«Žančynam sivizna padabajecca». Mužčyny i žančyny raskazvajuć, jak pasivieli ŭ 15, 16 i navat 9 hadoŭ i što z hetym rabili
Siviznu zvyčajna ličać prykmietaj mudraści i staraści, ale niekatoryja čytačy «Našaj Nivy» pasivieli nie ŭ typovyja 50—60 hadoŭ, a našmat raniej. Voś ich historyi.
«Pačała sivieć paśla trahiedyi na Niamizie, tam zahinuła maja najlepšaja siabroŭka»
38-hadovaja Kaciaryna pačała sivieć u 15 hadoŭ, praz hod paśla trahiedyi na Niamizie, u jakoj zahinuła jaje najlepšaja siabroŭka. U pieršy raz sivyja vałasy ŭ jaje zaŭvažyła siabroŭka, jakaja pasprabavała ich vyrvać, chacia ekśpierty rajać tak nie rabić.
Spačatku, dzielicca Kaciaryna, jana zaŭvažyła tolki niekalki sivych vałasoŭ nad iłbom, ale praz 2—3 hady amal usie vałasy ŭ hetaj vobłaści pasivieli. Takaja maładaja — a sivaja! — kazali ludzi. Heta šakavała inšych, tamu
z 19 hadoŭ biełaruska aśviatlaje vałasy — jana nazyvaje heta najlepšym sposabam schavać siviznu.
Sama Kaciaryna siviznu prymaje: «Tak, ja nie zhodnaja jaje naŭmysna demanstravać, ale niejak turbavacca praz heta nie budu. Ničoha ž z hetym užo nie zrobiš.
Ale ja pamiataju, što jašče kolki hod tamu maje blizkija davoli niervova reahavali i prasili zrabić niešta, kali farbavanyja vałasy adrastali. U sałonach pryhažości majstry taksama zaŭsiody ździŭlajucca, jak u takoj maładoj dziaŭčyny takaja vyraznaja sivizna».
Ciapier Kaciaryna žyvie ŭ ZŠA, i tam da jaje asablivaści staviacca spakojna: «U apošni čas majstry ŭ cyrulniach prapanujuć nie chavać siviznu, a niejak jaje padkreślić — naprykład, pafarbavać u ružovy koler. Heta, na moj pohlad, śviedčańnie taho, čto ad žančyny bolš nie patrabujuć być źniešnie idealnaj, zaraz u trendzie indyvidualnaść».
Kali kazać pra mužčyn, to bolš starejšyja zaŭsiody zaŭvažać siviznu Kaciaryny i prapanujuć niejak jaje schavać, a voś maładziejšyja chłopcy nijak na jaje nie reahujuć.
«Pačałosia, kali fašysty spalili chatu»
37-hadovy Kirył pačaŭ sivieć jašče ŭ 11 kłasie. Asablivych nahod dla hetaha ŭ žyćci mužčyny nie było, ale ž u jaho siamji ŭsie siviejuć rana. Pačałosia heta, raskazvaje biełarus, jašče ŭ vajennyja časy: «U 1942 hodzie, u vioscy, na vačach majho dzieda fašysty spalili jaho chatu ź ludźmi ŭ joj. Dzied chavaŭsia ŭ lesie i ŭsio heta bačyŭ, a zrabić ničoha nie moh. Za noč jon całkam pasivieŭ».
Inšyja ludzi nie tak lohka prymajuć toje, što Kirył amal uvieś sivy, i časta prapanujuć jamu pafarbavacca, ale sam mužčyna da svajoj sivizny stavicca spakojna i nijak nie sprabuje ad jaje pazbavicca — kaža, jamu navat padabajecca.
Praŭda, jość u niezvyčajnaj rysy adzin minus: kali Kirył doŭha nie stryžecca i nie holicca, vyhladaje ŭ vačach ludziej, jakija jaho drenna viedajuć, na 50 hadoŭ.
