Prahramy dla adsočvańnia mienstrualnych cykłaŭ mohuć pradavać vašy danyja i navat pieradać ich siłavikam

Na praciahu niekalkich tydniaŭ paśla taho, jak Viarchoŭny sud zabaraniŭ aborty ŭ ZŠA, abaroncy pryvatnaha žyćcia i ekśpierty turbavalisia, što danyja, sabranyja prahramami dla adsočvańnia ciažarnaści i miesiačnych, mohuć być vykarystanyja suprać karystalnikaŭ, jakija chočuć nielehalna zrabić abort.

Kampanija Mozilla paćvierdziła mnohija z hetych strachaŭ: jany vyjavili, što bolšaść razhledžanych imi prahram dla adsočvańnia miesiačnych i ciažarnaści dzielacca infarmacyjaj pra svaich karystalnic i prapanuje vielmi raspłyvistyja tłumačeńni taho, kali i ŭ jakim abjomie jany buduć dzialicca danymi z pravaachoŭnymi orhanami.

«Prahramy dla repraduktyŭnaha zdaroŭja źbirajuć mnostva vielmi asabistaj infarmacyi. Ale my nie bačym, kab kampanii aktyvizavalisia i prymali dadatkovyja miery pa abaronie pryvatnaści i biaśpieki hetaj infarmacyi, — kaža Džen Kałtrydar, viadučy daśledčyk hrupy, jakaja padrychtavała spravazdaču. — Jany vykarystoŭvajuć šabłonnyja palityki pryvatnaści, takija ž, jak u prahram z kulinarnymi receptami abo tajmierami dla vareńnia jajek».

Z 25 prahram i praduktaŭ, razhledžanych Mozilla, 18 byli paznačanyja cetlikam «kanfidencyjalnaść nie ŭklučanaja», što pakazvaje na toje, što ludzi pavinny być aściarožnymi pry ich vykarystańni. Vosiem prahram nie adpaviadali navat minimalnym standartam biaśpieki Mozilla, a niekatoryja ź ich prymali vielmi słabyja paroli, naprykład, «1».

Mozilla uvohule nie zmahła znajści palityku pryvatnaści ŭ prahramy dla ciažarnych Sprout, jakuju niadaŭna rekamiendavała Cosmopolitan, i kaža, što raspracoŭščyki nie adkazvajuć na listy. Pry hetym prahrama źbiraje takija danyja jak vaha, pryznačeńni lekara, płan rodaŭ i žurnały ciažarnaści.

Kamanda Mozilla taksama vyvučyła prahramy The Bump Pregnancy Tracker & Baby App (jakaja, pa słovach Mozilla, dzielicca danymi karystalnikaŭ «z takoj kolkaściu trecich asob, što hałava idzie kruham»), WebMD Pregnancy (jakaja «dzielicca i, mahčyma, pradaje infarmacyju pra svaich karystalnikaŭ trecim asobam u rekłamnych metach») i What to Expect Pregnancy Tracker (jakuju Mozilla chvalić za toje, što jano, prynamsi, sumlenna pryznaje, što «jany płanujuć pradavać asabistuju infarmacyju, jakuju jany źbirajuć»).

Daśledčykaŭ Mozilla taksama niezadavoliŭ padychod ŭsich troch prahram da pieradačy infarmacyi pravaachoŭnym orhanam, bo palityka ich kampanij sfarmulavanaja nastolki raspłyvista, što Mozilla ličyć niezrazumiełym, ci buduć jany dobraachvotna vykonvać zapyty pravaachoŭnych orhanaŭ abo buduć davać infarmacyju tolki pa rašeńni suda.

Tolki adna prahrama dała vyrazny adkaz pra toje, jak jana budzie apracoŭvać zapyty pravaachoŭnych orhanaŭ: Ovia. Heta papularnaja prahrama dla lačeńnia biaspłodnaści. Jana paviedamiła, što zapatrabuje, kab palicyja źviarnułasia z pozvaj u sud, i pasprabuje dać jak maha mienš infarmacyi.

