Biełarus znajšoŭ čarviakoŭ u suchoj sumiesi dla hatavańnia supu. Što rabić u takoj situacyi?
Mužčyna advaryŭ miasa, dadaŭ da jaho suchuju sumieś z pakunačka i na niejki čas vyjšaŭ z kuchni. A kali viarnuŭsia i zazirnuŭ u kastrulu, to pabačyŭ: na pavierchniu vady ŭspłyli čarviaki.
«Syn paprasiŭ u mianie pryhatavać sup-rasolnik, a pakolki ja tata-adzinočka, to vyrašyŭ kupić suchi kancentrat dla rasolnika, — raspaviadaje čytač Onliner.by Dzianis. — U vyniku ŭvieś rondal daviałosia vykinuć»
Dzianis znajšoŭ kantakty kramy i napisaŭ u Viber — paprasiŭ tłumačeńniaŭ. Tam jamu adkazali, što adkryli dakładna taki ž pakiecik z sumieśsiu dla supu i čarviakoŭ nie znajšli. Ale viernuć pakupniku vypłačanyja 1,5 rubla.
Mužčyna takim rašeńniem niezadavoleny: jon choča kampiensacyi za miasa. Jamu admovili. «U kramie navat nie vybačylisia, mnie heta vielmi niepryjemna. Ja napisaŭ skarhu ŭ sanstancyju, niachaj ich ciapier pravierać», — kaža mužčyna.
Kali tavar (sumieś dla supa) akazaŭsia drenny, ci pavinien mahazin kampiensavać Dzianisu sapsavanaje miasa? I jak naohuł dakazać, što čarviaki byli va ŭpakoŭcy pieršapačatkova i jany byli mienavita ŭ supavoj asnovie, a nie, skažam, u miasie? Hetyja pytańni zadali jurystu.
Jak pastupać u takich situacyjach? Tłumačyć juryst
Juryst, śpiecyjalist pa pravach spažyŭcoŭ Ivan Rajkievič kaža, što hetaja situacyja nie ŭnikalnaja, u praduktach raz-poraz traplajucca takija siurpryzy: «datyčna dokazaŭ: ciažar dokazu ŭ hetym vypadku lažyć niepasredna na pradaŭcu, mienavita jon abaviazany dakazać, što jaho tavar jakasny.
Ale kali sprava dojdzie da sudu, pakupniku dla paćvierdžańnia svaich słoŭ pažadana zabiaśpiečyć dokaznuju bazu, kali raptam pradaviec pačnie dakazvać advarotnaje. Dokazami z boku pakupnika taho faktu, što čarviaki patrapili ŭ rondal mienavita z supavy sumiesi, mohuć stać niepasredna reštki samoha praduktu, śviedkavyja pakazańni, ekśpiertyza, videazapis.
U apisanym vypadku hatoŭnaść arhanizacyi handlu viarnuć spažyŭcu hrašovyja srodki za niajakasny tavar u sumie 1,5 biełaruskich rubla źjaŭlajecca pryznańniem taho, što tavar sapraŭdy byŭ niajakasny.
Zhodna z punktam 2 artykuła 15, punktam 2 artykuła 25 zakona Respubliki Biełaruś «Ab abaronie pravoŭ spažyŭcoŭ», straty, naniesienyja spažyŭcu, padlahajuć kampiensacyi ŭ poŭnym abjomie zvyš niaŭstojki, ustanoŭlenaj zakanadaŭstvam abo dahavoram. Takija patrabavańni padlahajuć zadavalnieńniu nieadkładna, a kali zrabić heta nieadkładna niemahčyma — na praciahu 7 dzion z dnia paćvierdžańnia spažyŭcom pamieru strat.
Pry ŭźniknieńni takoj situacyi spažyŭcu varta zafiksavać usio, što adbyłosia, na videa, kali jość śviedki (u tym liku členy siamji), pakłapacicca ab tym, kab jany taksama źviarnuli ŭvahu na jakaść praduktu.
Nieabchodna zachavać upakoŭku i reštki niavykarystanaha tavaru. Dalej treba źviarnucca ŭ kramu (možna praz knihu zaŭvah i prapanoŭ) z patrabavańniem ab skasavańni dahavora kupli-prodažu i kampiensacyi strat (z dadatkam dokazaŭ, a taksama paćviardžeńniem pamieru strat (ček na miasa, źviestki ab canie miasa ŭ arhanizacyi handlu i servisu, uzvažvańnie sapsavanaha kavałka miasa i t.d.)). Na praciahu 7 dzion spažyŭcu abaviazany kampiensavać straty, a taksama viarnuć hrošy za niajakasny tavar, u advarotnym vypadku bakam daviadziecca raźbiracca ŭ sudzie».
Maładuju supracoŭnicu «Pielenha» aryštavali za «zakliki da naniasieńnia škody Biełarusi». Joj pahražaje da 12 hadoŭ3
Kamientary