«Naša stratehičnaje ciarpieńnie nie biaźmiežnaje». Iran pahražaje Zialenskamu paśla pramovy ŭ Kanhresie
Pradstaŭnik Ministerstva zamiežnych spraŭ Irana Nasier Kanaani ŭ čaćvier raskrytykavaŭ zajavy Uładzimira Zialenskaha pra vajskovuju padtrymku Tehieranam Maskvy ŭ vajnie suprać Ukrainy. Jak paviedamlaje «Jeŭrapiejskaja praŭda», kamientar Kanaani byŭ apublikavany na sajcie iranskaha MZS.
U zajavie iranskaha dypłamata śćviardžajecca, što Iran «nie pastaŭlaŭ nijakaj vajskovaj techniki nivodnamu boku dla vykarystańnia ŭ vajnie va Ukrainie» i zaŭsiody pavažaŭ terytaryjalnuju cełasnaść usich krain, u tym liku Ukrainy.
«Zialenskamu varta było b viedać, što stratehičnaje ciarpieńnie Irana ŭ dačynieńni da takich biespadstaŭnych abvinavačvańniaŭ nie źjaŭlajecca biaźmiežnym», — zajaviŭ pradstaŭnik iranskaha MZS.
Taksama Kanaani paraiŭ ukrainskamu prezidentu «atrymać urok ź losu niekatorych inšych palityčnych lidaraŭ, jakija zadavolvalisia padtrymkaj ZŠA».
Raniej u pramovie pierad abiedźviuma pałatami Kanhresa ZŠA Zialenski zajaviŭ pra vajskovuju padtrymku Iranam Rasii. «Kali Rasija nie dastaje da našych haradoŭ artyleryjaj, jana sprabuje źniščyć ich rakietami. Bolš za toje, Rasija znajšła saŭdzielnika ŭ hetaj hienacydnaj palitycy — Iran. Iranskija zabojčyja drony, jakija iduć u Rasiju sotniami, stali pahrozaj dla našaj krytyčnaj infrastruktury. Tak adzin teraryst znachodzić inšaha. Pytańnie času, kali jany ŭdarać pa inšych vašych chaŭruśnikach, kali my nie spynim ich ciapier», — skazaŭ jon.
Jak viadoma, Rasija apošnija niekalki miesiacaŭ aktyŭna vykarystoŭvała iranskija bieśpiłotniki-kamikadze Shahed, vydajučy ich za rasijskija drony «Hierań», a taksama viała pieramovy z Tehieranam pra pastaŭki dadatkovaj zbroi, pierš za ŭsio rakiet. Ale aficyjna Maskva i Tehieran heta admaŭlajuć.
Kamientary