Pa Hrodnie z aŭdyjahidam. Vałanciory raspracoŭvajuć prahramu, kab raskazać pra svoj horad

«Nam zdajecca, heta toje, što ŭžo daŭno było na pavierchni. Naŭrad ci chto-niebudź budzie spračacca z tym, što naš horad maje vielmi cikavuju i raznastajnuju historyju i vialikuju kolkaść histaryčnych pomnikaŭ, jakija jaje zachavali. Z-za hetaha da nas pryjazdžaje šmat turystaŭ. Jak my mahli nazirać uletku, nie zaŭsiody i hidaŭ chapała na ŭsich», — raspaviała adna z aŭtarak aŭdyjahida Evielina Švied. — «To-bok nieabchodnaść niejkaha dadatku, jaki b dapamahaŭ i našym miascovym haradziencam paznać lepiej horad i jaho historyju, i vandroŭnikam ź inšych haradoŭ dy krain paznajomicca ź im bližej, — heta vielmi jaŭnaja patreba».

Słuchaj, kab pabačyć

U kamandzie Pabach Hrodna ličać, što ludzi pravodziać dastatkova šmat času ŭ telefonach. Tamu im chaciełasia maksimalna vyzvalić čałavieka ad kantaktu z ekranam, kab jon moh pabačyć sam horad i cikavostki ad hrodzienskich historykaŭ i krajaznaŭcaŭ. «Adsiul i ideja dy nazva prykładańnia».

Prajekt stvarajuć vałanciory

Pavodle słovaŭ Evieliny, prajekt — całkam vałanciorskaja inicyjatyva. Kamanda składajecca z zacikaŭlenych «dobrych i talenavitych hrodziencaŭ».

Techničnuju kamandu składajuć ajcišniki, kamandu pa kantencie — historyki, krajaznaŭcy, hidy i nastaŭniki. Jość ludzi, jakija nie majuć histaryčnaj adukacyi, ale razumiejuć, jak uładkavana sučasnaje haradskoje asiarodździe.

Na dumku stvaralnikaŭ, «dla čałavieka važna nie tolki daviedacca niejkija histaryčnyja fakty, ale i daznacca, kudy možna zajści pajeści, dzie jość cikavyja miescy dla dziaciej, jakija zaraz pracujuć muziei i vystavy, dzie možna znajści jakasny padarunak».

Pačali ź viersii dla Android 

Zaraz kamanda zajmajecca stvareńniem viersii aŭdyjahida dla Android. Jaje možna budzie biaspłatna spampavać u kramie dadatkaŭ Play market. Stvaralniki spadziajucca, što hid budzie hatovy ŭ pieršaj pałovie 2023 hoda.

«Praca viadziecca pastupova, užo zroblena vializnaja častka. Ale pamiatajem, što prajekt vałanciorski. Šmat što zaležyć ad zaniataści samich vałancioraŭ, jakija dapamahajuć u svoj volny čas. Tamu robim, što mahčyma, kab znajści aptymalny bałans pamiž jakaściu i chutkaściu. Nam i samim užo vielmi chočacca padzialicca vynikami pracy», — skazała Evielina Švied.

Aŭdyjahidu treba zdać ekzamien 

Z 1 studzienia 2023 hoda aŭdyjahidy pavinny prachodzić atestacyju. Jana adbyvajecca ŭ Ministerstvie sportu i turyzmu albo va ŭpaŭnavažanych im dziaržarhanizacyjach. Tam pavinny acanić hałasavoje supravadžeńnie tekstu aŭdyjahida, sam tekst, afarmleńnie schiemy maršruta, a taksama fota i videa, kali takija praduhledžany.

Raspracoŭščyki aŭdyjahida robiać usio, što nieabchodna, kab dadatak prajšoŭ aficyjnyja atestacyi i pravierki. «Jakraz zaraz udakładniajem usie hetyja pytańni».

Navošta jašče adzin?

Padobnyja aŭdyjahidy ŭžo jość u Hrodnie — Grodno guide, a taksama «Słavutaści Hrodna». Pa słovach Evieliny Švied, «heta vielmi dobryja prajekty, ale ŭsio ž u nas jość adroźnieńni. My robim mienavita aŭtarskija maršruty i supracoŭničajem z našymi krajaznaŭcami i historykami».

U kancy 2020 hoda ŭ Hrodnie zapuścili mabilny dadatak Grodno guide. Jon ŭjaŭlaje saboj zvyčajnuju kartu Hrodna z servisu «Jandieks.Karty», sumieščany z katałoham haścinic, internataŭ, abjektaŭ hramadskaha charčavańnia, histaryčnych i kulturnych abjektaŭ, zabaŭ. U sakaviku 2022 hoda nijakija abjekty na karcie ŭ Android-viersii dadatku nie adlustroŭvalisia. Nie hruzilisia taksama turystyčnyja naviny. U 2022 hodzie haradskija čynoŭniki płanavali vydatkavać na jaho absłuhoŭvańnie bolš za 8,5 tys. rubloŭ.

Ad «haradzienskich kocikaŭ» da haradskoha miedyja

Taksama ŭ dadatku Pabach Hrodna buduć inšyja cikavyja vobłaści. Pra ich buduć pastupova raspaviadać na staroncy aŭdyjahida ŭ instahramie.

«U ideale nam by chaciełasia zrabić placoŭku, dzie možna budzie dzialicca jakasnym i karysnym histaryčnym kantentam i sučasnymi cikavymi mierapryjemstvami horada».

Pavialičyć

U instahramie stvaralniki prajekta Pabach Hrodna padpisvajucca jak «haradzienskija kociki». Jany ŭpeŭnienyja, što kociki — važny simvał horada. «Bo chto nie bačyŭ, jak jany murłykajuć i lažać u kožnym dvoryku? I chto viedaje horad lepiej, čym jany?».

Akramia hetaha, kamanda raspaviała, što ich «vialiki načalnik» — kot Stefana Batoryja. «Heta prajekt našaha znakamitaha hrodzienskaha historyka Andreja Čarniakieviča, jakim jon pahadziŭsia padzialicca. I heta taksama farmiruje sučasny haradski falkłor».

Padtrymać kamandu stvaralnikaŭ Pabach Hrodna i padpisacca na ich u instahramie možna tut.

• 1
• 0
• 0
• 0
• 0
• 0
• 0
• 0