«Rana 9 žniŭnia zaciahniecca». Što deputaty i deputatki pościać u sacsietkach ŠMAT FOTA
«Naša Niva» pasprabavała znajści adroźnieńni pamiž sacyjalnymi sietkami biełaruskich deputataŭ i sienataraŭ.
Lilija Ananič
Deputatka Pałaty pradstaŭnikoŭ Nacyjanalnaha schodu Lilija Ananič lubić rabić sełfi i raskazvać u instahramie pra svaje pracoŭnyja pajezdki i vystupy.
«Histaryčnaja padzieja ŭ Pałacy Niezaležnaści», — padpisała deputatka sełfi, zroblenaje na cyrymonii padpisańnia Łukašenkam pravak u Kanstytucyju.
U mnohich deputataŭ u instahramie sustrakajucca zdymki taho, jak jany sadžajuć raśliny. U Ananič taksama jość takoje fota.
«Tema histaryčnaj pamiaci była klučavoj siońnia na pasiadžeńni praŭleńnia HA «Biełaruski sajuz žančyn» u Barysavie. U pamiać ab žančynach — hierainiach Vialikaj Ajčynnaj vajny — na terytoryi 25-j škoły vysadzili aleju tuj», — napisała deputatka.
Čas ad času Ananič kamientuje ŭ instahramie i palityčnyja padziei.
«Biełaruskich dypłamataŭ nie zaprasili na pamiatnyja mierapryjemstvy ŭ Buchienvaldzie. Bolš za toje, dypmisija atrymała list kiraŭnictva miemaryjała ab niepažadanaści ich udziełu. Vielmi dypłamatyčny kamientar našaha MZS u suviazi z hetym.
A ja voś adkinu dypłamatyju i skažu, jak dumaju. Tyja, chto zdradžvaje histaryčnaj pamiaci i podźvihu savieckaha naroda ŭ vyratavańni śvietu ad karyčnievaj čumy fašyzmu, dy nie spadziajucca na łasku Božuju!» — napisała Ananič.
Taćciana Runiec
Staršynia Pastajannaj kamisii Savieta Respubliki pa ekanomicy, biudžecie i finansach Taćciana Runiec u svaim instahramie časta publikuje novyja fota.
Šmat fotazdymkaŭ u deputatki z top-čynoŭnicaj Natallaj Kačanavaj: abiedźvie ź Viciebščyny.
Taćciana Runiec, jak i Lilija Ananič, taksama publikuje šmat zdymkaŭ z pracoŭnych pajezdak i vystupaŭ. Asabistych fota ŭ Runiec tolki niekalki.
Siarhiej Aniuchoŭski
Člen Savieta Respubliki, hienieralny dyrektar «Kamunarki» Siarhiej Aniuchoŭski lubić rabić fotazdymki za pracoŭnym stałom.
Chvalicca deputat zamiežnymi pajezdkami, naprykład, u Vjetnam.
«My, kiraŭniki najbujniejšych pradpryjemstvaŭ biełaruskaj stalicy — «Kamunarki», Minskaha matacykletna-rovarnaha zavoda i Minskaha choładakambinata № 2, — z našymi vjetnamskimi partniorami praviali pieramovy pa zakupcy technałahičnaha abstalavańnia i pastaŭkach pradukcyi», — napisaŭ Aniuchoŭski ŭ siabie ŭ instahramie.
Lubić deputat pisać u sacsietkach vinšavańni.
Andrej Šyškin
Člen Savieta Respubliki ad Homielskaj vobłaści, hałoŭny redaktar haziety «Svabodnaje słova» Andrej Šyškin niadaŭna apublikavaŭ fota, jak jon pravioŭ u škole «ŭrok miru i stvareńnia».
Siarod astatnich deputataŭ Andrej Šyškin vyłučajecca zdymkami z Rasii.
Vykazvaŭsia deputat u instahramie pra niezaležnyja ŚMI i «zamiežnych prapahandystaŭ».
«Dniami ŭ niebie Minska pramčałasia niekalki bajavych samalotaŭ VKS Rasii. Praca ich mahutnych reaktyŭnych ruchavikoŭ narabiła šmat šumu. Ale nie stolki ŭ pavietranaj prastory, kolki ŭ infarmacyjnaj.
