«Duša razryvajecca». U Maładziečnie pad kustom pasialiłasia kotka. Jana viadzie siabie, jak Chacika, i mocna sumuje pa haspadarach
Va Uschodnim mikrarajonie Maładziečna, u dvary šmatkvaternaha doma №140 na Vialikim Haścincy, vośmy dzień žyvie maładaja dahledžanaja parodzistaja koška z čyrvonym ašyjnikam. Jana prosta lažyć pad kustom i sumuje, piša Kraj.by.
U miascovych žycharoŭ takoje adčuvańnie, što jana čakaje haspadara. Pry hetym kažuć, što koški tak siabie nie pavodziać. Hetaja hościa spačatku biehała za ludźmi, ale potym, zdajecca, straciła nadzieju znajści taho, kaho šukaje, i vyrašyła čakać da kanca.
Žycharka Maładziečna Anžeła kaža, što paroda chutčej za ŭsio źmiašanaja — sumieś z pramavuchaj ci to šatłandskaj, ci to brytanskaj. Viek — prykładna dva-try hady. Chutčej za ŭsio, heta koška ź vielmi vostrymi kipciurami — nie dała siabie ahledzieć.
«U mianie duša razryvajecca! Prosta SOS! Ja sama — kašatnica, — kaža Anžeła. — Doma žyvuć 14-hadovy kot Pirat i 7-hadovaja kotka Lala. Ja b i hetuju zabrała, ale tady ŭ kvatery pačniecca vajna. Razam jany nie ŭžyvucca. Susiedka, u jakoj vialiki kot, sprabavała zabrać hetuju kotku da siabie, i ŭ vyniku žyvioły nie paładzili. Daviałosia jaje viarnuć nazad. Vidać, što kotka zdarovaja. Na joj niama ran, nos — mokry. Jana źjaviłasia ŭ našym dvary ŭ noč ź minułaj piatnicy na subotu (z 28 na 29 lipienia). Dniom spačatku biehała za ludźmi, achvotna išła na ruki. Dzieci stali jaje ciahać, ale atrymali zdačy.
Ciapier jana straciła da miascovych usialaki intares. Prosta lažyć pad kutom sumnaja. Ja pra katoŭ i kotak viedaju ŭsio. Takija pavodziny nie ŭłaścivyja hetym žyviołam. Im tolki daj volu — i jany panieślisia pa svaich spravach. A hetaja lažyć i sumuje. Padobna da taho, što vielmi lubić haspadara. Dy i bačna, što jana chatniaja, a dvarovaje žyćcio dla jaje niazvykłaje.
U Anžeły niekalki viersij pra toje, adkul «Chacika» ŭziałasia ŭ jaje dvary. Mahła vyskačyć abo zvalicca z akna vierchnich pavierchaŭ najbližejšych damoŭ, ale heta małaimavierna. Pa-pieršaje, Anžeła ŭ svaim dvary viedaje kožnaha kata, pa-druhoje, u hetym vypadku haspadar užo znajšoŭsia b, bo pra kata dziakujučy Anžele ceły tydzień viedaje ŭvieś internet, i ŭ kursie ŭsie vałanciory. Dy i miascovyja žychary ŭ dvary abmiarkoŭvajuć pušystuju hościu, sprabujuć znajści jaje haspadaroŭ. U pošukach ščyrujuć dziaŭčynka Evielina i jaje mama Kryścina.
Pryvieźli kotku na mašynie i vykinuli?
Anžeła razvažaje pra najbolš imaviernyja viersii źjaŭleńnia koški ŭ dvary:
— Mahčyma, jana vyskačyła z akna doma nie ŭ našym rajonie, a da nas jaje zahnali vandroŭnyja katy ci sabaki. Darečy, sabak jana nie baicca. Na hadavancaŭ našych haspadaroŭ nie źviartaje nijakaj uvahi. Značyć, mahčyma, doma jana žyła razam z sabakam. Jašče ja dapuskaju, što kotka nadakučyła haspadaru, jon moh pryvieźci jaje siudy na mašynie i vykinuć. U hetym vypadku dom kotki moža być dzie zaŭhodna, navat nie ŭ Maładziečnie. Ale ja adnojčy svajho kata adviezła ŭ viosku za dzieviać kiłamietraŭ ad horada, a na nastupny dzień jon byŭ užo doma. Sam pryjšoŭ. A hetaja kotka nie sychodzić šukać svajho doma. Mahčyma, jana prosta dezaryjentavanaja i dahetul adčuvaje šok.
Anžeła praciahvaje kłapacicca pra hościu. Vynosić joj pajeści. Kala padjezda pastaviła misačku ź ježaj i vadoj. Kaciny korm jana jeść, a voś ad ryby pakul admaŭlajecca.
— Viadoma, vielmi chočacca znajści haspadara. Raptam tam ludzi taksama tužać pa joj i pieražyvajuć. Ale čamu tady jany nie adklikajucca? — razvažaje Anžeła. — Ja ŭžo hatovaja addać kotku dobrym ludziam u dobryja ruki. Hatovaja padaryć łatok, dać hrošaj novamu haspadaru na korm i apłacić sterylizacyju, kali tolki kotka ŭžo nie sterylizavanaja. Pry hetym ja chaču być upeŭnienaja, što ludzi, jakija jaje zabiaruć, sapraŭdy dobryja i buduć jaje lubić.
Kali stary ci novy haspadar znojdziecca, žurnalist Kraj.by hatovy sustrecca ź im i napisać, što historyja z kotkaj skončyłasia ščaśliva. Abo patelefanavać Anžele.
Ci možna ŭ Biełarusi zabicca, zvaliŭšysia ŭ padziemny pierachod?1
Kamientary
nu ti.. amal usio