«Ciapier jość Kamaroŭka, čyrvony dvoryk, lubimaja kniharnia i bataničny sad». Biełaruska stvaraje duchmianyja śviečki z pacham miescaŭ Minska
Dva hady tamu Kaciaryna pierajechała ź Minska ŭ Vilniu. Tady ž dziaŭčyna pačała zajmacca stvareńniem śviečak. I nie prostych, a z pacham darahich sercu miescaŭ rodnaha horada. Svaju pieršuju kalekcyju nazvała prosta: Minsk edition, piša CityDog.io.
Kaciarynie 30 hadoŭ, pa adukacyi jana technołah, za hady pierasprabavała šmat prafiesij: ad majstra manikiuru da rekrutara ŭ ajci-kampanii.
Dva hady tamu jana ź siamjoj vyrašała pierabracca ź Minska ŭ Vilniu. Padčas adaptacyi ŭ novym horadzie dziaŭčyna zadumałasia pra toje, što chacieła b zaniacca novym chobi. Vybrała śviečki. Kaciaryna — stvaralnica śviečak z pacham Minska.
«Ja zaŭsiody lubiła aramatyčnyja śviečki, časta ich kuplała dadomu dla stvareńnia vyhody i atmaśfiery. Praŭda, adnyja aramatyzavali prastoru dobra, a inšyja — nie. Tady ja vyrašyła daviedacca, čamu tak adbyvajecca? — dzielicca ramieśnica. — Prajšła navučańnie pa śviečkavareńni, zakupiła tony materyjałaŭ i pačała biaskoncaje testavańnie.
Było vielmi cikava i mianie nie adpuskała. Spačatku ja varyła śviečki dla siabie i siabroŭ. Atrymlivała šmat vodhukaŭ, i pa vyniku navažyłasia na stvareńnie svajho brenda.
Nazva pryjšła dosyć chutka. U čarhovaj razmovie ź siastroj ja dzialiłasia svaimi idejami i dumkami ab prajekcie. Časta dumaju pra dom, jak sumuju pa im. Tak i naradzilisia DUMKi. Dalej usio skłałasia, niby pazł. Zrazumieła, što treba adšturchoŭvacca ad miescaŭ lubimaha horada i zachavać ich na etykietkach».
Pra vodary śviečak: «Usie jany źviazanyja ź lubimymi miescami»
Pieršaja kalekcyja brenda DUMKi składajecca z 4-ch aramatyčnych śviečak i nazyvajecca Minѕk edition. Dla vizualizacyi svajoj kalekcyi ja znajšła lepšuju dyzajnierku. Jana vielmi dapamahała mnie ŭ realizacyi idei: malavała nalepki i paštoŭki mienavita tak, jak ja apisvała, dapamahła stvaryć ekałahičnuju ŭpakoŭku. Na vychadzie śviečki atrymalisia mienavita takimi, jakija ja zadumała.
Siarod vodaraŭ jość «Kamaroŭka». Hetaja śviečka z pacham śviežych sadaviny i zielaniny. Jana była abaviazkovaja, bo amal va ŭsich maich znajomych na hetym rynku jość lubimaje miesca, dzie kuplajuć samyja smačnyja kavuny.
Vodar «Čyrvony dvoryk» adsyłaje da viečara piatnicy, kali možna sabracca ź siabrami. Prysutničajuć noty jahad i šampanskaha.
Nastupnaja śviečka — pad nazvaj «Bataničny sad». My časta hulali tam ź siamjoj. Dla mianie hetaje miesca — pra ciapło, viasnu i abaviazkova kvietki. U maim telefonie da hetaha času nieźličonaja kolkaść fatahrafij adtul.
U liniejcy jość śviečka, natchnionaja vielmi atmaśfiernaj bukinistyčnaj kramaj «Vianok» u Trajeckim pradmieści. Tam začaroŭvaje pach starych knih i skuranych natatnikaŭ.
Ab pracesie stvareńnia śviečak: «Samaje ciažkaje — čakać»
Śviečki majho brenda stvarajucca z naturalnaha sojevaha vosku. Aromaalei nie ŭtrymlivajuć ftałataŭ i majuć mižnarodnyja siertyfikaty IFRA (Mižnarodnaja asacyjacyja pa aramatyčnych rečyvach). U siaredzinie — draŭlany kryžapadobny knot. Jon pryjemna patreskvaje i vurčyć, stvarajučy tym samym jašče bolš vyhodaŭ.
Śviečki robiacca dosyć chutka, ale kožnaj nieabchodna nastajacca jak minimum 14 dzion, kab usio, što jaje składaje, «pasiabravała». Tolki tak jana budzie dobra aramatyzavać prastoru.
Z hetaha vynikaje pieršaja składanaść u śviečkavareńni dla mianie: najaŭnaść ciarpieńnia. U samym pačatku svajho šlachu ja zapalvała śviečku litaralna na nastupny dzień paśla jaje vyrabu. Cikava było daviedacca, ci dobra ŭsio atrymlivajecca ŭ mianie. Tak lepš nie rabić: vodaraaddača vielmi zaležyć ad hetaha etapu. Tamu ciapier ja čakaju i štodnia rablu pravieračnyja «zaniuchi».
Druhaja składanaść — vybar aramatyčnych alejaŭ. Čaściej za ŭsio apisańnie vodaraŭ dla śviečak vyhladaje prykładna tak: «Pach rasy a 5-j ranicy ŭ elfijskim lesie z notkami mandaryna». Spačatku ja skuplała ich usie i vybirała patrebnyja ŭžo pa fakcie.
Tak, naprykład, naradziłasia śviečka «Kamaroŭka», jana ž Seasonal market. U apisańni da jaje vodaru było napisana niešta pra śviežasarvany revień u babuli ŭ aharodzie. Na heta sychodziła šmat tydniaŭ čakańnia, tamu što alei pryjazdžali z roznych kutkoŭ Jeŭropy.
Pra budučyja kalekcyi: «U płanach — liniejka śviečak z kaladnym Minskam»
Ja aktyŭna raźvivaju svoj brend, udzielničaju ŭ kirmašach. Maje śviečki ŭžo pradstaŭlenyja ŭ adnym z šourumaŭ Vilni, ja zakachanaja ŭ svaju spravu i budu praciahvać joj zajmacca.
Niadaŭna vyjšli vosieńskija navinki vodaraŭ pa matyvach Vilni i Bałtyjskaha mora, taksama vielmi papularnyja ŭ hetym siezonie. U najbližejšy čas ja pradstaŭlu kaladnuju kalekcyju, z novymi, ale takimi znajomymi miescami lubimaha Minska.
Kolki kaštujuć śviečki i dzie ich možna kupić?
Košt adnoj śviečki 20 jeŭra. Jaje abjom 190 mł, haryć jana kala 25 hadzin. Zabrać možna samomu z majho šourumu ŭ Vilni (Šeimyniškių g. 14). Ci zamović dastaŭku poštaj pa Jeŭropie.
Z dastaŭkaj u Biełaruś składaniej: ja zvyčajna pieradavała śviečki praź siabroŭ albo z kimści. Pakul praktykavała tolki taki sposab, ale možna damovicca praz dyrekt instahrama.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary