Abiacaŭ, što rasijskija vojski nie zastanucca paśla vučeńniaŭ, chacieŭ być pakaranym za viernaść i razvodziŭ kurej. 10 faktaŭ pra Uładzimira Makieja
Uładzimir Makiej pamior u 64 hady. Ministram zamiežnych spraŭ jon byŭ bolš za 10 hadoŭ. Karjeru kiraŭnika viedamstva pačaŭ ź libieralizacyi i naładžvańnia adnosin z Zachadam. Ale za apošnija dva hady adznačyŭsia pahrozami hramadzianskaj supolnaści i kanfliktami z usimi susiedziami, akramia Rasii. Čym zapomniŭsia Makiej?
Byŭ blizkim da Łukašenki
U dypłamatyju Uładzimir Makiej pryjšoŭ u 1993 hodzie — z hroznaha savieckaha HRU, vajskovaj vyviedki. 20 žniŭnia 2012 hoda Makieja pryznačyli ministram zamiežnych spraŭ. Da taho jon 8 hadoŭ byŭ pamočnikam Łukašenki, a taksama 4 hady ŭznačalvaŭ jaho Administracyju.
Ź jaho prychodam na pasadu kiraŭnika zamiežnapalityčnaha viedamstva pačaŭsia čarhovy etap razmarožvańnia adnosinaŭ z krainami Zachadu, jakija ŭviali sankcyi paśla prezidenckich vybaraŭ 2010 hoda.
Pieryjad libieralizacyi, jakuju źviazvajuć ź imiem Makieja, doŭžyŭsia da 2020 hoda. U 2016-m Zachad prypyniŭ sankcyi suprać uradoŭcaŭ režymu Łukašenki.
Pryznavaŭsia ŭ lubovi da vyšyvanki
Da palityčnaha kryzisu 2020 hoda Makiej padkreślivaŭ, što Biełaruś nastrojena na šmatviektarnaść źniešniaj palityki. U 2014 hodzie, havoračy pra rasijskuju interviencyju va Ukrainu, jon nastojvaŭ na tym, što «kali hinuć ludzi, treba sadzicca razam za stoł i damaŭlacca».
U tyja časy pačynaŭsia trend na prasoŭvańnie biełaruščyny. Ułady taksama stali havaryć pra biełaruskuju movu, tradycyi. Uładzimir Makiej vychodziŭ u śviet u vyšyvancy.
«Vyšyvanka dla nas — heta nacyjanalny simvał. Arnamient hetaj kašuli nikoli nie prapaviedavaŭ hvałt i zło, a, naadvarot, prapaviedavaŭ mir, dabro i spakoj. Jon adpaviadaje mientalitetu biełaruskaha naroda, jaho dušy», — kazaŭ jon u 2017 hodzie.
Tady ž u vyšyvanki jon apranuŭ i zamiežnych dypłamataŭ. Na praciahu nastupnych dvuch hadoŭ Makiej padkreślivaŭ važnaść nacyjanalnych atrybutaŭ dla biełarusaŭ.
«Nam treba čaściej chadzić u vyšyvankach», — davodziŭ jon u 2019 hodzie. Na adnu ź imprezaŭ, arhanizavanuju Ministerstvam zamiežnych spraŭ, u vyšyvankach pryjšła žonka Makieja i jahonyja dzieci.
Uładzimir Makiej pahadžaŭsia na intervju dla niezaležnych miedyja.
Małodšy syn — fanat Cimaci
Va Uładzimira Makieja dvoje synoŭ.
Małodšy syn Arciom — prychilnik tvorčaści rasijskaha śpievaka Cimaci. U 2019 hodzie padčas imprezy, pryśviečanaj vyšyvancy, pasoł Rasii Dźmitryj Mieziencaŭ padaryŭ Arciomu płakat z aŭtohrafam hetaha muzykanta.
Siamja Uładzimira Makieja. Jaho małodšy syn Arciom na zadnim płanie
U 2019 hodzie Uładzimira Makieja zaŭvažyli na razdačy biaspłatnych burhieraŭ u žyłym kvartale «Majak Minska». Ministr zamiežnych spraŭ znachodziŭsia ŭ vip-zonie ŭ čakańni kancerta Cimaci.
Starejšy syn zvolniŭsia z MZS paśla paślavybarčaha hvałtu
Starejšy syn Vital u vieraśni 2020 hoda zvolniŭsia ź Ministerstva zamiežnych spraŭ, pajšoŭ u IT — kampaniju IBA Group.
