Prakuror, supracoŭnik banka, načalnik adździeła Life. Kaho mahli zatrymlivać pa spravie «Čornaj knihi Biełarusi», dzie pracavaŭ ahient HUBAZiKa
Dzieviać miesiacaŭ u «Čornaj knizie Biełarusi» dziejničaŭ ahient HUBAZiKa. Praź jaho byli zatrymanyja mnohija ludzi, jakija pieradavali infarmacyju «ČKB». Što viadoma pra hetych ludziej i jakija terminy jany atrymali, sabrała Radyjo Svaboda.
U lipieni 2022 hoda Śledčy kamitet raspaŭsiudziŭ pres-reliz, što ŭ ramkach rasśledavańnia kryminalnaj spravy pa «Čornaj knizie Biełarusi» zatrymana kala 20 čałaviek. Pavodle SK, «hrupa techničnaj padtrymki» kanała naličvała dziasiatki čałaviek — u tym liku rabotnikaŭ dziaržaŭnych orhanaŭ, byłych pravaachoŭnikaŭ i asob, jakija mieli dostup da asabistych źviestak biełarusaŭ. Mienavita jany «źlivali» infarmacyju pra čynoŭnikaŭ i siłavikoŭ.
«Čornaja kniha Biełarusi» ŭźnikła ŭ vieraśni 2020 hoda ŭ adkaz na hvałt z boku supracoŭnikaŭ siłavych struktur. U adnajmiennym telehram-kanale publikavalisia asabistyja źviestki ludziej, jakija spryčynilisia da falsifikacyi vybaraŭ i hvałtu suprać mirnych pratestoŭcaŭ.
Nie tak daŭno stała viadoma, što ŭ prajekt «Čornaja kniha Biełarusi» amal ad momantu stvareńnia byŭ ukaraniony supracoŭnik HUBAZiKa Artur Hajko, jaki adpracavaŭ u «ČKB» dzieviać miesiacaŭ. Hajko mieŭ źviestki pra ludziej, jakija dasyłali ŭ čat-bot «ČKB» infarmacyju pra čynoŭnikaŭ i siłavikoŭ. Vyjavili jaho tolki ŭ mai 2021 hoda.
Svaboda pahladzieła, pra jakija zatrymańni viadoma ŭ ramkach hetaj kryminalnaj spravy.
Źmicier Padrez
Ajcišnik, a taksama stryt-art-mastak. Byŭ zatrymany ŭ lipieni 2021 hoda, u chutkim časie paśla raskryćcia asoby Hajko. Pravaabaroncy adznačali, što pry zatrymańni ź jaho ździekavalisia i bili jaho. Da Padreza ŭ kvateru siłaviki trapili praz vokny, spuściŭšysia pa viaroŭkach.
Paźniej źjavilisia śviedčańni, što pry zatrymańni ŭ kvatery Padreza siłaviki rezali karciny, raźbili stary noŭtbuk. Kali prybyŭ HUBAZiK, to ad ich zatrymany pačuŭ: «Sardečna zaprašajem u hiestapa».
Sud adbyvaŭsia pry začynienych dźviarach. 15 sakavika 2022 hoda Padrezu ahučyli vyrak — siem hadoŭ kałonii ŭzmocnienaha režymu. Ciapier jon u kałonii ŭ Mahilovie.
Siarhiej Pietrušenka
Telehram-kanały, blizkija da HUBAZiKa, adkryta paviedamlali, što Pietrušenku ŭdałosia vyjavić dziakujučy pracy ich supracoŭnika, jaki byŭ ukaraniony ŭ pracu «Čornaj knihi Biełarusi». Siarhiej Pietrušenka — u minułym rabotnik «Minskaha haradskoha ahienctva pa dziaržaŭnaj rehistracyi i kadastry».
Hienieralnaja prakuratura pisała pra Pietrušenku, što jon ad vieraśnia 2020-ha da červienia 2021 hoda (u hety miesiac jakraz jaho zatrymali) pieradavaŭ administrataram «Čornaj knihi Biełarusi» źviestki pra sudździaŭ, rabotnikaŭ prakuratury, Śledčaha kamiteta i MUS.
U žniŭni 2022 hoda Pietrušenku asudzili na 6,5 hoda kałonii. Ciapier jon u SIZA ŭ Baranavičach.
Natalla Łašč
Byłaja rabotnica prakuratury Frunzienskaha rajona Minska, zatrymanaja ŭ žniŭni 2022 hoda za «źliŭ» piersanalnych źviestak u «Čornuju knihu Biełarusi», pra heta spravazdačyłasia Hienieralnaja prakuratura. Apošnim časam pracavała ŭ śfiery IT. Suprać Łašč zaviali kryminalnuju spravu pa artykule 130 KK «Raspalvańnie varažniečy». Trymajuć jaje ŭ SIZA na Vaładarskaha.
Andrej Harun
U minułym byŭ siłavikom. Pierad zatrymańniem pracavaŭ u EPAM. Zatrymany ŭ kastryčniku 2021 hoda za pieradaču piersanalnych źviestak telehram-kanału «Čornaja kniha Biełarusi». Sud jašče nie adbyŭsia, trymajuć Haruna ŭ SIZA na Vaładarskaha.
Śviatłana Byčkoŭskaja
Žančyna pracavała ŭ słužbie «Adno akno» Kastryčnickaha rajona Minska. Kryminalnuju spravu zaviali za raspalvańnie varožaści. U videa, jakoje zdymali siłaviki, Byčkoŭskaja kazała, što pieradavała źviestki «Čornaj knizie Biełarusi». Suprać jaje zaviali kryminalnuju spravu pa artykule 130 KK «Raspalvańnie varožaści», jak i suprać inšych fihurantaŭ spravy. Pravaabaroncam pakul nieviadoma pra sud nad zatrymanaj.
Vasil Jermakoŭ
U minułym viadučy ekanamist banka BiełVEB. Zatrymany ŭ lipieni 2022 hoda. U źniatym siłavikami videa Jermakoŭ kazaŭ, što pieradavaŭ dadzienyja adminam «Čornaj knihi Biełarusi». Sud nad im jašče nie adbyŭsia.
Načalnik adździeła markietynhu Life
U lutym 2022 hoda HUBAZiK paviedamiŭ pra zatrymańnie načalnika adździeła markietynhu i raspracoŭki apieratara mabilnaj suviazi Life. Jaho abvinavačvali ŭ źlivie piersanalnych źviestak siłavikoŭ i dziaržaŭnych słužboŭcaŭ. Suprać 31-hadovaha mieniedžara zaviali kryminalnuju spravu za raspalvańnie varažniečy. Jahonaha imia nie nazyvali ni siłaviki, ni pravaabaroncy. Sud pakul što nie adbyŭsia.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary