadomyja chity najbujniejšych vykanaŭcaŭ stanoviacca jašče bolš papularnymi. 

Kolkaść muzykaŭ, jakija zarablajuć na Spotify bolš za 1000 dalaraŭ u hod, pavialičyłasia bolš čym udvaja za apošnija šeść hadoŭ; pry hetym kolkaść muzykaŭ, jakija zarablajuć bolš za 10 miljonaŭ dalaraŭ u hod, pavialičyłasia ŭ piać razoŭ. Niahledziačy na ​​​​toje, što navat nišavy kantent kvitnieje (majucca na ŭvazie zusim ekzatyčnyja napramki muzyki), Tejłar Śvift zaraz hastraluje ci nie z samym prybytkovym kancertnym turam u historyi muzyki. To ž pakul cierpiać mienavita artysty siaredniaha ranhu.

Padobnyja tendencyi tyčacca ŭsiaho zabaŭlalnaha rynku. Štohadovaja kolkaść poŭnamietražnych filmaŭ padvoiłasia za apošnija dva dziesiacihodździ, ale najbujniejšyja błokbastary adnačasova padvoili svaju dolu ŭ ahulnym prakacie. Chvala samvydataŭskich knih nie pamienšyła prodažy zornych piśmieńnikaŭ. Pry lišku prapanovy ŭ hetym vializnym akijanie raznastajnaha vybaru aŭdytoryja bolš spadziajecca na rekamiendacyi — jak ałharytmičnyja, tak i čałaviečyja — jakija nakiroŭvajuć ich da najpapularniejšaha kantentu. ŠI ž abiacaje jašče bolšy vybar i, takim čynam, jašče vyšejšyja pošukavyja vydatki dla aŭdytoryi, jakaja budzie, jak i raniej, ciahnucca da žmieńki zorak na samaj viaršyni.

ŠI daść hetym miehazorkam mahčymaść być sapraŭdy paŭsiudnymi dla svaich fanataŭ. Dublaž z dapamohaj ŠI ŭžo dazvalaje akcioram i padkastaram razmaŭlać «svaim» hołasam z zamiežnaj aŭdytoryjaj, ale pry hetym na ich rodnaj movie. Možna čakać, što nieŭzabavie i videa budzie standartna redahavacca tak, kab ruchi vusnaŭ taksama adpaviadali kožnaj movie. 

Zapatrabavanyja akciory taksama mohuć atrymać bolš pracy, tamu što ŠI likviduje adviečnuju halivudskuju prablemu zahružanych hrafikaŭ, dazvalajučy zorkam vystupać razam, pry hetym nie budučy razam fizična. A ličbavy botaks nie tolki padoŭžyć termin prydatnaści akcioraŭ, ale j vierahodna dazvolić im vystupać navat paśla śmierci. Kampanija «Dyśniej», naprykład, nabyła pravy na hołas 92-hadovaha Džejmsa Erła Džonsa, znakamitaha svajoj ahučkaj Darta Viejdera ŭ «Zornych vojnach», kab toj moh pałochać małych svaim hołasam i dalej.

Usio, usiudy i adrazu

Zorki taksama zmohuć vystupać pierad fanatami ŭ farmatach, jakija tolki pačynajuć zaradžacca. Avatary ABBA, na łondanskaje šou jakich kvitki raspradavalisia ažno siem razoŭ za tydzień; čat-boty z hałasami znakamitaściaŭ, niadaŭna zapuščanyja Meta, — usio heta heta tolki pačatak.

Usie hetyja novyja mahčymaści prychodziać z peŭnymi ŭmovami. Mastaki majuć racyju, kali turbujucca ab aŭtarskich pravach. Ale i ŭ minułym z prychodam novych technałohij rašeńni znachodzilisia: drukarski stanok pryvioŭ da pieršych zakonaŭ ab aŭtarskim pravie ŭ XVIII stahodździ; u 1960-ja hady praviły vypłaty rojałci karektavalisia, kab kampiensavać akcioram vialikaha ekrana pakaz prac ź ich udziełam pa telebačańni; a stryminhavyja kampanii navučylisia damaŭlacca z hukazapisvalnymi kampanijami i niepasredna artystami. Jak buduć vyrašacca pytańni aŭtarskich pravoŭ u eru ŠI, pakul nie da kanca zrazumieła, ale pieršyja kroki pa ŭrehulavańni hetych pytańniaŭ užo robiacca.

Nie mienš važnym vyhladaje pytańnie ab tym, nakolki novaja era spadabajecca spažyŭcam. Mažlivaja ryzyka tut — zvyčajnaja nuda. ŠI bliskuča spraŭlajecca z remiksavańniem i pierarobkaj staroha materyjału, ale horš pačuvaje siabie ŭ stvareńni niečaha asablivaha, što prynosić adčuvańnie murašak na skury. Zdajecca, apošniaje pakul jašče pad siłu tolki čałavieku. 

Tym časam ad raźvićcia ŠI mohuć vyjhrać vidavočna i kinastudyi, i hukazapisvalnyja kampanii, i inšyja pasredniki, jakija źviazany z mastactvam i zvyčajna addajuć pieravahu minimizacyi finansavych ryzyk, prytrymlivajučysia pravieranych časam idej. Halivud užo addaje pieravahu franšyzam, a nie novym tvoram, što možna pabačyć pa vialikaj kolkaści sikviełaŭ i pierazahruzak starych tvoraŭ u prakacie.

ŠI dazvolić studyjam prymianiać toj ža pryncyp da akcioraŭ. Možna ŭjavić, jak «amałodžany» Luk Skajuokier vykonvaje hałoŭnuju rolu ŭ apošnim śpin-ofie «Zornych vojnaŭ» studyi «Dyśniej». Pakul takaja chitraść vyklikaje ŭ hledačoŭ zachapleńnie, ale spažyŭcam moža heta nadakučyć zadoŭha da vychadu «Farsažu-94».

Tym nie mienš, rynak zabaŭ u vialikaj stupieni ŭjaŭlaje saboj samarehulavanuju źjavu. Spažyŭcy vałodajuć siłaj u adno imhnieńnie pieratvaryć haračy pradukt u nikomu nie cikavy, pra što zorki vielmi dobra viedajuć. I navat pa miery taho, jak kolkaść zabavaŭ na bazie ŠI raście, spažyŭcam, zdajecca, usio jašče padabajecca čałaviečaja drama. Tak, kaštoŭnaść sportu — napeŭna, samaha abaronienaha ad štučnaha intelektu vidovišča — u apošnija hady mocna ŭzrasła dla miedyjakampanij (miž tym, nichto nie hladzić, naprykład, spabornictvy pa kampjutarnych šachmatach, choć lepšyja ŠI-hulcy mohuć pieramahčy luboha čałavieka). 

Bolš za toje, vierahodna, ŠI paspryjaje jašče bolšamu pahłybleńniu nišavaści, robiačy kantent bolš piersanalizavanym. I choć miehazorki stanuć jašče bolš mieha i jašče bolš zorkami, spažyŭcu, jaki zanudziŭsia, pieraklučyć kanał stanie praściej, čym kali-niebudź.

• 4
• 0
• 0
• 3
• 1
• 1
• 2
• 0