Jon byŭ staršym daradcam upraŭleńnia ŭstojlivaha raźvićcia hałoŭnaha ŭpraŭleńnia šmatbakovaj dypłamatyi. Da hetaha papracavaŭ daradcam pa ekanamičnych i ekałahičnych pytańniach u pradstaŭnictvie Biełarusi pry AAN. A jašče raniej byŭ pieršym sakratarom pasolstva Biełarusi ŭ Aŭstryi.
Paśla adnoj sa skandalnych zajaŭ Ministerstva zamiežnych spraŭ Vital Makiej apublikavaŭ dopis z krytykaj.
«Mnie sumna, što maje byłyja kalehi, da mnohich ź jakich ja adčuvaju ščyryja siabroŭskija pačućci, vymušanyja mirycca ź situacyjaj, pry jakoj niemahčymaja svabodnaja stvaralnaja tvorčaść. Vielmi chaciełasia b, kab u hety zadušlivy čas prafiesijanały zachavali svaje viedy, navyki, dośvied i maralnyja aryjenciry», — pisaŭ jon.
Makiej pra ŭčynak syna i adnosiny ź im paźbiahaŭ havaryć z presaj.
«Što tyčycca maich asabistych adnosin, majoj siamji, ja addaju pieravahu nie raspaŭsiudžvać infarmacyju na hety kont. Heta maje asabistyja prablemy, ź jakimi ja pavinien žyć i spraŭlacca sam», — adreahavaŭ jon na pytańnie pra siamju na pres-kanfierencyi.
Žonka ŭznačaliła Teatr junaha hledača
Aktrysa Viera Palakova-Makiej uznačaliła TIUH u krasaviku 2022 hoda.
Jana kazała, što teatr pavinien admovicca ad pracy vyklučna na biełaruskaj movie: «Ja liču, śpiektakli pavinny być na dźviuch movach: i na biełaruskaj, i na ruskaj. Tady ŭ teatra jość kamiercyjnaja historyja».
Premjeru pa Bykavie — śpiektakl «Alpy. Sorak pieršy» — pastavili na ruskaj movie.
Kazaŭ, što nikoha ŭ Biełarusi nie pasadzili za palityku
Rytoryka i pavodziny Makieja mianialisia razam z hienieralnaj linijaj Alaksandra Łukašenki.
U 2021-m na Usiebiełaruskim schodzie jon zajaviŭ, što imknieńnie Biełarusi da niejtralitetu nie adpaviadaje biahučaj situacyi. Tady jon prapanavaŭ skancentravać na rasijskim napramku pałovu źniešniaha handlu, a astatniaje padzialić pamiž Jeŭrasajuzam i trecimi krainami.
Jon strašyŭ Zachad poŭnym razryvam dypłamatyčnych adnosin ź Jeŭrasajuzam pry ŭviadzieńni sankcyj.
U studzieni 2021 hoda Makiej abvinavaciŭ zamiežnych dypłamataŭ u raspaŭsiudžvańni zaklikaŭ da ŭdziełu ŭ akcyjach pratestu i raźmiaščeńni imi infarmacyi «kankretnaj antydziaržaŭnaj nakiravanaści».
Uładzimir Makiej dziejańni režymu Łukašenki ŭ postvybarčy pieryjad ličyŭ «praźmiernymi, ale adekvatnymi».
«Tak, mahčyma, ułada časam dziejničała praźmierna», — kazaŭ jon. Pavodle jaho, heta «była adekvatnaja reakcyja na ŭsie niamirnyja hvałtoŭnyja pratesty, jakija mieli miesca». Heta byli zaviedama chłuślivyja zajavy: narodnyja demanstracyi ŭ Biełarusi byli padkreślena, vyklučna mirnyja.
Makiej nastojvaŭ, što nichto ŭ Biełarusi nie byŭ pakarany za svaje palityčnyja pohlady.
Pavodle jaho, u biełaruskim zakanadaŭstvie niama palityčnych artykułaŭ, a tamu kazać pra najaŭnaść palitviaźniaŭ niedarečna.
«Jak my možam nazvać palitviaźniami tych ludziej, chto padryvaŭ milicejskija mašyny, chto padryvaŭ administracyjnyja budynki, chto rychtavaŭ zamachi na milicyjantaŭ, chto rabiŭ sproby arhanizavać terarystyčnyja akty na čyhuncy i h. d. Ja liču, što ŭ Francyi za hetyja ž pravinnaści pakarańnie było b vielmi surovym», — davodziŭ jon. Heta taksama zaviedama chłuślivyja słovy. U Biełarusi nichto nie padryvaŭ ni mašyn, ni administracyjnych budynkaŭ. Nie było i «teraktaŭ» na čyhuncy.
