«Aścierahajecca, što apazicyja pačnie vykarystoŭvać siłavy scenar». Čamu Łukašenka zahavaryŭ pra dadatkovyja harantyi biaśpieki ad RF?
Na sustrečy ź ministram abarony RF Siarhiejem Šajhu Łukašenka zajaviŭ, što jamu ad Rasii patrebny harantyi abarony biełaruskaj terytoryi jak ułasnaj. Spytali mierkavańnie ekśpiertaŭ, čamu mienavita ciapier Łukašenka vystupiŭ z takimi patrabavańniami.
«Łukašenka atrymaŭ mocnuju traŭmu ŭ žniŭni 2020-ha»
Palityčny analityk prajekta «Pozirk» Alaksandr Kłaskoŭski nazyvaje niekalki pryčyn, čamu Łukašenka zahavaryŭ pra nieabchodnaść atrymańnia dadatkovych harantyj biaśpieki ad Rasii.
Na dumku analityka, zajavy Łukašenki pierš za ŭsio źviazany ź jahonym stracham zhubić uładu. Kłaskoŭski miarkuje, što Łukašenka sam u značnaj stupieni vieryć u tuju kanśpirałohiju, pra jakuju jon kaža.
«Jon sapraŭdy moža vieryć u toje, što NATA lazhaje husienicami i ščoŭkaje zubami na miažy ź Biełaruśsiu. Łukašenka vieryć, što z dapamohaj, jak jon kaža, «źbiehłych radykałaŭ» jany mohuć uvarvacca ŭ Biełaruś.
Naturalna, usio heta jaho napružvaje, choć, na maju dumku, jon sam i jahonaje atačeńnie mocna hipierbalizujuć hetyja mahčymaści apazicyi. Ale, tym nie mienš, heta jahonyja realnyja fobii», — kaža Kłaskoŭski.
Analityk ličyć, što ŭ Łukašenki dahetul jość adčuvańnie adsutnaści łajalnaści ŭ značnaj častki nasielnictva.
Kažučy pra fobii Łukašenki, Alaksandr Kłaskoŭski nahadvaje pra mocnuju psichałahičnuju traŭmu, jakuju toj atrymaŭ u žniŭni 2020 hoda.
«Tady Pucin peŭny čas trymaŭ paŭzu. Tolki ŭ kancy žniŭnia jon publična vykazaŭ svaju padtrymku Łukašenku i paviedamiŭ, što trymaje na miažy ŭzbrojeny rezierv, jaki pry nieabchodnaści moža nakiravać na jahonuju padtrymku.
Tamu ŭ Łukašenki zastajecca zaściaroha taho, što ŭ niejki momant navat Kreml moža znoŭ pačać vahacca, padtrymlivać jaho ci nie».
«Łukašenka ŭśviedamlaje, što Rasija moža atrymać parazu ŭ vajnie»
Inšy čyńnik, jaki analityk taksama nazyvaje vielmi važnym, — heta čakańnie, jakim budzie ŭkrainski kontrnastup.
«Łukašenka ŭśviedamlaje, što Rasija moža atrymać mocnuju parazu ŭ vajnie, tamu moža adbycca tak, što im užo budzie nie da chaŭruśnika ŭ vyhladzie Łukašenki, bo ŭ pieršuju čarhu im treba budzie zajmacca ŭnutranymi prablemami.
Jon aścierahajecca, što ŭ takim vypadku mohuć aktyvizavacca «biehłyja radykały», jakija pačnuć vykarystoŭvać svaje siłavyja scenary, aktyvizujuć płan «Pieramoha», da ich padklučycca połk Kalinoŭskaha i h. d. Tamu jon choča atrymać dadatkovyja harantyi ad Kramla, kab u niejkaj krytyčnaj situacyi ŭtrymacca va ŭładzie z dapamohaj Maskvy», — kaža Kłaskoŭski.
Takaja rytoryka Łukašenki, na dumku analityka, taksama maje niepasrednuju suviaź z žadańniem raźmiaścić na svajoj terytoryi jadziernuju zbroju.
«Jon ličyć, što, atrymaŭšy JAZ i dostup da jaje vykarystańnia, jon zmoža lepiej umacavać svaju ŭładu, bo ŭ vypadku čaho ŭ jaho jość taktyčnaja jadziernaja zbroja, jakuju jon moža vykarystać. Pra vialikija spadziavańni na JAZ ukazvajuć i inšyja momanty. Mahčyma, idzie havorka pra ŭniasieńnie źmien u Vajennuju daktrynu Rasii, tamu jon i choča zamacavać, kab napad na Biełaruś raŭniaŭsia napadu na Rasiju z usimi nastupstvami», — ličyć ekśpiert.
