Amierykanski instytut vyvučeńnia vajny (ISW) u čarhovaj zvodcy-analizie piša pra toje, što rasijski prezident, miarkujučy pa niekatorych abstavinach, rychtujecca da doŭhaj kampanii zvyčajnymi srodkami, da ŭtrymańnia ciapierašnich akupavanych terytoryj i sprobaŭ zavajavać novyja, a nie da rezkaj eskałacyi, naprykład u formie prymianieńnia jadziernaj zbroi abo, naadvarot, pieramirja.
Na dumku analitykaŭ ISW, na heta pakazvaje, u pryvatnaści, praviedzienaja Pucinym «častkovaja mabilizacyja».
«Jon zapłaciŭ za hetuju mabilizacyju vielmi vysokuju ŭnutrypalityčnuju canu ŭ vyhladzie ŭciokaŭ sotniaŭ tysiač rasijanaŭ u inšyja krainy, biesprecedentnych pratestaŭ i hetak ža biesprecedentnaj krytyki dziejańniaŭ rasijskich vajskoŭcaŭ i rasijskich uładaŭ. Płacić hetuju canu mieła sens, kali Pucin maje namier praciahvać vajnu i razumieje, što va Ukrainu treba nieadkładna adpravić padmacavańnie, kab utrymać pazicyi da taho, jak padaśpieje novy pryzyŭ i źmienić situacyju na jaho karyść», — pišuć aŭtary zvodki ISW.
Na ich dumku, Pucin raźličvaje, što ciapier mabilizavanyja reziervisty ŭtrymajuć pazicyi va Ukrainie da zakančeńnia viasnovaha biezdarožža, a da taho času projduć pačatkovuju padrychtoŭku ŭ čatyry-šeść miesiacaŭ sałdaty terminovaj słužby pryzyvu, jaki pačynajecca ciapier, — i ich možna budzie adpravić na vajnu, u novyja nastupy.
Adnačasova, jak miarkuje ISW, Pucinu zdajecca, što chałodnaja zima i deficyt paliva prymusiać niejkija ź jeŭrapiejskich krain skaracić dapamohu Ukrainie i stać bolš pryjaznymi u adnosinach z Rasijaj.
ISW padkreślivaje, što viadzie havorku pra mierkavany chod dumak rasijskaha kiraŭnika, a nie pra toje, jak na samaj spravie mohuć paŭpłyvać mabilizavanyja i sałdaty terminovaj słužby na chod vajny.
Amierykanskija analityki nahadvajuć, što kala traciny reziervistaŭ (pa słovach samoha Pucina) užo prybyli va Ukrainu, ale istotnych źmienaŭ heta nie pryniesła. Prybyćcio śpiecham padrychtavanych sałdat terminovaj słužby taksama naŭrad ci pryviadzie da pierałomu.
«Ale Pucin, zdajecca, nie choča pryznavać hetyja fakty i, naadvarot, spadziajecca, što sabranyja takoj niečakanaj canoj reziervy pa-sapraŭdnamu źmieniać situacyju», — piša Instytut vyvučeńnia vajny.
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary