Prakuror zaprasiŭ pa «spravie zmoŭcaŭ» ad 3 da 12 hadoŭ kałonii
Minski abłasny sud miesiac u vyjaznym pasiadžeńni praciahvaje razhlad «spravy ab zmovie z metaj zachopu dziaržaŭnaj ułady». Sudovy praces u adkrytym režymie viadzie sudździa Uładzimir Areška. Siońnia pa spravie adbyvalisia sprečki bakoŭ, padčas jakich dziaržaŭny abvinavaŭca Michaił Kavaloŭ zaprasiŭ fihurantam terminy, piša «Viasna».
Na łavie padsudnych znachodziacca palitźniavolenyja palitołah i litaraturaznaŭca Alaksandr Fiaduta, kiraŭnik partyi BNF Ryhor Kastusioŭ, supracoŭnica minskaha ofisa Ziankoviča Volha Hałubovič, aktyvist i dalnabojščyk Dzianis Kraŭčuk, a taksama juryst Juryj Ziankovič, jakija ŭtrymlivajucca za kratami bolš za 16 miesiacaŭ. Usie, akramia Kastusiova, pryznali vinu, a Ziankovič zaklučyŭ dasudovaje pahadnieńnie.
Na pačatku sprečak dziaržaŭny abvinavaŭca zajaviŭ, što klučavy fihurant spravy Jury Ziankovič vykanaŭ ŭmovy ździełki sa śledstvam. Prakuror, vystupajučy ŭ sprečkach, zajaviŭ, što Ziankovič, znachodziačysia na terytoryi ZŠA i RF, arhanizavaŭ zmovu z metaj zachopu dziaržaŭnaj ułady ŭ Biełarusi, fizičnaj likvidacyi kiraŭnika dziaržavy i razam ź Dźmitryjem Ščyhielskim kiravaŭ złačynnymi dziejańniami zmoŭščykaŭ.
«Asnoŭnym dokazam vinavataści Ziankoviča, Fiaduty i Kastusiova ŭ zmovie z metaj źviaržeńnia ŭłady niekanstytucyjnym šlacham liču danyja apieratyŭnaha ekśpierymientu», — skazaŭ dziaržaŭny abvinavaŭca.
Vystupajučy ŭ sprečkach, prakuror zajaviŭ, što Ziankovič prybyŭ u Biełaruś 5 žniŭnia 2020 hoda i pa ŭzhadnieńni ź Dźmitryjem Ščyhielskim pačaŭ šukać udzielnikaŭ zmovy, u tym liku siarod vajskoŭcaŭ i radykalna nastrojenych hramadzian. Praź miesiac jon sustrakaŭsia ź Mikałajem Aŭtuchovičam, ź jakim abmiarkoŭvaŭ zmovu.
Dziejnaść Ziankoviča nie zastałasia pa-za ŭvahaj biełaruskich śpiecsłužbaŭ. Aficer Hienieralnaha štaba US Ivan Žuraŭski byŭ pryciahnuty da apieratyŭnaha ekśpierymientu i pravioŭ sustreču ź Ziankovičam. Dziaržaŭny abvinavaŭca pry hetym asabliva padkreśliŭ, što pravakacyj z boku śpiecsłužbaŭ padčas śledčaha ekśpierymientu nibyta nie było, inicyjatyva ździajśnieńnia zmovy z metaj źviaržeńnia ŭłady ŭ Biełarusi zychodziła ad Ziankoviča.
«Apieratyŭny ekśpierymient dazvoliŭ nie dapuścić vajennaha pieravarotu i krovapralićcia», — padkreśliŭ dziaržaŭny abvinavaŭca, vystupajučy ŭ sprečkach.
Na dumku prakurora, dva fihuranty spravy — Dzianis Kraŭčuk i Volha Hałubovič — nie brali ŭdzieł u zmovie, nakiravanaj na zachop ułady niekanstytucyjnym šlacham.
U vyniku, prakuror Michaił Kavaloŭ zaprasiŭ nastupnyja terminy pa «spravie zmoŭščykaŭ»:
- palitołahu i litaraturaznaŭcu Alaksandru Fiadutu pa č. 1 art. 357 KK (zmova z metaj zachopu dziaržaŭnaj ułady niekanstytucyjnym šlacham) — 12 hadoŭ kałonii;
- kiraŭniku partyi BNF Ryhoru Kastusiovu pa č. 1 art. 357 KK — 12 hadoŭ kałonii;
- jurystu Juryju Ziankoviču pa č. 1 art. 357 KK (zmova z metaj zachopu dziaržaŭnaj ułady niekanstytucyjnym šlacham), č. 1 art. 361-1 KK (stvareńnie ekstremisckaha farmavańnia i kiraŭnictva im), č. 3 art. 361 KK (publičnyja zakliki da zachopu dziaržaŭnaj ułady), č. 3 art. 130 KK (raspalvańnie sacyjalnaj varožaści) — 12 hadoŭ kałonii;
- aktyvistu i dalnabojščyku Dzianisu Kraŭčuku pa č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak) — try hady kałonii;
- supracoŭnicy minskaha ofisa Ziankoviča Volzie Hałubovič pa č. 1 art. 342 KK — try hady kałonii.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy5
Kamientary