U toj čas, jak na miažy ź siektaram Haza kancentrujecca vielizarnaja hrupoŭka izrailskich vojskaŭ — sotni tysiač sałdat terminovaj słužby i reziervistaŭ, — izrailski ŭrad staić pierad najskładaniejšym vybaram.
U siektary Haza ŭtrymlivajucca prynamsi 150 izrailskich zakładnikaŭ, uklučajučy žančyn, dziaciej i starych, i ŭ vypadku poŭnamaštabnaha ŭvarvańnia CACHAŁ u siektar, jakoje, jak niekatoryja čakajuć, moža pačacca najbližejšym časam, usie jany mohuć być zabityja, piša Bi-bi-si.
Nichto nie nastrojeny na kampramis
Jak miarkujecca, Katar, Jehipiet i, mahčyma, inšyja arabskija krainy viaduć zakulisnyja pieramovy z CHAMAS ab vyzvaleńni zakładnikaŭ, choć by častkovym.
Adna z prapanoŭ — abmianiać izrailskich žančyn i dziaciej na 36 paleścinskich žančyn i niepaŭnaletnich, źniavolenych u izrailskich turmach.
Ale ciapier usio značna składaniej, kaža staršy analityk Instytuta palityki i stratehii Izrailskaha ŭniviersiteta Rajchman Michael Milštejn.
Pavodle jaho słoŭ, kali ŭ zvyčajny čas hałoŭnym pryjarytetam dla Izraila było b viartańnie zakładnikaŭ, siońnia heta poŭnaje źniščeńnie CHAMAS.
Hradus lutaści z abodvuch bakoŭ nastolki vysoki, što ni Izrail, ni CHAMAS nie nastrojenyja na kampramis.
Izrailcianie šakavanyja tym, ź jakoj lohkaściu bajevikam udałosia prarvać ich paŭdniovuju miažu i spakojna zabić prynamsi 1200 čałaviek.
Paleścincy, i nie tolki CHAMAS, žyvuć pad škvalnymi bambardziroŭkami ŭ adkaz: z suboty pa siektary Haza było naniesiena bolš za 2000 avijaŭdaraŭ, zahinuła bolš za tysiaču čałaviek.
Siektar u poŭnaj błakadzie, adrezany ad elektryčnaści, vady, pastavak paliva i miedykamientaŭ.
CHAMAS pahražaje karać śmierciu pa adnym zakładniku kožny raz, kali ŭ Hazie ad avijaŭdaraŭ biez papiaredžańnia buduć hinuć mirnyja žychary. Ale śviedčańniaŭ taho, što bajeviki pačali ažyćciaŭlać svaju pahrozu, niama.
Izrail nie pakazvaje prykmietaŭ strymanaści, značnyja častki Hazy naŭmysna pieratvarajucca ŭ ruiny.
Adnak, na dumku Milštejna, CHAMAS, mahčyma, nie stanie čaplacca za zachoplenych im žančyn, dziaciej i starych. Jany psujuć imidž hrupoŭki ŭ śviecie i mohuć patrabavać bolšaha vyniku, što nie zaŭsiody lohka va ŭmovach pastajannych bambardzirovak i nieabchodnaści zachoŭvać miesca ŭtrymańnia zakładnikaŭ u tajamnicy ad zamaskiravanych infarmataraŭ Izraila.
A voś z zachoplenych vajskoŭcaŭ CHAMAS pastarajecca atrymać maksimum vyhady dla siabie, tak što kali pieramovy adbuducca, to za ich jon zapatrabuje samuju vysokuju canu.
Ciažkaje rašeńnie
Pierad Izrailem staić dylema: pajści na ryzykoŭnuju vyratavalnuju apieracyju abo pačakać, pakul CHAMAS budzie asłableny avijaŭdarami i moža pahadzicca na niejkuju ŭhodu.
Ale bambardziroŭki siektara Haza taksama niasuć vialikuju ryzyku dla zakładnikaŭ. Choć miarkujecca, što jany ŭtrymlivajucca ŭ padziemnych tunelach i bunkierach, heta nie daje poŭnaj abarony ad avijaŭdaraŭ.
