«Niezvyčajna chudy i pasivieły». Viadomy śledčy Alaksandr Suško vyjšaŭ na volu. Što jon siadzieŭ, nichto i nie viedaŭ
Jak stała viadoma «Našaj Nivie», vyjšaŭ na volu niekali vysokapastaŭleny śledčy, były načalnik upraŭleńnia pa rasśledavańni złačynstvaŭ suprać infarmacyjnaj biaśpieki i intelektualnaj ułasnaści SK Alaksandr Suško. Paśla zvalnieńnia z orhanaŭ jon pracavaŭ u Group-IB — bujnoj kampanii ŭ śfiery kibierbiaśpieki, čyjho zasnavalnika niadaŭna ŭ Rasii prysudzili da 14 hadoŭ strohaha režymu za «dziaržaŭnuju zdradu».
Ab tym, što Alaksandr Suško aryštavany, «Našaj Nivie» paviedamlali niekalki nie źviazanych miž saboj krynic. Mierkavana, aryšt adbyŭsia ŭ 2022 hodzie.
Apošni raz Suško niešta pisaŭ u svaim fejsbuku letam 2021-ha, a łajk pad vinšavańniem ad imia jahonaj staronki stavili letam 2022-ha, bolš nijakaj aktyŭnaści na jaho aktualnaj staroncy nie było.
Sens pretenzij da jaho byŭ nam nieviadomy.
Da mierkavanaha zatrymańnia Suško pracavaŭ u minskim ofisie rasijskaj Group-IB, a potym, miarkujučy z adkrytaj infarmacyi, u jaje daččynaj kampanii FACCT (Fight Against Cybercrime Technologies).
Kali byŭ śledčym, Suško vioŭ mnostva rezanansnych spravaŭ, u pryvatnaści, vialikuju «spravu ajcišnikaŭ», pa jakoj prachodziŭ, naprykład, Viktar Prakapienia.
Tady zdaryłasia amal nievierahodnaje dla biełaruskaj sistemy — kryminalnaja sprava skončyłasia ničym. Usich fihurantaŭ vypuścili biez suda.
U 2020-m Suško publična vystupiŭ za spynieńnie masavaha hvałtu i dyjałoh. Vystupaŭ z uzvažanaj krytykaj dziejańniaŭ pravaachoŭnikaŭ.
«[…] Usie, chto staić nie ŭ tym miescy, pavinny syści… A čamu, kali heta i ich ziamla, horad? Pavinny i ŭsio! A kudy iści? Siońnia na inšuju vulicu, a zaŭtra ŭ hieta? Kali humovyja kuli nie dapamohuć, to ŭ chod pojduć bajavyja? […] Kali iduć hranaty i kuli ŭ chod, to ludzi pałochajucca, a mnohija ŭciakajuć, i niekatoryja adkazvajuć. Tak, takich možna nazvać złačyncami, ale chto tady tyja, chto stralajuć pieršymi? Čamu jany heta robiać? Zahad? Čyj i čamu mienavita taki? Chto spynić heta? Chto znojdzie ŭ sabie siły pahavaryć z narodam, jaki hetyja pytańni zadaje? […]», — vykazaŭsia ŭ fejsbuku Suško, zaklikaŭšy da dyjałohu.
Praź niejki čas jahony śled zhubiŭsia.
I, jak ciapier paviedamili nam tyja, chto znajomy ź blizkimi Suško, jon na voli, ale «nienaturalna chudy i pasivieły».
Mahčyma, sprava suprać jaho moža być źviazanaja z razborkami z Group-IB u Rasii. Tak, zasnavalnika kampanii Illu Sačkova ŭ Rasii niadaŭna prysudzili da 14 hod kałonii strohaha režymu pa abvinavačvańni ŭ dziaržaŭnaj zdradzie — jon, nibyta, pieradaŭ zamiežnym śpiecsłužbam niejkuju infarmacyju, jakaja adnosiłasia da dziaržtajamnicy.
Sam Sačkoŭ byŭ aryštavany vosieńniu 2021 hoda, jon abvinavačvaŭ u svaim pieraśledzie asobnych supracoŭnikaŭ FSB, u jakich da jaho piersanalnaja niepryjaznaść.
Adnačasova z hetym Sačkoŭ hanaryŭsia ŭ svaich listach ź SIZA, što dziakujučy Group-IB nibyta ŭdałosia spynić mnostva ŭkrainskich kibieratak na rasijskuju infrastrukturu.
Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA11
Kamientary