Adnak, na dumku analityka, kali adbudziecca taki scenar, što Rasija atrymaje mocnuju parazu na froncie, to Kramlu ŭžo moža stać nie da Łukašenki.
«U takim vypadku ich pieršačarhovaj zadačaj budzie vyrašeńnie prablem u samoj Rasii, tamu im moža być prosta nie da Łukašenki. U lubych fors-mažornych abstavinach u Kramli dziejničajuć vyklučna ŭ svaich intaresach, a nie tak, jak napisana ŭ niejkich tam pahadnieńniach.
Tamu varta razumieć, što nijakija dadatkovyja harantyi, prapisanyja ŭ niejkich dakumientach, jamu mohuć nie dapamahčy, bo moža stacca tak, što Kramlu ŭžo budzie banalna nie da jaho», — ličyć Kłaskoŭski.
Łukašenka choča pakazać, što jon tut niešta vyrašaje
Taksama ekśpiert nie vyklučaje, što ŭsie hetyja zajavy Łukašenki mohuć być častkaj pijar-kampanii, u jakoj Łukašenka namahajecca dakazać, što jon sam vyrašaje, jak buduć vybudoŭvacca vajskovyja adnosiny z RF.
«Vidavočna, što Rasija budzie ŭzmacniać svaju vajskovuju prysutnaść u Biełarusi i tamu, kab nie vyhladać maryjanietkaj Kramla, jon choča pakazać, što nibyta jon sam zaprasiŭ ich da sabie i što jon budzie vyrašać, što i jak im tut rabić».
Alaksandr Kłaskoŭski ličyć, što kali takija razmovy ŭžo vyjšli na samy vysoki ŭzrovień i dabralisia da publičnaj prastory, to vierahodnaść źjaŭleńnia i pryniaćcia novych vajskovych pahadnieńniaŭ nadzvyčajna vysokaja.
«Takija dziejańni adpaviadajuć intaresam Rasii, bo ŭ ich razumieńni heta lehalizuje ŭzmacnieńnie vajskovaj prysutnaści ŭ Biełarusi. Dla nas ža heta budzie aznačać, što rasijskaja ščupalcy ŭsio macniej buduć achutvać Biełaruś».
«Heta praciah palityki Kramla pa źniščeńni niezaležnaści Biełarusi»
Namieśnik kiraŭnika Abjadnanaha pierachodnaha kabinieta Pavieł Łatuška ŭpeŭnieny, što Łukašenka vielmi niervujecca napiaredadni ŭkrainskaha kontrnastupu.
«Jon vydatna razumieje, što jon u adnoj łodcy z Pucinym, jak jon kaža, u adnym akopie. Jon zdaje suvierenitet pad hetyja harantyi, a pa sutnaści za hetym staić strach, bo pośpiechi na froncie Ukrainy mohut pryvieści da destabilizacyi ŭ tym liku i ŭ Rasii.
Heta pytańnie asabistaj ułady, a dla jaho ŭłada — heta žyćcio», — kaža Łatuška.
Jon miarkuje, što Łukašenka z Pucinym užo damovilisia ab hetym i pa sutnaści hety praces užo adbyvajecca.
Čarhovy krok na šlachu straty vajskovaha suvierenitetu
«Tamu ja liču, što jadziernaja zbroja chutka apyniecca na terytoryi Biełarusi i što kolkaść sumiesnaj hrupoŭki pavialičycca, a heta, u svaju čarhu, pavialičvaje ŭpłyŭ Rasii na Biełaruś. Heta stratehičnaja meta Kramla, i strachi Łukašenki rasijanie vielmi dobra vykarystoŭvajuć u svaich metach.
Heta čarhovy krok na šlachu kančatkovaj straty vajskovaha suvierenitetu. Jaho i tak zastałosia na try dni, a zaraz heta budzie zamacavana dakumientalna. Tamu heta praciah palityki Kramla pa źniščeńni niezaležnaści Biełarusi», — ličyć palityk.
«Naša Niva» — bastyjon biełaruščyny
PADTRYMAĆTur anansuje, što Łukašenku napišuć na vybarach bolš za 90%1
Kamientary