Žančynam sivizna padabajecca, raskazvaje Kirył.
«Moj chłopiec pažartavaŭ, što ja — jak trochkalarovaja koška»
Jašče adna naša čytačka, 33-hadovaja Maryja, znajšła ŭ siabie pieršyja sivyja vałasy ŭžo ŭ dzieviacihadovym uzroście. Ciapier, raskazvaje jana, amal usie jaje vałasy sivyja, aryhinalny ciomny koler zachavaŭsia tolki na makaŭcy. Jašče ŭ 13 hadoŭ dziaŭčyna pačała zafarboŭvać siviznu: pačynała z chny, paźniej pierajšła na prafiesijnuju farbu.
Maci raskazvała dziaŭčynie, što jaje sivizna — hienietyčnaja źjava, toje, što pieradajecca praz pakaleńni, i tamu situacyju nijak nie vypravić. Babula Maryi całkam pasivieła ŭžo da 40 hadoŭ.
Maryja nie sumuje praz rańniuju siviznu: «Staŭlusia da sivizny narmalna, navat stanoŭča, bo heta maja fišačka. Ale, kaniešnie, heta nie zusim zručna, bo časta prychodzicca farbavać vałasy, kab jany vyhladali akuratna».
Biełaruska pierasprabavała ŭsialakija farby, ale niedzie praz try tydni paśla farbavańnia sivizna ŭsio roŭna prabivajecca, dy i zanadta častaje farbavańnie drenna ŭpłyvaje na vałasy. Tamu Maryja ciapier maskiruje siviznu z dapamohaj śpiecyjalnaj tušy i farbuje vałasy raz prykładna na 1,5 — 2 miesiacy.
Apošni čas dziaŭčyna padumvaje i ŭvohule pierastać farbavać siviznu. Na taki krok jaje natchnili fota z kinafiestyvalu ŭ Kanach 64-hadovaj aktrysy Endzi Makdaŭeł, jakaja nie chavaje siviznu navat u takija ŭračystyja momanty. Tym bolš što tady budzie mienš niajomkich situacyj, kali pryjdziecca vybirać ažno pamiž tryma kolerami: «Adnojčy ja vyrašyła źmianić styl i pafarbavałasia ŭ błond. Kali maje ciomny i sivy kolery pačali adrastać, moj chłopiec pažartavaŭ, što ja ciapier jak trochkalarovaja koška i taksama prynošu ŭdaču».
«Pryciahvaje ŭvahu, a ja hetaha nie lublu»
Vadzim sivieje z 16 hadoŭ. Ciapier jamu 31 hod, i nie mirycca ź siviznoj, rehularna farbuje vałasy ŭ cyrulni pad svoj były koler. A ŭ junactvie lubiŭ ekśpierymientavać — mieŭ navat rudyja i čyrvonyja vałasy.
Vadzim raskazvaje, što sivizna nie vyklikaje ŭ jaho kompleksaŭ ci žadańnia pahalicca pad nul, ale vyhladaje nieachajna i pryciahvaje ŭvahu inšych, a jon hetaha nie lubić. Tamu jon i farbuje vałasy
Mužčyna sprabavaŭ znajści pryčynu rańniaj sivizny, ale biezvynikova: «Ja sprabavaŭ źviartacca da daktaroŭ, jany nakiroŭvali mianie na analizy, atrymoŭvali vyniki całkam zdarovaha čałavieka, paciskali plačyma i havaryli, što napeŭna heta štości hienietyčnaje».
«Naša Niva» — bastyjon biełaruščyny
PADTRYMAĆ28-hadovaja minčanka: «U mianie pałova vałasoŭ ŭžo sivyja. I mnie padabajecca!»
Jak časta treba myć hałavu i ci karysnyja kandycyjaniery i maski, tłumačyć miedyk
Čamu vałasy siviejuć praz stres — jość navukovaje abhruntavańnie
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ2
Kamientary