«Ovia — heta bujnaja kampanija, u jakoj jość resursy, kab skłaści płan, zajavu, jurydyčny płan dziejańniaŭ u takich vypadkach, — skazaŭ Kałtrydar. — Ja turbujusia, što ŭ niekatorych z hetych nievialikich prahram nie chopić jurydyčnych resursaŭ, kab dać adpor, kali jany atrymajuć zapyty ad pravaachoŭnych orhanaŭ na takija rečy».

Adnosna niepapularnaja prahrama Euki była adzinaj, jakuju całkam uchvalili daśledčyki Mozilla. Akramia zachoŭvańnia ŭsioj infarmacyi pra svaich karystalnicaŭ łakalna, to bok, na samoj pryładzie, Euki dazvalaje karystalnicam ŭvodzić niesapraŭdny kod dostupu, jaki pakaža niepraŭdzivyja źviestki.

Pavialičyć

Hetaja prahrama raspracavanaja hrupaj «Žančyny dapamahajuć žančynam», jakaja taksama padtrymlivaje hrupy, jakija imknucca raspaŭsiudzić viedy pra samastojnyja aborty.

Mozilla vyvučyła piać nasimych pryładaŭ, jakija mohuć źbirać infarmacyju pra zdaroŭje, naprykład, hadzińniki Apple Watches.

«U kampanii Apple davoli dobry pasłužny śpis u sensie procidziejańnia zapytam pravaachoŭnych orhanaŭ, ale heta zaŭsiody padstava dla chvalavańnia, — skazaŭ Kałtrydar. — Ale ŭ nas nie było vialikich tryvožnych sihnałaŭ u dačynieńni da nasimych pryładaŭ, akramia taho, što jany źbirajuć šmat danych i mohuć być vykarystanyja dla sačeńnia za vami, i kali jany patrapiać u čužyja ruki, to mohuć być vykarystanyja dla adsočvańnia ludziej, jakija, mahčyma, chočuć spynić ciažarnaść».

Motherboard taksama źviazaŭsia z raspracoŭščykami prahram dla adsočvańnia mienstrualnych cykłaŭ, razhledžanymi Mozilla, i spytaŭ ich pra palityku ŭ dačynieńni da pryvatnaści i pieradačy danych pravaachoŭnym orhanam. Adkazy byli nieadnaznačnymi, ale, pa mienšaj miery, adna prahrama, Period Tracker, zajaviła, što kali pravaachoŭnyja orhany pasprabujuć praz sud atrymać danyja karystalnikaŭ, kab asudzić ludziej za praviadzieńnie abortaŭ, prahrama chutčej spynić svaju pracu, «čym stanie saŭdzielnikam takoha pieravyšeńnia paŭnamoctvaŭ i parušeńnia niedatykalnaści pryvatnaha žyćcia».

Praŭda Mozilla, jakaja abapirajecca na ahulnadastupnuju infarmacyju i trojčy źviartałasia da Period Tracker z pytańniami pra pryvatnaść, znajšła jašče adnu zajavu raspracoŭščykaŭ, u jakoj skazany, što jany mohuć dzialicca danymi z pravaachoŭnymi orhanami. Hetaja zajava, na dumku Mozilla, «zanadta raspłyvistaja dla taho, kab rekamiendavać hetu prahramu».

Lepšy sposab paźbiehnuć zboru danych z dapamohaj prahram, viadoma — heta nie karystacca imi naohuł, ale Kałtrydar pryznaje, što heta niepapularna ŭ našy dni.

«Ja viedaju, što palityku pryvatnaści ciažka zrazumieć, — skazaŭ Kałtrydar. — Ale kali vy vykarystoŭvajecie hetyja prahramy, kab pasprabavać zaciažaryć abo paźbiehnuć ciažarnaści, budźcie aściarožnyja. Nie paviedamlajcie bolš, čym vam treba. Nie davajcie im bolš za nieabchodny minimum».

Čytajcie jašče:

Stvaryli servis, jaki dazvalaje biaspłatna palepšyć staryja fota. Pakazvajem, jak jon pracuje

Za maskvičami sočać adrazu čatyry ałharytmy raspaznavańnia asob. Adzin ź ich — skandalna viadomy biełaruski

Kavid škodzić mozhu. Tłumačym, jak heta adbyvajecca

• 1
• 0
• 1
• 3
• 3
• 2
• 8
• 0