Jašče i nie paśpieŭ nad biełaruskaj stalicaj raśsiejacca inviersijny śled šaściorki rasijskich MiH-31, jak jeŭrapiejskija i inšyja «niezaležnyja» ŚMI navypieradki kinulisia składać čarhovuju strašyłku pra hety fakt. Asobnyja panikiory, nadzielenyja asabliva bujnaj fantazijaj, prymudrylisia niejkim cudam z-za miažy razhledzieć pad kryłami źniščalnikaŭ hipierhukavyja rakiety «Kinžał» i navat vyznačyli mahčymyja celi dla ich. I pajšła pisać hubiernia, nahaniać strachu na abyvacielaŭ…» — napisaŭ jon.
U instahramie sienatar vinšavaŭ Łukašenku z dniom narodzinaŭ.
Maryna Lančeŭskaja
Deputat Pałaty Pradstaŭnikoŭ Maryna Lančeŭskaja lubić publikavać svaje partrety. Takich u jaje instahramie niekalki.
U dopisach deputatka čas ad času razvažaje pra palityku.
«Tak užo atrymałasia, što 9 žniŭnia ŭ historyi našaj krainy litaralna 2 hady tamu staŭ dniom mnohich «kali b».
Dumaju, kožny zadajecca pytańniem, a jak było b, kali b?.. I dalej bahataja fantazija maluje mnostva scenaryjaŭ, adzin bolš supiarečlivy za inšy.
Ale potym hladziš u akno, za jakim pa sinim niebie pavolna płyvuć lohkija abłoki, viecier danosić u dom vodar pšanicy i jabłykaŭ, śpiašajucca pa svaich spravach spakojnyja ludzi — i vydychaješ, razumiejučy, što ŭsio skłałasia maksimalna ščasna.
Tak, chapaje prablem, źjaŭlajucca novyja, ale hałoŭnaje zastajecca nieparušnym: my žyviom u suvierennaj dziaržavie, śmieła chodzim na pracu, płanujem adpačynak i źbirajem dziaciej u škołu. A hetaha ŭsiaho mahło b i nie być, kali b tady zmaładušničali, pajšli na povadzie, stracili vieru», — napisała jana.
Pryznańni Rasijaj «ŁNR» i «DNR» deputatka nazyvaje «histaryčnaj padziejaj».
«Narešcie zrobleny hety najvažniejšy krok na šlachu da miru. Kolki hadoŭ žychary hetych terytoryj nie mahli spakojna žyć, uciakali ad vajny, apłakvali svaich zahinułych dziaciej. Chiba važna ciapier, chto maje racyju, chto vinavaty, kali na paradku dnia staić pytańnie miru dla ŭsich? — razvažaje deputatka. —
Urešcie, my ŭsie słavianie i nam niama čaho dzialić. I supolnaha va ŭsich nas značna bolš, čym my možam ujavić. I jak ža chočacca z brackimi narodami žyć u miry i siabroŭstvie».
Amal što pad kožnym pastom Lančeŭskaj jość jaje asabistyja razvahi na tuju ci inšuju temu.
Viktar Liskovič
Staršynia Hrodzienskaha abjadnańnia prafsajuzaŭ, člen Savieta Respubliki lubić kałažy. Takim sposabam viadzieńnia instahrama Viktar Liskovič vielmi adroźnivajecca ad astatnich biełaruskich čynoŭnikaŭ.
Jak i bolšaść biełaruskich deputataŭ, Viktar Liskovič lubić publikavać fota sa svaich pracoŭnych vizitaŭ i sustreč.
A taksama raskazvaje, jak chadziŭ z unukam u zaapark, vychvalajecca ŭradžajem višni i dzielicca navinami z žyćcia svaich sabak.
Čytajcie taksama:
Reakcyjny pamočnik Łukašenki staŭ namieśnikam Kačanavaj
Jak ciapier vyhladaje Lidzija Jarmošyna FOTA
Zimbabvijskuju palicyju mohuć apranuć u biełaruskaje
«Ludzi, ja viarnułasia ŭ SSSR. Jašče i 170 rubloŭ za hety kašmar!» Błohierka aburyłasia načnoj čarhoj u padatkovuju7
Kamientary
Ananič,hitlerovcy tožie Boha vspominali—u nich dažie charaktiernaja nadpiś na priažkie była. Tolko vsie ravno vsie Niurnbierhom končiłoś. A riešienije o sozdanii Mieždunarodnoho tribunała užie ozvučieno.
Jak tam—«nasiŭ voŭk,paniasuć i vaŭka».