YouTube źnižaje barjer dla ŭdziełu ŭ prahramie manietyzacyi

Takim čynam, novyja ŭmovy dla ŭdziełu ŭ partniorskaj prahramie:

• najaŭnaść 500 padpisčykaŭ;
• try publičnyja zahruzki za apošnija 90 dzion;
• albo 3000 hadzin prahladaŭ u minułym hodzie, albo 3 miljony prahladaŭ Shorts-videa za apošnija 90 dzion.

Raniejšyja ž umovy ŭklučali najaŭnaść nie mienš za 1000 padpisčykaŭ, a taksama 4000 hadzin prahladaŭ u minułym hodzie albo 10 miljonaŭ prahladaŭ Shorts za apošnija 90 dzion.

Kali stvaralniki kantentu dasiahajuć hetaha novaha paroha, jany mohuć padać zajaŭku na ŭdzieł u Partniorskaj prahramie i atrymać dostup da takich pryład manietyzacyi, jak Super Thanks, Super Chat i Super Stickers. Taksama robiacca dasiažnymi takija pryłady padpiski, jak sponsarstva kanała i mahčymaść prasoŭvać svoj ułasny mierč (tavary sa svajoj simvolikaj) z dapamohaj YouTube Shopping.

Kryteryja zahruzki troch videa za 90 dzion vyklikaje pytańni, bo stvaralniki doŭhich videa mohuć nie mieć dastatkovaj kolkaści materyjału ci času dla stvareńnia niekalkich doŭhich videa ciaham takoha karotkaha pieryjadu, niahledziačy na ​​toje, što jany mohuć źbirać miljony prahladaŭ.

Pakul YouTube prymianiŭ novyja kryteryi manietyzacyi tolki ŭ ZŠA, u Vialikabrytanii, u Kanadzie, na Tajvani i ŭ Paŭdniovaj Karei. Paźniej jany majuć być raspaŭsiudžanyja i na inšyja krainy, dzie dastupny YPP.

Kampanija taksama pašyraje svoj piłotny partniorski prajekt Shopping dla bolšaj kolkaści stvaralnikaŭ u ZŠA. Zaraz stvaralniki, jakija ŭžo ŭdzielničajuć u YPP i majuć bolš za 20 000 padpisčykaŭ, zmohuć paznačać pradukty ŭ videa i Shorts i atrymlivać za heta kamisiju.

TechCrunch nahadvaje, što dachodami ad rekłamy ŭ Shorts YouTube taksama pačaŭ dzialicca sa stvaralnikami ŭ lutym. Padčas spravazdačy ab prybytkach za 4-y kvartał 2022 hoda kampanija zajaviła, što Shorts pieravysili 50 miljardaŭ prahladaŭ štodnia. Dla paraŭnańnia: u kastryčniku minułaha hoda cukierbierhaŭskaja kampanija Meta paviedamiła, što Reels štodnia prahladali 140 miljardaŭ u Instagram i Facebook.

Da taho ž nahadajem, što ŭ sakaviku YouTube byŭ vymušany źmianić svaje praviły suprać vykarystańnia nienarmatyŭnaj leksiki ŭ pačatku videa. U listapadzie minułaha hoda kampanija zaćvierdziła praviły, zhodna ź jakimi dyskvalifikavałasia luboje videa z vykarystańniem nienarmatyŭnaj leksiki ŭ pieršyja 15 siekund — navat kali videa było zapampavana našmat raniej. Ale ž ciapier u adpaviednaści z novaj palitykaj kampanija abmiežavała čas da 7 siekund i dazvoliła vykarystańnie nienarmatyŭnaj leksiki ŭ muzycy.

U minułym hodzie YouTube anansavaŭ taksama Creator Music — pryładu dla vykanaŭcaŭ, kab zarablać hrošy ŭ abmien na vykarystańnie ich muzyki ŭ čužych videa. U sakaviku kampanija vypuściła novuju mietryku dla adsočvańnia achopu vykanaŭcy ŭ roznych farmatach, uklučajučy karotkija videa Shorts.

• 5
• 0
• 2
• 1
• 0
• 0
• 3
• 0