Realnyja zarobki pa krainie padajuć katory miesiac. Ale jość niekalki halin, dzie jany vyraśli
Zhodna ź Biełstatam, Hrodzienskaja vobłaść — adzinaja, dzie vyras siaredni realny zarobak, a Minsk staŭ lidaram padzieńnia dachodaŭ u pieraliku na pradukty. Cikava, što padzieńnie nazirajecca i ŭ raniej paśpiachovych halinach.
Zarobki pa krainie
Na Biełstacie jość danyja za žnivień — jany paraŭnoŭvajucca z zarabotnaj płataj, jakaja fiksavałasia hod tamu, u žniŭni 2021-ha.
Sioleta rost realnaha zarobku fiksavaŭsia ŭ lutym — na 10,7 pracenta. Z sakavika realnyja zarobki padali. U žniŭni prasiadańnie skłała 4 pracenty.
Siaredniaja naminalnaja zarabotnaja płata žniŭnia była 1666 rubla. Hod tamu — 1463 rubli, ale na ich možna było kupić bolš, čym sioleta.
(Naminalny zarobak — suma, jakuju naličvajuć rabotniku pa damovie. Realny adlustroŭvaje pakupnickuju zdolnaść, kolkaść tavaraŭ i pasłuh, jakija čałaviek moža nabyć za hetyja hrošy).
Dzie zarobki raśli i padali
Na 10,7 pracenta za hod pavialičyŭsia realny zarobak ŭ «turystyčnaj halinie: akazańni pasłuhaŭ pa braniravańni i spadarožnaja dziejnaści», što ŭvasobiłasia ŭ 1852 rublach naminalnaj zarabotnaj płaty. Letaś było 1 389 rubloŭ.
Bolš na 12,3 pracenta ŭ žniŭni vyraśli realnyja zarobki ŭ «dapamožnaj dziejnaści ŭ śfiery finansavych pasłuh i strachavańnia». Naminalnaj zarabotnaj płaty tut vyjšła 4418 rubloŭ. Letaś było 3 307 rubloŭ.
Padzieńnie realnaha zarobku zaznaŭ hruzavy pavietrany transpart — na 30,4 pracenta. Naminalnaja zarabotnaja płata tut skłała 2129 rubloŭ. Letaś jana była 2595 rubloŭ.
U pasažyrskich pieravozkach pavietranaha transpartu realny zarobak taksama ŭpaŭ, ale na 22,1 pracenta. Sioleta ŭ žniŭni było naličana ŭ siarednim 3676 rubloŭ zarabotnaj płaty. Hod tamu — 4001 rubiel.
Jakaja situacyja ŭ asobnych rehijonach
Hrodzienščyna
Heta adziny rehijon, dzie ŭ žniŭni realny siaredni zarobak vyras. Jon pavialičyŭsia na 1,4 pracenta ŭ paraŭnańni z anałahičnym pieryjadam minułaha hodu. Naminalnaja zarpłata skłała — 1518 rubloŭ suprać 1267 rubloŭ letašniaha žniŭnia.
Zhodna sa statystyčnymi źviestkami, najbolš u rehijonie zarablali rabotniki infarmacyjnych technałohij i infarmacyjnaha absłuhoŭvańnia — 4729 rubloŭ. Chacia realny zarobak žniŭnia ŭ ich źmienšyŭsia na 3,2 pracenta.
Rehijanalnym lidaram rostu realnaha zarobku stała raślinavodstva. U paraŭnańni sa žniŭniem minułaha hoda jon vyras na 23 pracenty. Naminalnaja zarabotnaja płata skłała — 1855 rubloŭ, a letaś było 1281 rubiel.
Na 17 pracentaŭ bolš zarabili zaniatyja navukovymi daśledavańniami i raspracoŭkami. Ich naminalny zarobak u žniŭni byŭ 1703 rubloŭ suprać letašnich 1232.
Prasieŭ na 11,9 pracenta realny zarobak u lesanarychtoŭcy. Žnivieńskaj zarabotnaj płaty im naličyli 1591 rubiel. Letaś byŭ 1531 rubiel.