Abiacaŭ, što rasijskija sałdaty pakinuć Biełaruś paśla vučeńniaŭ
16 lutaha 2022 hoda, padčas sumiesnych rasijska-biełaruskich vučeńniaŭ «Sajuznaja rašučaść — 2022», Makiej abiacaŭ, što rasijskija vajskoŭcy źjeduć.
«Paśla vučeńniaŭ u Biełarusi nie zastaniecca nivodnaha rasijskaha vajskoŭca i nivodnaj adzinki bajavoj techniki Rasii», — zajaŭlaŭ jon.
Jak ciapier viadoma, sałdaty nie tolki zastalisia, ale i praz tydzień napali na Ukrainu ź biełaruskaj terytoryi.
Makiej razumieŭ, u što ŭciahnuli Biełaruś Maskva i Alaksandr Łukašenka. U pačatku krasavika 2022-ha ŭ jaho vyrvałasia dziŭnaje vykazvańnie: «Lepš być pakaranym śmierciu za viernaść, čym za zdradu».
U kułuarach prasiŭ Zachad ratavać Łukašenku ad Rasii
Vinu za vajnu va Ukrainie ŭskłaŭ na «kalektyŭny Zachad».
«Mienavita Zachad zrabiŭ hety kanflikt niepaźbiežnym — nie tolki svaim rašeńniem pa pašyreńni NATO, ale i admovaj razhladać prapanovy svaich apanientaŭ», — kazaŭ jon.
Kali Rasija pravodziła na akupavanych terytoryjach Ukrainy tak zvanyja refierendumy, Makiej zajaviŭ, što Biełaruś budzie nazirać za situacyjaj i prymie rašeńnie ab pryznańni ich vynikaŭ «u adpaviednaści z nacyjanalnymi intaresami».
Daradca Śviatłany Cichanoŭskaj — Franak Viačorka śćviardžaŭ, što ŭ kułuarach AAN Makiej sustrakaŭsia z pradstaŭnikami zamiežnych delehacyj i pierakonvaŭ ich, što naśpieŭ čas pieraharnuć staronku, bo treba ratavać Łukašenku ad Rasii. Inačaj adbuducca takija ž refierendumy, jak va Ukrainie.
Zhadžaŭsia z Paźniakom, kab asłabić Cichanoŭskuju
U červieni 2020-ha Makiej pahadziŭsia z Paźniakom.
«Viedajecie, mnie vielmi spadabalisia acenki Zianona Paźniaka, acenki niekatorych situacyj u Biełarusi, niekatorych kandydataŭ. Ja šmat u čym ź im zhodny, heta toje, što nazyvajecca «bačyć zdalok — bačyć trapna», jon bačyć dakładna, što adbyvajecca, i acenki daje adekvatnyja. Dumaju, kali b jon byŭ u Biełarusi i mieŭ bolš infarmacyi, jon daŭ by jašče bolš dakładnuju acenku situacyi».
A voś Cichanoŭskuju i kamandu nazyvaŭ «madam i dzieci revalucyi».
«Ja chaču skazać, što madam adčuvaje siabie vielmi niervova. Z ulikam taho, što ničoha, napeŭna, nie atrymlivajecca ź ich abiacańniaŭ. Ja tak zrazumieŭ, što vielmi mnohija dosyć skieptyčna aceńvajuć naohuł dziejnaść hetych dziaciej revalucyi», — vykazvaŭsia jon.
Zavioŭ kurej
U instahramie Makiej chvaliŭsia, što maje kurynuju haspadarku — 10 kurej-niasušak i 1 pieŭnia. Štotydzień kury prynosiać 40—45 jajek.
A taksama dzialiŭsia fiłasofskimi razvahami.
«Vielmi mnohaje zaležyć ad lidara. Byŭ by pievień słabak — nie było b zimoj, u chałodny čas, jaječni na patelni. A tak jość. Uvohule, lidary pavinny być u luboj haspadarcy!»
Čytajcie taksama:
Stała viadomaja imaviernaja pryčyna śmierci Makieja
Ruka Maskvy, pomsta Łukašenki ci prosta infarkt?
Jak Makiej pravioŭ svoj apošni tydzień
Cichanoŭskaja vykazałasia pra śmierć Makieja
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary