Ustań i idzi. Kampanija Iłana Maska pačnie vyprabavańni mazhavych impłantaŭ na ludziach
Kampanija Iłana Maska Neuralink pa vytvorčaści impłantaŭ dla mozhu atrymała ŭchvaleńnie ad Upraŭleńnia pa sanitarnym nahladzie za jakaściu charčovych praduktaŭ i miedykamientaŭ ZŠA (FDA) na praviadzieńnie pieršych vyprabavańniaŭ na ludziach.
Raspracoŭščyki spadziajucca, što z dapamohaj śpiecyjalnych čypaŭ ludzi, jakija stracili zrok abo ruchomaść, zmohuć viarnucca da paŭnavartasnaha žyćcia, piša Bi-bi-si.
Papiaredniaja zajaŭka Neuralink nie atrymała ŭchvaleńnia FDA ź mierkavańniaŭ biaśpieki, jak kazałasia ŭ pres-relizie, apublikavanym u sakaviku.
Ciapier u kampanii kažuć, što zadavolenyja rašeńniem rehulatara, adnak nieadkładnych płanaŭ na adbor udzielnikaŭ vyprabavańniaŭ u kiraŭnictva na hetym etapie niama.
Jak heta pracuje
Technałohija Neuralink prajšła paśpiachovaje testavańnie na małpach.
U kampanii spadziajucca, što z dapamohaj novych mikračypaŭ stanie mahčymym lačeńnie takich zachvorvańniaŭ, jak paralič i ślepata. Taksama miarkujecca, što jany dapamohuć ludziam z abmiežavanymi mahčymaściami bolš šyroka vykarystoŭvać kampjutary i inšyja novyja technałohii.
Adna z funkcyj čypaŭ — interpretacyja hienieravanych mozham sihnałaŭ i pieradača infarmacyi na pryłady praz Bluetooth.
Na dumku Maska, novaja raspracoŭka asabliva važnaja na fonie zaściarohaŭ, što štučny intelekt moža adnojčy zamianić ludziej u roznych halinach žyćcia.
U svaim aficyjnym paviedamleńni Neuralink nazvała ŭchvaleńnie FDA «važnym pieršym krokam, jaki adnojčy dazvolić novaj technałohii dapamahčy mnohim ludziam».
Miž tym raspracoŭki kampanii Maska nielha nazvać absalutnym praryvam.
Na hetym tydni stała viadoma, što ŭ Šviejcaryi ŭžo praviali praceduru pa ŭžyŭleńni čałavieku mazhavoha impłanta.
Pacyjent — hałandziec Hiert-Jan Oskam — byŭ paralizavany na praciahu 12 hadoŭ u vyniku viełasipiednaj avaryi.
Užyŭlenyja jamu elektronnyja impłanty biespravadnym šlacham praz druhasnyja impłanty ŭ chrybietniku naŭprost tranślujuć jaho dumki naham, prymušajučy ich iści.
Šviejcarskaja sistema pakul taksama znachodzicca ŭ ekśpierymientalnaj stadyi, ale prasunułasia niekalki dalej, čym raspracoŭka Neuralink.
U kampanii Iłana Maska zajaŭlajuć, što ich pryjarytet — biaśpieka, dastupnaść i nadziejnaść prapanavanaj imi technałohii, a nie spabornictva na rynku.
Etyčny bok
Niahledziačy na šmatspadzieŭny efiekt mazhavych impłantaŭ dla ludziej z abmiežavanymi mahčymaściami, u novaj technałohii znajšlisia svaje krytyki.
«Ja dumaju, što my nabližajemsia da rečaisnaści, u jakoj budzie značna mienš svabody dumki, značna mienš razumovaj pryvatnaści, choć naŭzamien my i atrymajem novuju mahčymaść dla samavyznačeńnia», — kaža prafiesarka Nita Farachani, ekśpiertka ŭ halinie etyčnych, jurydyčnych i sacyjalnych nastupstvaŭ u śfiery raźvićcia novych technałohij.
Pavodle jaje słoŭ, mozh čałavieka ŭsio bolš i bolš zaviazany na novyja pryłady. Navat zvyčajnyja hadzińniki ciapier ułoŭlivajuć amal luby namier čałavieka, nie kažučy ŭžo pra bolš składanyja technałohii, jak, naprykład, raspracoŭka Neuralink, kaža Farachani.
«[…] Kali ŭsprymać naš mozh jak apošniuju rysu našaj pryvatnaści, jak adzinuju prastoru, jakuju my možam zaścierahčy ad inšych ludziej i zakryć tudy dostup, to čym bolš adbyvajecca dasiahnieńniaŭ u halinie [mazhavych impłantaŭ], tym mienš mahčymaściaŭ zachavać hetuju apošniuju miažu pryvatnaści», — skazała ekśpiertka ŭ intervju Bi-bi-si.
Akramia taho, mnohich cikavić, kolki budzie kaštavać čałavieku ź impłantam absłuhoŭvańnie hadžetaŭ, źviazanych z čypam, ci ŭsim heta budzie pa kišeni i što adbudziecca ź ciełam čałavieka, kali technałohija raptam daść zboj.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary