ES zabaraniŭ pastaŭki ŭ Rasiju elektramabilaŭ i mašyn z ruchavikom bolšym za 1,9 litra. Jak heta zakranie Biełaruś? 

Rasija zastaniecca biez «zialonych» mašyn?

U novym pakiecie sankcyj havorycca pra poŭnuju zabaronu na ŭvoz novych i patrymanych elektramabilaŭ i hibrydaŭ ź ES u RF. Taksama pad abmiežavańni patrapili lehkaviki z abjomam ruchavika bolšym za 1900 sm³. Jak vynikaje z dakumienta, abmiežavańni tyčacca tolki RF, tamu dla našaj krainy, prynamsi pakul, nijakich źmien nie čakajecca. Ale heta nie značyć, što jany nie adbuducca.

Reč u tym, što davoli istotnaja kolkaść mašyn, jakija asiadajuć na rynku RF, spačatku traplajuć u Biełaruś, dzie prachodziać mytnuju ačystku. Takaja schiema zastajecca vyhadnaj pierš za ŭsio dziakujučy najaŭnaści ŭ Biełarusi ŭkaza numar 140, jaki dazvalaje peŭnym katehoryjam hramadzian uvozić aŭto z apłataj 50% pošlin.

Tym nie mienš, źviazvacca ź ilhotnikami chacieli nie ŭsie rasijanie, tamu peŭnaja častka aŭto razmytnivałasia na terytoryi RF pa poŭnym taryfie biez udziełu biełarusaŭ. Čaściej heta byli mašyny z abjomam ruchavika da 1,5 litra, pakolki roźnica ŭ mycie była nievialikaja. Asabliva kali dadać da jaje ŭznaharodu lhotniku.

Pavialičyć

Ale i aŭtamabili z ruchavikom abjomam 2 litry možna było niaredka sustreć na razmytnioŭcy ŭ RF, pra što kažuć šmatlikija rasijskija błohiery i pierahonščyki. Asabliva heta tyčyłasia darahich aŭto, u vynikovaj canie jakich mytnyja płaciažy nie składali vialikaj sumy.

Naprykład, poŭny mytny płaciež za 2-litrovaje aŭto składaje 5400 jeŭra, a lhotny — 2700. Kali da 2700 treba dadać jašče 1000 jeŭra za pasłuhi lhotnika, to atrymlivałasia ŭžo 3700 jeŭra. U dadatak niekalki socień vydatkoŭvałasia na pasiarednika, pastanoŭku i źniaćcie mašyny ź biełaruskaha ŭliku. U vyniku atrymlivałasia roźnica kala 1500 jeŭra, što dla niekatorych było nieistotnaj sumaj, asabliva ŭličvajučy dadatkovyja ryzyki i składanaści, źviazanyja z afarmleńniem aŭto nieviadoma na kaho.

Ciapier ža samastojnaja pakupka aŭto ŭ ES dla hramadzian RF stanie całkam niemahčymaj, kali havorka budzie iści pra lubyja hibrydy, elektrakary ci aŭto z abjomam vyšejšym za 1,9 litra. Jeŭrapiejskaja mytnia nie zmoža aformić ekspart takoha aŭto, kali pakupnikom budzie hramadzianin RF.

Pavialičyć

Šlachi abychodu abmiežavańniaŭ

Tamu rasijanam, jakija zachočuć nabyć takija aŭto ź Jeŭropy, daviadziecca kuplać ich u Biełarusi abo šukać pasiarednikaŭ siarod biełarusaŭ, jakija pahodziacca aformić ekspartnyja dakumienty ŭ Jeŭropie na svajo imia.

Dalej takoje aŭto budzie razmytnivacca ŭ Biełarusi, paśla čaho pajedzie ŭ RF. Abo paśla vyjezdu ź ES biełaruskuju mytniu taki transpart budzie prachodzić ź inšym kamplektam dakumientaŭ, jakija buduć admysłova padrychtavanyja dla našaha boku.

Schiema choć i nielehalnaja, ale vielmi prostaja, adpracavanaja i dobra viadomaja mytnym orhanam. U vyniku ź ES mašyna vyjazdžaje nibyta dla pakupnika ź Biełarusi, a na terytoryju Mytnaha sajuza zajazdžaje jak dla pakupnika z RF.

Tamu kardynalna dla rasijan ničoha nie źmienicca. Tak, nabyćcio peŭnaj katehoryi aŭto stanie bolš składanym, spatrebiacca dadatkovyja vydatki i čas, źjaviacca dadatkovyja ryzyki, ale biez mašyn ź ES jany praz hetyja abmiežavańni dakładna nie zastanucca.

Pavialičyć

Što tyčycca novych mašyn, to treba razumieć, što amal usie jany zajazdžajuć u RF praz razmytnioŭku ŭ Biełarusi, pryčym abaviazkova z vykarystańniem ilhotnika. Jašče adzin šlach, praź jaki novyja aŭtamabili jeduć u RF, — Kyrhyzstan. Tamu tut novyja sankcyi buduć jašče mienš adčuvalnymi.

Siarod inšych varyjantaŭ abychodu abmiežavańniaŭ pry ŭvozie aŭto ź ES u RF idzie afarmleńnie ekspartnych dakumientaŭ u ES na hramadzian Kazachstana. Jak i ŭ vypadku ź inšymi schiemami, pry ŭvozie aŭto vykarystoŭvajucca dva kamplekty dakumientaŭ.

Usio heta robić kuplu aŭto bolš składanaj i darahoj praceduraj.

Pavialičyć

A što pa aŭto sa Štataŭ?

Akramia taho, možna adznačyć, što rasijanam taksama zabaroniena kuplać aŭto ŭ ZŠA. Litoŭskaja mytnia pry afarmleńni ekspartnych dakumientaŭ u partu Kłajpiedy moža zapytać invojsy na kuplu, a taksama dakumienty ŭładalnikaŭ aŭto, kab pierakanacca, što aŭto nabyŭ hramadzianin Biełarusi, a nie RF. I što punktam pryznačeńnia budzie akurat Biełaruś. To-bok samastojna nabyć i raźličycca za aŭto sa Štataŭ rasijanie taksama nie mohuć. Častka mašyn sa Štataŭ idzie ŭ RF nie tolki praź Biełaruś, ale i praz Hruziju.

U vyniku moža atrymacca, što ŭviedzienyja dadatkovyja sankcyi na ŭvoz aŭto mohuć pavialičyć abjom pracy toj častki biełaruskaha aŭtamabilnaha biznesu, jaki śpiecyjalizujecca na pryhonie i pieraprodažy aŭto ź Jeŭropy i ZŠA.

Dla daviedki: letaś fizasoby impartavali ŭ Biełaruś u 2,4 razu bolš mašyn, čym hod tamu. Kali ŭ 2021 hodzie fizičnyja asoby impartavali kala 35 tysiač aŭtamabilaŭ z trecich krain, to ŭ 2022-m — užo bolš za 80 tysiač.

• 6
• 0
• 7
• 4
• 2
• 3
• 9
• 0