Belita vypuściła hiel dla duša, jaki «ŭpłyvaje na emocyi». Navukoviec: «Heta infamachlarstva»

Učora ŭ instahramie Belita vyjšaŭ post pra kalekcyju hielaŭ-pachaŭ dla dušu From Belita with love. Pavodle vytvorcy, raspracoŭščyki novaha praduktu vykarystali aramatyčnuju technałohiju pad nazvaj Actimood Technology. Jana byccam «sčytvaje mazhavyja chvali čałavieka i analizuje, jak toj ci inšy pach upłyvaje na zapusk emocyj — dadaje radaść ci supakajeńnie, rassłableńnie ci pryciahalnaść».

Taksama, zhodna z publikacyjaj u instahramie Belita, kampazicyi pachaŭ hetaj kalekcyi jašče i «prymajuć udzieł u stvareńni roznych emocyj» — dorać «asałodu, rassłableńnie i pryciahalnaść». Kaštuje mahičnaja butelka 7 rubloŭ 14 kapiejek.

Hučyć niepraŭdapadobna, ci nie tak? Dla taho kab vydzialić (identyfikavać) mazhavyja chvali (ci, kažučy pa-navukovamu, rytmy hałaŭnoha mozhu), nie treba prydumlać nijakija novyja technałohii, z hetaj zadačaj vydatna spravicca mietad elektraencefałahrafii (EEH). Paznačanyja ŭ paście rassłableńnie i pryciahalnaść — heta nie emocyi. Narešcie, pra ŭpłyŭ pachaŭ na emacyjny stan čałavieka daŭno viadoma, i dla hetaha znoŭ ža nie treba stvarać niejkich inavacyjnych technałohij.

Što za mietad Actimood Technology? U červieni 2022-ha kampanija Symrise, niamiecki vytvorca aramatyzataraŭ, praduktaŭ charčavańnia, kaśmietyki i parfumieryi, zapuściŭ zapatentavanuju prahramu Actimood. Jaje sens — u stvareńni pachaŭ, jakija byccam by ŭpłyvali na nastroj klijentaŭ i źmianiali b jaho, naprykład, u bok adčuvańnia abaronienaści, rełaksacyi, enierhii ci asałody. U internet-kramie Belita na staroncy hiela paznačana: «Efiektyŭnaść pachu dakazanaja kampanijaj Symrise (Hiermanija)».

Niamiecki vytvorca ničoha nie kaža pra toje, jakim čynam raspracavanaja hetaja prahrama. My taksama nie zdoleli znajści, jakija navukovyja danyja stajać za «inavacyjaj» ad Belita. 

Źjaŭleńnie navinki ad Belita prakamientavaŭ navukoviec Siarhiej Biesarab: 

«Uździejańnie lubych pryjemnych pachaŭ budzie davać stanoŭčy efiekt, i tut nie patrebnyja ni hieli ad Belita, ni Actimood. Važny tolki adzin niuans — dla kožnaha asobnaha čałavieka budzie roznym paniaćcie pryjemnaha i niepryjemnaha pachu.

Na ŭsprymańnie pachu vielmi mocna ŭpłyvaje ŭzrost, poł i stan zdaroŭja paddoślednaha. Usprymańnie taksama zaležyć ad minułaha dośviedu kantaktu z peŭnym pacham (suviaź z peŭnaj padziejaj ci emocyjaj), ad kahnityŭnych ustanovak čałavieka adnosna čakanaha pachu, navat ad asablivaściaŭ kultury paddoślednaha. Pach budzie ŭsprymacca pa-roznamu pry roznych sposabach dastaŭki i času ŭździejańnia. Pakul niama sposabaŭ unifikavać upłyŭ usich pachaŭ, niama navat adzinaj ich kłasifikacyi».

Biesarab kaža, što ŭsie śćviardžeńni pra zdolnaść pachaŭ vyklikać ustojlivyja emocyi ŭ adnych i tych ža hrup ludziej — heta nie bolš čym navukapadobny papulizm abo taki ž markietynh.

Jon taksama ličyć, što ŭ hetaj historyi razmovy pra mazhavyja chvali ni pry čym: luby pach vyklikaje źmianieńnie mazhavoha rytmu, jakoje možna zafiksavać z dapamohaj EEH, i nie bolš za toje. Kali hety pach i vyklikaje niejkuju emocyju, vyznačyć jaje z dapamohaj vyvučeńnia mazhavych rytmaŭ nie ŭdasca.

U kamientary «Našaj Nivie» navukoviec robić vysnovu: «Hetyja hieli — absalutna tannaje infamachlarstva, jakoje ekspłuatuje zvyčajny fizijałahičny efiekt».

Bjuci-srodki dla vahiny: što heta takoje i ci ŭchvalaje hiniekołah

Novy trend u tyktoku: karystalnikaŭ adhavorvajuć kuplać niepatrebnaje

«Dla kaho ty tut maluješsia?» — «Dla siabie». Byłaja palitźniavolenaja Volha Kłaskoŭskaja raskazała, jak heta —žančynie sačyć za saboj u katoŭniach

• 4
• 0
• 8
• 1
• 0
• 1
• 0
• 0