Taksama jość imaviernaść, što bajeviki zabjuć ich u prystupie lutaści albo kali zrazumiejuć, što Izrail blizki da ich vyratavańnia.
Takoje ŭžo było ŭ 2012 hodzie ŭ Nihieryi, kali brytanski i nihieryjski śpiecnaz padčas niaŭdałaj sumiesnaj apieracyi sprabavali vyzvalić dvuch zakładnikaŭ, jakija ŭtrymlivalisia džychadzistami.
Izrail zaraz ekstranna stvaryŭ apieratyŭny štab pa situacyi z zakładnikami. Na hety momant ustanavili asoby ŭsich zachoplenych izrailcian.
Tyja, kaho ŭtrymlivali na terytoryi Izraila, užo vyzvalenyja vajennym i palicyjantam śpiecnazam, usie ich vykradalniki zabityja.
Ale ŭ Hazie CHAMAS na svajoj terytoryi i moža chavać ludziej u vielmi šyrokaj sietcy tunelaŭ i sutareńniaŭ.
«U nas niama ŭsich źviestak ab kožnym domie i kožnaj vulicy ŭ siektary Haza», — kaža Michael Milštejn, jaki prasłužyŭ 20 hadoŭ u izrailskaj vajskovaj raźviedcy.
U Izraila jość vialiki dośvied u vyzvaleńni zakładnikaŭ. U izrailskich uzbrojenych siłach hetamu nadajuć vialikaje značeńnie i vučać asabliva staranna.
Stvoranaje ŭ 1957 hodzie sakretnaje padraździaleńnie «Sajeret Matkal» šmat u čym padobna da brytanskaj SAS abo amierykanskaj hrupy «Delta».
Pra jaho stała šyroka viadoma ŭ 1976 hodzie paśla apieracyi «Entebie», padčas jakoj byli vyzvalenyja pasažyry rejsa Tel-Aviŭ — Paryž, što byŭ zachopleny terarystami i ździejśniŭ pasadku ŭ aeraporcie Uhandy. Bolšaść zakładnikaŭ byli izrailcianami (105 čałaviek).
Kamandavaŭ apieracyjaj Jonatan Nietańjachu — starejšy brat ciapierašniaha premjer-ministra Izraila Bińjamina Nietańjachu. Jon byŭ adzinym zahinułym u tym rejdzie.
Siońnia ad jaho brata Bibi zaležyć žyćcio dziasiatkaŭ izrailcian, i jamu treba budzie vyrašyć, jakim šlacham jon pojdzie dla ich vyzvaleńnia — pieramovaŭ abo žorstkaj siły.
Asimietryčnaja vajna
Jość paviedamleńni, što ZŠA akazvajuć dapamohu raźviedźviestkami, i, mahčyma, navat daduć svaje siły śpiecyjalnaha pryznačeńnia.
Bujnaja avijanosnaja hrupa VMS ZŠA raźmiaściłasia va ŭschodniaj častcy Mižziemnamorja.
Ale CHAMAS pakazaŭ, što zdolny vieści asimietryčnuju vajnu, što navučyŭsia kampiensavać vielizarnuju pieravahu Izraila ŭ technałohijach i ahniavoj mocy.
Nie pakinuŭšy amal nijakich ličbavych śladoŭ pry kaardynacyi napadu, jon zmoh zaśpieć Izrail źnianacku.
Bajeviki, jakija achoŭvajuć bolš za 150 zakładnikaŭ, buduć, nakolki heta mahčyma, ustrymlivacca ad vychadu ŭ efir i dziejničać aŭtanomna. Usie ličbavyja pryłady ŭ svaich pałonnych jany, napeŭna, užo zabrali.
«Biez sumnievu, heta samaja składanaja situacyja z zakładnikami, ź jakoj Izrail kali-niebudź sutykaŭsia ŭ svajoj historyi», — kaža Michael Milštejn.
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii7
Kamientary