Minsk
U stalicy realny zarobak źmienšyŭsia najbolš, čym dzie ŭ krainie. U paraŭnańni ź letašnim žniŭniem jon pamienieŭ na 7,9 pracenta. Naminalnaja zarabotnaha płata skłała 2216 rubloŭ.
Na 20,5 pracenta bolš, čym hod tamu, u žniŭni zarabili ŭ turystyčnaj halinie. Tut naličyli naminalnaj zarabotnaj płaty 2382 rubli suprać letašnich 1677.
U žyviołahadoŭli realny zarobak vyras na 19,8 pracenta, što adlustravałasia ŭ 3 839 rublach. Letaś było 3236 rubloŭ.
Pracaŭnikam hornazdabyvalnaj pramysłovaści stali płacić na 6,6 pracenta bolš, čym hodam raniej. Naličany naminalny zarobak skłaŭ 6159 rubloŭ suprać letašnich 4899.
U žniŭni najbolšy naminalny zarobak mieli rabotniki zaniatyja ŭ śfiery infarmacyjnych technałohij i infarmacyjnaha absłuhoŭvańnia — 6228 rubloŭ. Letaś jon składaŭ 6016 rubloŭ. Ale, zhodna sa statystyčnymi danymi, ich realny zarobak źmienšyŭsia na 11,9 pracenta.
U staličnaj naftapierapracoŭcy realny zarobak źmienšyŭsia na 22,1 pracenta. U paraŭnańni ź letašnimi 2500 rublami naminalnaja zarabotnaja płata prasieła da 2285 rubloŭ.
Paciarpieła i avijapieravozka. Realny zarobak tut źmienšyŭsia na 22,4 pracenta. Naminalny ž skłaŭ 3534 rubli suprać letašnich 3864 rubloŭ.
Viciebščyna
Na Viciebščynie realny zarobak u paraŭnańni sa žniŭniem 2021 hoda źmienšyŭsia na 1 pracent. Naminalnaja zarabotnaja płata skłała 1441 rubiel. Letaś była 1234 rubli.
U «turystyčnaj halinie: akazańni pasłuhaŭ pa braniravańni i spadarožnaj dziejnaści» realny zarobak vyras na 20,1 pracenta, a naminalny skłaŭ 2 102 rubli. Letaś było 1 330 rubloŭ.
U vytvorčaści celułozy, papiery, a taksama vyrabaŭ z papiery zarobak vyras na 14,7 pracenta. Naminalnaja zarabotnaja płata tut skłała 1 776 rubloŭ suprać letašnich 1 314.
U raślinavodstvie realny zarobak padros na 14,4 pracenta: 1 595 rubloŭ. Letaś naličvali 1182 rubli.
U naftapierapracoŭcy zarobak vyras na 11,2%, što ŭvasobiłasia ŭ 3 121 rubli naminalnaj zarabotnaj płaty. Letaś było 2 381 rubiel.
U hornazdabyŭčaj pramysłovaści realny zarobak źmienšyŭsia na 12,4 pracenta, a ŭ naminale pracaŭnikam naličyli 1 358 rubloŭ. Letaś było 1 315 rubloŭ.
Mahiloŭščyna
Tut siaredni realny zarobak u paraŭnańni sa žniŭniem 2021 hodu źmienšyŭsia na 3 pracenty. Naminalnaja zarabotnaja płata skłała 1374 rubli. Letaś była 1200 rubloŭ.
Rehijanalnym lidaram rostu zarobkaŭ u žniŭni stała naftapierapracoŭka. Realnaja zarabotnaja płata tut uzrasła na 36,2 pracenta. Naminalny siaredni zarobak skłaŭ 1 542 rubli, suprać letašnich 960 rubloŭ.
Na 18 pracentaŭ bolš stali zarablać zaniatyja navukovymi daśledavańniami i raspracoŭkami. U žniŭni im naličyli naminalnaj zarabotnaj płaty — 1793 rubli. Letaś ža było 1414 rubloŭ.
Najbolšaje prasiadańnie ŭ realnaj naličanaj zarabotnaj płacie zaznali vytvorcy mebli — na 16,6 pracenta. Naminalny zarobak u ich skłaŭ 1296 rubloŭ. Letaś vychodziła 1318 rubloŭ.
Kamientary